《台語荒漠甘泉（全羅版）》

"Kap Tsú tâng-kiânn"

作者 陳清俊 翻譯

listen


Tsiann ge̍h jī-tshit (It ge̍h jī-tsa̍p-tshit ji̍t)

"ka-kī beh hōo lín tsiâu-tsn̂g, kian-kòo, ióng-kiānn." (I Pí-tik 5:10)

Lán kap Ki-tok beh kiàn-li̍p sin koh tshim-ji̍p kuan-hē ê tāi-sing, ài tshiong-hun liáu-kái, bîng-pi̍k tse sin kuan-hē tùi lán sóo tit ê kûan-lī. Nā ū tsi̍t-si-si-á ê hûai-gî, lóng beh phò-húi lán ê sìn-sim. Tng lán tit-tio̍h liōng-kng, tit tshing-tshó, lán tsiū thang hó-tánn hiòng tsîng kiânn. Lán kuat-tīng lán ê súan-ti̍k, tsiū kuat-ì hiòng tsìng-khak ê hong-hiòng khì tsùe, ū tshiong-tsiok ê sìn-sim kap ióng-khì khì tsùe, ná tshin-tshiūnn tūa tshiū tìng-kun tī tē tsi̍t-puann. Lán ê hiàn-sin ài tshin-tshiūnn sin-niû tī kiat-hun tián-lé sìng-tûann tsîng, tsiong ka-kī kau-thok hōo sin-lông tsi̍t-iūnn, tsiong-sing tsun-siú, bô pó-liû, bô hōo-húe.

Jiân-āu sī kiàn-li̍p kap khó-giām ê sî-kî. Lán tio̍h khiā ún lán ê kha-pōo, kian-tīng put-î, ti̍t-kàu sin ê kuan-hē khak-li̍p tiâu-tiâu, tsiânn-tsùe sìnn-miā ê tsū-jiân húan-ìng. Ná tshin-tshiūnn gūa-kho i-sing tsiap-kut āu, ài īng nn̄g-tè pang kā gia̍p-tiâu-tiâu, á-sī īng tsio̍h-ko khōng hōo i ân, tsiām-sî hōo i būe tín-tāng. Siōng-tè iā ūe ūi I ê kiánn-jî tsng lîng-sìng ê pang, á-sī tsio̍h-ko, kiò in ha̍k-si̍p an-tsīng, tōo-kè tē it kai-tūann sìn-sim ê khó-giām. Ū-sî tshì-giām sī kan-lân, tsóng-sī, "Koh bān hāng un-tián ê Siōng-tè, tsiū-sī bat tī Ki-tok tiàu lín tit-tio̍h I íng-úan ê îng-kng ê, tī lín tsiām-sî siū khóo ê liáu-āu, ka-kī beh hōo lín tsiâu-tsn̂g, kian-kòo, ióng-kiānn." (I Pí-tik 5:10) --- A.B. Simpson

Tī tsūe kap pīnn-thàng tse nn̄g hāng sū, ū siāng-khúan ê tsū-jiân-lu̍t, nā-sī sûi khûan-kíng tshut-tsāi in kè-sio̍k khì, tsiū ūe tîm-lo̍h tī tūa tshì-thàm-tsiá, môo-kúi ê kûan-sè ē. Tān-sī Ki-tok Iâ-soo iā ū tsi̍t-tiâu lîng-sìng kap jio̍k-sin sing-u̍ah-lu̍t, tsiū-sī khò-tio̍h Ki-tok, lán ūe-thang khiā khí-lâi, tí-khòng pīng thâi-iânn hit ê kā lán beh khiú lo̍h khì ê tsū-jiân-lu̍t.

Beh án-ni tsùe, lán su-iàu tsin-tsiànn sio̍k-lîng ê li̍k-liōng, bo̍k-piau kian-tīng, li̍p-tiûnn khiā tsāi, sìn-sim ê si̍p-kùan húan-ìng. Tshin-tshiūnn kang-tiûnn ê tiān-la̍t kiòng-ìng gûan-lí tsi̍t-iūnn. Ài ki-khì tín-tāng, su-iàu sing khui khai-kuan, khui liáu-āu, khai-kuan iā ài it-ti̍t khǹg tī khui ê ūi, án-ni, tiān-la̍t tsiū beh kiòng-ìng put-tūan. Koh tiōng-iàu ê sī ki-khì ài kap tiān-gûan liân tsùe-hé, nā-sī ki-khì kap tiān-gûan ê tsiap-tshiok ûan-tsûan, tiān-la̍t beh î-tshî it-tshè ki-khì tsìng-siông ê ūn-tsok.

Ti lán kap Siōng-tè tâng-kiânn ê sū, ū tsi̍t-tiâu sio̍k-lîng-lu̍t ài khì kíng-súan, siong-sìn, tsun-siú kap kian-tshî lo̍h-khì. Lán án-ni tsun-thàn, tsiū lán ê tsiânn-sìng, i-tī ê sū, lóng beh tsìng-siông ūn-tsok. --- tùi "Tī tē ná tī thinn"


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw