《台語荒漠甘泉（全羅版）》

“Tsì bî-suè”

作者 陳清俊 翻譯

listen
Jī ge̍h jī-sì (Jī ge̍h jī-tsa̍p-sì ji̍t)

“Iok-hān lóng bô kiânn sîn-jiah, to̍k-to̍k Iok-hān sóo kóng tsí tsit lâng ê, lóng sī tsin.” (Iok-hān hok-im 10:41)

Lí khó-lîng bô muá-ì lí pún-sin, lí m̄-sī thian-tsâi, bô ti̍k-sû ê tsâi-lîng, it-sing pîng-pîng tām-tām kè-ji̍t. Sing-ua̍h tan-tiāu, bô sím-mi̍h tshù-bī, ta̍t-tit thang lâi thê-khí ê sū. Sui-jiân sī án-ni, lí iáu sī ua̍h kah tsin ū kè-ta̍t.
Kiânn sué-lé Iok-hān it-sing bô kiânn tsi̍t-kiānn ê sîn-jiah, Iâ-soo khiok kóng,"Hū-jîn-lâng sóo sinn bē ū khah tuā Iok-hān ê;" (Lōo-ka 7:28) I ê sù-bīng sī "uī-tio̍h kngg tsuè kan-tsìng nā-tiānn." (Iok-hān hok-im 1:8) Tse iā sī lí guá ê sù-bīng. Kiânn sué-lé Iok-hān buán-tsiok tsuè tsit ê siann-im, tsí-iàu ū lâng thiann-tio̍h, uē sīunn tio̍h Ki-tok tsīu kàu-gia̍h.
Lâng ing-kai kam-sim tsuè hit ê hōo lâng uē thiann-kìnn, khiok buē thang khuànn-tio̍h ê siann-im, á-sī tsi̍t-ê kiànn ê po-lê, lâng bīn-tuì kiànn, khuànn tio̍h ê sī Jîn-tsú Iâ-soo ê tshàn-lān îng-kngg, m̄-sī po-lê. Lâng ing-kai kam-sim lo̍k-ì tsuè thinn kngg sî ê liâng-hong, suan-kò "lê-bîng kàu lah," "lê-bîng lâi lah," iā koh khuànn buē tio̍h, tsīng-tsīng siau-sit khì.
Lán muí tsi̍t ji̍t ê kang-tsok sui-jiân bô sím-mi̍h tuā liáu-put-khí ê sū, tān-sī Siōng-tè lóng tsai, lóng khuànn tio̍h lah. Siat-sú sing-ua̍h tī kap tsin oh tînn ê lâng ê tiong-kan, siat-huat īng thiànn lâi iânn i. Nā-sī bat tsuè-kè tuā sit-tshò, m̄-thang hōo sit-tshò ê ìm-iánn íng-hióng lí í-āu ê jîn-sing, tsiong tse só tī sim-té, huán-tńg tuì tse lâi tit li̍k-liōng, thuàn-liān ka-kī ê phín-keh.
Lán kî-si̍t tsuè liáu tsin tsuē hó sū, tshiau-kè lán sóo tsai. Kim-ji̍t lán iā-tsíng, kap lâng hun-hióng Ki-tok ê tsin-tō. Ū tsi̍t kang, ū lâng kóng, i siōng tāi-sing tsai Ki-tok sī tuì lí hia. Tngg guá lī-pia̍t ê sî, guá bô khuà-sim bōng-pâi ê suí-bái, tuā-suè, guá sóo ài tsai ê sī phóo-phóo thong-thong ê lâng tī guá ê bōng tsîng kóng, “i sī tsi̍t ê hó-lâng, i bô kiânn kè sím-mi̍h sîn-jiah, tsóng-sī i tsiong Ki-tok kài-siāu hōo guá, hōo guá thang jīn-bat Tsú Iâ-soo” tsīu kàu-gia̍h lah. --- George Matheson


Lí sóo khǹg-ba̍t ê lâng (Si-phian 83:3)

Tshīu-hio̍h ē,
Thôo-ni̍h huat-tshut tshinn-tshinn ê hio̍h,
Huann-hí tshun-thinn ê hoo-kiò,
Tsháu pàng tshut hun-hong phang-bī teh tshiò,
Tap-ìng jua̍h-thinn hue khui, ji̍t tsiò.

Tshīu-hio̍h ē,
Puah-khui tshīu-hio̍h, hián-tshut bí-lē,
Lán sóo bô sīunn-tio̍h ê tē,
Ū âng, ū pe̍h ê gōo-ge̍h hue,
Thu̍t-jiân ê kngg lâi tián tshut in ê hue.

Tshīu-hio̍h ē,
Sè-kan kiám ū tshin-tshīunn tsit khuán hue ê jîn-tsâi?
Sìng koh siān ê kiânn-tsuè, tsí hōo Thinn-pē tsai.
Siunn hó, kiânn siān, tiām-tiām lâi,
Hue m̂, hue luí khui, hán tit khuànn tio̍h ê hong-tshái.

Tshīu-hio̍h ē,
Sìn-sim sìn-khò sûn-kiat ê hue suī,
Tsiap-tshiok tio̍h thinn ni̍h ê îng-kngg kap kong-hui,
Sīu ap, sīu teh ê sim-lîng tián khui,
Hián-tshut bí-lē, thiànn ê hue luí.

Tshīu-hio̍h ē,
Tī im-iánn, tióng-sîng tsi̍t tuā tui
Suí-suí tióng-sîng ê hue-luí,
Ún-tsông tī hue-ni̍h, uî-luî
Kam-tinn, ti̍k-íu ê phang-bī tsin ko-kuì.

Lán ba̍k-tsiu sóo khuànn buē tio̍h,
Tsú khiok tsai muí tsi̍t luí, muí tsi̍t hio̍h,
Kam-sim thìng-hāu I ê kngg tsiò,
Ti̍t kàu I koh-lâi ê sî, ê thiànn-sioh.
Tshin-tsū hian-khui tsiah ê tshīu-hio̍h.

Siōng-tè tuì phóo-thong ê jîn-kûn tiong, kíng-suán I siōng pó-kuì ê kang-lâng. (tsham-khó Lōo-ka 14:23)

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw