《台語荒漠甘泉（全羅版）》

"Tshiat-tshiat kî-tó"

作者 陳清俊 翻譯

listen
Tsa̍p-jī ge̍h tsa̍p-la̍k (Tsa̍p-jī ge̍h tsa̍p-la̍k ji̍t)

"Koh ū A-ná, i sī tsùe sian-ti, ... lóng-bô lī-khui tiān, kìm-tsia̍h kî-tó, mî-ji̍t ho̍k-sāi." (Lōo-ka 2:36-37)

Ûan-tsûan bô giâu-gî, lán thang īng kî-tó lâi ha̍k-si̍p kî-tó, kî-tó jú tsūe, lán ê kî-tó jú hó. Bô-líng bô-sio ê kî-tó íng-úan būe ta̍t-kàu sìng-king sóo kóng ê "ū tūa kong-hāu" ê kî-tó. (Ngá-kok 5:16)

Kî-tó ū tūa lîng-li̍k sī lán ta̍t ūe kàu ê, tsóng-sī ài lóo-li̍k khì tit-tio̍h. A-pik-la̍h-hán nā bô í-tsîng kap Siōng-tè ê kau-thong, tsiū būe thang hiah nih sîng-si̍t ūi Sóo-to-má kā Siōng-tè tshíng-kiû. Ngá-kok tī Piān-í-lī kui-mî kap Siōng-tè sio-ián, tsu̍at-tùi m̄-sī i thâu-tsi̍t-pái tú-tio̍h Siōng-tè. Lán sīm-tsì thang khùann tshut Iok-hān hok-im tē tsa̍p-tshit tsiunn sóo kì, Tsú Iâ-soo tī I tsia̍h-khóo siū-lān tsîng sóo tsùe siōng súi siōng kî-biāu ê kî-tó, he sī I tsin tsūe sî thong-siau tsīng-siu, lê-bîng siông-siông khí-sin kî-tó ê sîng-kó.

Nā-sī ū-lâng siong-sìn, i m̄-bián tsuan-sim kî-tó tsiū hōo kî-tó ū tūa kong-hāu, he sī khong-su bōng-sióng. Í-lī-a ê kî-tó sing hōo thinn bô lo̍h-hōo, āu-lâi koh kiû thinn lo̍h tūa-hōo, tsí-sī i it-liân-tshùan ki̍k-li̍k hiòng Siōng-tè kiû king-li̍k tiong ê tsi̍t ê lē. Ah, tsin hi-bāng ki-tok-tôo lóng ūe kì tit beh ài ū kong-hāu koh sîng-kong ê kî-tó, it-tīng ài tshiat-tshiat kî-tó!

Hiah ê úi-tāi ê kî-tó-tsiá, in tsin tsió lia̍t tī sìn-sim úi-jîn, sûn-tō-tsiá ê hâng-lia̍t tiong, kî-si̍t ū in sī kàu-hūe siōng tūa ê hok-khì. In phak-pài tī Siōng-tè un-tián tsîng, ūi tsūe-tsūe lâng kî-tó hōo lâng tit-tio̍h hok-khì.

Ài-kì-tit, lán pit-su tī kî-tó tiong ha̍k-si̍p kî-tó, ài kè-sio̍k kî-tó, án-ni lán ê kî-tó ūe kè-sio̍k. --- Tsarles H. Spurgeon


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw