《台語荒漠甘泉（全羅版）》

"Pik-tshiat kî-tó"

作者 陳清俊 翻譯

listen

Tsa̍p-jī ge̍h sann-tsa̍p (Tsa̍p-jī ge̍h sann-tsa̍p ji̍t)

"Tùi án-ni Pí-tik lâu tī kann-ni̍h; to̍k-to̍k kàu-hūe thùe i tshiat-tshiat kiû Siōng-tè." (Sù-tôo hîng-tūan 12:5)

Pí-tik tī kann-nih thìng-hāu siū tshù sí, kàu-hūe tī lâng ê hong-bīn bô lîng-li̍k, á-sī íng-hióng-la̍t lâi kiù i. Tē tsiūnn bô pang-tsān i ê hong-huat, tān-sī pang-tsān thang tùi thinn nih lâi tit-tio̍h. Kàu-hūe ūi i hé-jia̍t khún-kiû ê kî-tó. Siōng-tè phài tsi̍t ê thinn-sài, "thinn-sài tah Pí-tik ê hia̍p-ē, kiò i tshínn." (Sù-tôo hîng-tūan 12:7) Jiân-āu thinn-sài tshūa i "king-kè tē it kap tē jī kòo-siú ê sóo-tsāi, kàu thàu siânn ê thih mn̂g; hit ê mn̂g ūi-tio̍h in ka-kī khui;" (Sù-tôo hîng-tūan 12:10) Pí-tik tit-tio̍h tsū-iû.

Tī lí ê sìnn-miā khó-lîng ū bóo-tsióng ê thih-mn̂g tòng lí ê lōo. Tshin-tshiūnn tī lâng-á lāi ê tsiáu siông-siông tsing lâng-á kuainn, tse m̄-nā būe kái-kuat būn-tê, húan-tńg hōo lí phî-lô ià-siān. Tī tsia lí thang o̍h ê pì-kuat, tsiū-sī siong-sìn kî-tó. Tán lí kiânn kàu thih-mn̂g pinn ê sî, ūe tshin-tshiūnn Pí-tik tsi̍t-iūnn, thih-mn̂g tsū-tōng ka-kī khui lah.

Lí nā o̍h tio̍h tsá-kî kàu-hūe hit-iūnn tī "lâu-tíng pâng" nih ê kî-tó, lí beh tsat-síng tsin-tsūe ê tsing-li̍k, kap tsūe-tsūe ê kan-khóo sit-bāng. Lí nā o̍h tio̍h tse kî-tó, sī īng Siōng-tè ê sìn-sim m̄-sī īng lí ê sìn-sim lâi kî-tó, būe thang khik-ho̍k ê khùn-lân ūe siau-sit, gi̍k-kíng piàn sūn-kíng. Lí ê tsin-tsūe tshin-lâng í-king hōo Sat-tàn khún-pa̍k tī kann-nih tsin-tsūe nî ah, in teh thìng-hāu thih-mn̂g khui, tng lí pîng sìn-sim khiân-sîng put-tūan ǹg Siōng-tè kî-tó, in beh tī Ki-tok ê lāi-bīn tit tháu-pàng. --- C.H.P.

Tú-tio̍h kín-kip ê tsōng-hóng su-iàu jia̍t-tshiat ê kî-tó. Tng kî-tó ê lâng pún-sin tsiânn tsùe kî-tó ê sî, Sím-mi̍h to tsóo-tòng i būe tiâu. Í-lī-a tī Ka-bi̍t suann phak tī thôo-kha, bīn giap tī kha-thâu-u tiong, i tsiânn-tsùe kî-tó.

Kî-tó bô it-tīng ài tshut siann, jia̍t-tshiat ê kî-tó, bô it-tīng ūe thang īng gú-giân lâi piáu-ta̍t. Īng Í-lī-a ê tsōng-hóng, i kui ê lâng kap Siōng-tè tsiap-tshiok, kap Siōng-tè liâm tsùe tsi̍t thé, liân-ha̍p tí-ti̍k ok sè-li̍k. Í-lī-a ê tùi-ti̍k tsiū tòng būe-tiâu tsit tsióng ê kî-tó lâng. Hiān-kim ti̍k-pia̍t su-iàu tsit tsióng lâng. --- tùi "Kūi-lo̍h ê sî-khik"

"Kóng būe tshut ê thóo-khùi" (Lô-má 8:26) siông-siông sī Siōng-tè sóo būe-thang kū-tsu̍at ê. --- Tsarles H. Spurgeon


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw