《台語荒漠甘泉（全羅版）》

"Jîn-sing ê suann-kok"

作者 陳清俊 翻譯

listen

Sann ge̍h tsa̍p-la̍k (Sann ge̍h tsa̍p-la̍k ji̍t)

"sī uī-tio̍h lán ê lī-ik." (Hi-pik-lâi 12:10)

Ka-ná-tāi (Canada) suan-kàu-su Ralph Conner sóo siá ê tsu, ū biô-siá tsi̍t ê tsa-bóo gín-ná ê kòo-sū. Ū tsi̍t ê tsá-bóo gín-ná miâ kiò tsuè Gún (Gwen), i bô ài sīu kà-sī, koh ū tsin khut-kiông ê sìng-keh, i ài án-tsuánn tsuè, tsīu beh án-ni tsuè, buē thiann lâng ê ì-kiàn. Ū tsi̍t ji̍t i tú-tio̍h giâm-tiōng ê ì-guā, tshut-sū, suah hōo i sin-thé tsân-huì, hîng-tōng put-piān; i ê huán-puān-sìng kìng-ka lī-hāi. Ū tsi̍t ji̍t, i tú-tú teh ai-uàn ê sî, ū suann-tē suan-kàu-su lâi kā i khuànn, tsit ê suan-kàu-su ū tsi̍t ê guā-hō, kiò "thian-tông su-ki", i īng suann-kok tsuè phì-jū lâi kóng kòo-sū:
Tī khí-thâu tē-tsīunn bô suann-kok, tsí-ū tsi̍t-phìnn pînn-îunn, ū tsi̍t ji̍t, pînn-îunn ê tsú-lâng kiânn tī tsit ê tuā pînn-îunn, tuì pînn-îunn mn̄g, "Lí ê hue tī tó-uī?" , i huê-tap: "Guá bô hue-tsíng."
Tsú-lâng kā tsiáu-á kóng tsit ê sū, tsiáu-á tsīu tuà lâi kok-tsióng ê hue-tsíng, iā tī pînn-îunn ta̍k sóo-tsāi. Tī jua̍h-thinn, pînn-îunn huat-tshut ta̍k-tsióng ê hue, ū muî-kuì, n̂g-sik uánn-hue, ji̍t-thâu hue (thài-iông hua, hue uē ǹg ji̍t-thâu tńg-se̍h), iā ū âng ê pik-ha̍p-hue. Kok-sik kok-hîng ê hue phiàn-tē, suí bô pí. Tsú lâng khuànn liáu tsin huann-hí, tsóng-sī bô khuànn tio̍h i sóo sim-ài ê hue, koh mn̄g pînn-îunn, "Thài uē bô khuànn tio̍h thih-suànn-liân, gōo-kap-hue, tsí-hue, kim-káu-á-mn̂g, kap khui-hue ê suè-tsâng tshīu ah?"
Tsiáu-á koh tuà lâi tsuē-tsuē ê hue-tsíng, Tsóng-sī tsú-lâng lâi ê sî, îu-guân khuànn bô tio̍h i sóo sim-ài ê hue. Mn̄g kóng, "Guá sóo ài ê siōng phang, siōng suí ê hue tī tó-uī?" Pînn-îunn iu-siong huê-tap, "Tsú-lâng ah, guá lâu-buē-tiâu hiah ê hue. Hong tsi̍t-ē tshe, ji̍t-thâu pha̍k tī guá ê sim-kuann, hue koo-ta khì, tsīu hōo hong tshe khì lah."
Tsīu án-ni, tsú-lâng kā sih-nà kóng-uē, sih-nà sok-tōo tsin-kín thòo-tshut kiàm-kong, tsiong pînn-îunn phuà-tsuè nn̄g-pîng, pînn-îunn thòng-khóo kàu ai-ai-tshan, ū tshim-tshim buē kìnn-tio̍h ji̍t ê tuā khang-tshuì. Kuí-ji̍t āu, hô-tshuan kuàn tsuí tī khang-tshuì, tsīu-sī suann-kok lāi, iā tuà puî-puî ê oo-thôo ji̍p-lâi.
Tsiáu-á koh tsi̍t-pái iā-tsíng, lo̍h tī suann-kok lāi, bô kú suann-kok lāi ū kok tsióng ê thai, tîn, tī suann-piah ê giâm-tsio̍h phāng, ū thih-suànn-liân, gōo-kap-hue, tíng-tíng. Tuā tsâng tshīu tuì kok-té huat-tshut, tshun tshut i ê e ǹg ji̍t-thâu, tshīu kha ū hiong-pik tshīu tsai, kok tsióng ê hue-tsháu. Kui ê suann-kok piàn tsuè Tsú-lâng sim-ài ê hioh-khùn sóo-tsāi, hióng-sīu an-lîng hí-lo̍k ê uī.
Jiân-āu tsit ê “Thian-tông su-ki” tuì I kóng, “Sìng Sîn ê ké-tsí tsīu-sī jîn-ài, huann-hí, hô-pîng, thun-lún, tsû-pi, siān-liông, tiong-sìn, un-jîu, tsún-tsat.” (Ka-lia̍p-thài 5:22-23) Ū-ê tsí ū tī suann-kok lāi tsiah ū. Gún mn̄g kóng, “Sím-mi̍h sī suann-kok lāi ê hue?” Bo̍k-su huê-tap kóng, “Jím-nāi, jîn-ài, kap un-jîu. Put-kò, pînn-îunn tiong iā ū jîn-ài, hí-lo̍k kap hô-pîng ê hue khui-teh, tān-sī bô suann-kok tiong ê hue hiah suí hiah phang.”
Gún tiām-tiām bô tín-tāng ū-hiah-kú, jiân-āu tshuì-tûn tín-tāng, tsin khat-bōng teh kóng, “Guá ê suann-kok ni̍h bô hue, tsí-ū tshoo-tshoo lāi-lāi ê tsio̍h-thâu.” Bo̍k-su tsû-ài huê I kóng, “Ū tsi̍t kang, iā beh ū hue, tshin-ài ê Gún, Siōng-tè uē tshē-tio̍h in, Guán iā it-tīng uē khuànn-tio̍h in.”
Tshin-ài ê, tngg lí lâi kàu lí jîn-sing ê suann-kok ê sî, ài kì-tit tsit ê kòo-sū!

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw