《台語荒漠甘泉（全羅版）》

"Thàu-tsá thâu tsi̍t hāng sū"

作者 陳清俊 翻譯

listen

Sann ge̍h tshue-jī (Sann ge̍h jī ji̍t)

"Bîn-á-tsá-khí lí tio̍h pī-pān piān; thàu-tsá lí tio̍h tsīunn Se-nái suann; tī-hia, tī suann-bé-liu, khiā tī Guá bīn-tsîng, m̄-thang ū lâng kap lí tsīunn-lâi;" (Tshut-ai-ki̍p-kì 34:2,3)

Thàu-tsá, tsá-khí-sî, sī hui-siông tiōng-iàu ê sî-khik. Tsi̍t-ji̍t ê khai-sí, sing bīn-tuì Siōng-tè tsiah lâi bīn-tuì tsi̍t ji̍t ê sing-ua̍h; sing kìnn Siōng-tè ê bīn, tsiah khì kìnn kî-thann lâng ê bīn. Nā-sī tan-tan khò pún-sin ê li̍k-liōng lâi khai-sí tsi̍t ji̍t ê sing-ua̍h, lí m̄-thang sīunn kóng beh tit-tio̍h sìng-lī.
Lí ê sim su-iàu tī Siōng-tè bīn-tsîng īng tsi̍t kuá sî-kan an-tsīng huán-síng, tuì I hia tit li̍k-liōng, tsiah khai-sí tsi̍t-ji̍t ê kang-tsok. Lí kap lí sìnn-miā tiong tsit ê uí-tāi ê lâng-kheh, tsun-kìng ê tâng-phuānn, Iâ-soo Ki-tok kìnn-bīn í-tsîng, m̄-thang kìnn kî-thann ê lâng, pau-kuat ke-lāi lâng ê bīn.
Ài siông-siông tan-to̍k kap I kìnn-bīn, tsiong I sóo kà-sī ê uē, sìng-king phah-khui lâi tha̍k, hōo lí ê sing-ua̍h sīu Ki-tok ê sìng-tsîng lâi kám-jiám tio̍h, khì bīn-tuì, tshù-lí muí ji̍t it-puann, á-sī ti̍k-pia̍t ê tsik-jīm.

Thàu-tsá kap Siōng-tè khai-sí,
Sù ji̍t-kngg, khuì-la̍t hōo lí,
I sī tsá-khí-sî kong-hui,
Tuā-sió sū lóng kau-tài I.

Tshing-tsá tshìunn tsi̍t tiâu sin kua,
Tàu huann-hí ū tshīu-nâ, sió-suann,
Hong, hái, pînn-îunn koh tsuí-tsuânn,
Hue tsháu khue hô kap tshân-huānn.

Tāi-sing tshìunn-kua ǹg Thinn-pē!
M̄-sī tâng-phuānn á sio̍k-sè,
M̄-sī sīu-tsō-mi̍h, lâng kheh,
Sī ū îng-iāu Hit Tsi̍t ê.

Tsá-sî kap Thinn-pē tâng kiânn!
Tshiánn I tī thâu-tsîng tuà-niá,
Hái-pinn, khue huānn kap suann-niá,
Lóng beh tshē-kîu tè I iánn.

Thâu tsi̍t pit sing-lí,
Kîu Tsú lâi tsí-sī,
Hô-hâi koh sūn-lī,
Kui ji̍t tshiò bî-bî. -- Horatius Bonar

Uī Thinn-pē tsuè siōng tsuē kang ê lâng, tsīu-sī muí tsá-khí, kuī-lo̍h ǹg I kî-tó ê lâng. Tshin-tshīunn, tsa̍p-tshit sè-kí Ing-kok bo̍k-su, Hngg-lí Má-thài (Matthew Henry) muí tsá-khí sì-tiám kàu pueh tiám tī i tsu-pâng lîng-siu, jiân-āu kap ke-lāi ê lâng kî-tó, tsia̍h tsá-tǹg. Liáu-āu koh huê kàu tsu-pâng ti̍t-kàu tiong-tàu. Tsia̍h liáu kàu ē-poo sì-tiám sī siá-tsok ê sî-kan, kî-thann sî-kan khì thàm-hóng pîng-íu.
Ing-kok tsa̍p-pueh sè-kí sìng-si tsok-tsiá, Tō-tshui-jí Hui-li̍p-pí (Philip Doddridge) īng i sóo tù ê "Ka-iōng kái king" ê tsu tsuè lē. Tshing-tsá gōo-tiám khí-tshn̂g kap tshit-tiám khí-tshn̂g ê hun-pia̍t, tsá-khí ê lâng i ê kang-tsok tsing-ka pah-hun-tsi jī-gōo. Uānn-uē kóng, it-sing sì-tsa̍p-nî kang-tsok ê sî-kan, tsīu tsing-ka tsa̍p ê kang-tsok-nî.
Khu-lah-kú A-tong (Adam Clarke) ê "Sìng-king tsù-kái" tsú-iàu sī tī tshing-tsá siá ê. Ba-ní-su (Barnes) ê tsù-kái tsu, sī tsi̍t pún siōng sīu huan-gîng ê sìng-king tsù-kái, iā sī lī-iōng tī thàu-tsá ê sî sóo siá-tshut. Tsa̍p-pueh sè-kí Ing-kok kàu-huē uí-jîn, Se-biān Tsa-lí (Tsarles Simeon) ê "Biô-uē" tuā pōo-hūn iā sī tī tsá-sî sì-tiám kàu pueh-tiám ê sî uân-sîng.

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw