《台語荒漠甘泉（全羅版）》

"Thinn-pē ê lōo"

作者 陳清俊 翻譯

listen
Sann ge̍h sann-tsa̍p (Sann ge̍h sann-tsa̍p ji̍t)

"Khuànn ah, huān-nā lín tiám-hé, īng hé-pé uî ka-kī--ê, thang lâi kiânn tī lín ê hé-iām lāi, kap lín sóo tiám ê hé-pé tiong. Tse sī Guá ê tshíu sóo tiānn tio̍h ê; lín beh tó tī kan-khóo ê tiong-kan." (Í-sài-a 50:11)

"Tse sī kā kiânn tī oo-àm tiong, ka-kī teh tshē kngg ê lâng kū-thé ê kìng-kò. In beh tshin-tshīunn tiám to̍h ê hé, hé-tshinn ǹg sì-bīn siā tshut-lâi. Tse sī sím-mi̍h ì-sù?
Ì-sù sī, lán kiânn tī oo-àm tiong, sīu ín-íu bô khì sìn-khò Tsú, bô uá-khò I, khiok uá-khò ka-kī khì tshē tshut-lōo. Lán bô hōo Thinn-pē lâi pang-tsān, huán-tńg khò ka-kī ê li̍k-liōng. Lán tsiàu tsū-jiân ê hong-huat khì tshē kngg, khì tshíng-kàu pîng-íu, hōo lán pún-sin tit kiat-lūn, sīu gōo-tō tshuā tī uai-lōo, pīng bô tshē-kîu Siōng-tè ê tsiànn-lōo.
Lán sóo khuànn-tio̍h ê kngg, tsin khó-lîng sī ka-kī sóo tiám-to̍h ê hé-kngg, iā khó-lîng sī kiânn ǹg guî-hiám àm-tsio̍h ê ké ting-thah. Siōng-tè hōo tsiah-ê hu-ké ê hé-tshinn lâi tsiò lōo, kiat-kó sī pi-siong tshinn-tshám ê.
Tshin-ài ê pîng-íu, tû-liáu tī Pē Siōng-tè sóo tiānn-tio̍h ê sî-kan kap tsiàu I ê hong-sik, tsua̍t-tuì m̄-thang sīunn beh khò ka-kī kiânn tshut oo-àm. Lí tú-tio̍h khùn-lân, hām-lo̍h tī oo-àm tiong, sī ài lí tit-tio̍h tsi̍t kuá kín-kip su-iàu ê kà-sī á kong-khò. Kè-thâu tsá ê tsín-kìu khó-lîng uē hông-gāi tio̍h Siōng-tè ê un-tián tī lí sin-tsīunn ê ūn-tsok. Uân-tsuân kau-thok Tsú, kam-sim tī oo-àm tiong thìng-hāu, khak-si̍t tsai, ū I kap lán tông-tsāi.
Tshiánn kì-tit, tī oo-àm tiong kap Tsú tâng-kiânn pí ka-kī tsi̍t lâng kiânn tī kngg tiong khah hó. – tuì "Suè-suè ê siann-im"
Bo̍h-tit jiáu-luān kan-sia̍p Siōng-tè ê kè-uē kap I ê tsí-ì. Lām-sám tāng, lóng sī uē phò-huāi I ê kang. Tsiong sî-tsing ê hun-tsiam, sî-tsiam kā kái-piàn, kā tńg-se̍h, pīng buē kái-piàn tio̍h khak-si̍t ê sî-kan. Khó-lîng lí uē ka-sok Siōng-tè ê ì-sù tī bóo tsi̍t hong-bīn huat-tián, tān-sī tn̂g-kî kú-tn̂g lâi khuànn, lí sún-hāi I ê kang-tsok. Lí thang tsiong tsi̍t-luí ê hue-m̂ kā i thìnn-khui, án-ni tsuè, khiok sī huí-liáu tsi̍t luí hue. Tsiong it-tshè lóng kau-thok I, tsi̍t-tiám-á mā bô pit-iàu pó-lîu. "Tsóng-sī m̄ sī tsiàu guá sóo ài; sī tsiàu lí sóo ài." (Má-khó 14:36) --- Stephen Merritt

I ê lōo

Guá ài thîng, I khiok ài guá kè-sio̍k kiânn,
Tī hân-líng ê tshīu-nâ kiann-hiânn;
Guân-in sī siánn?
Hut-jiân ū tuā tsio̍h-thâu lak lo̍h lâi ê siann,
Kòng tī thâu-tú-á sóo khiā hia.

Guá ài beh kiânn, I khiok ài guá tòng-tiānn;
Koo-put-tsiong, "tsiàu Lí ê ì-sù tsiânn."
Kè ji̍t thàu-tsá, In kiânn
Tī guá sóo beh kiânn ê lōo-tiânn,
Tī hia ū tsi̍t bé tuā tsuâ sí tiānn-tiānn.

Guá bô beh koh mn̄g guân-in,
Sui-jiân guá khuànn buē tio̍h tsîng-bīn.
Tè I ê tài-ín,
Guá sui gōng, I khiok tsin koh thang sìn,
Kà guá tshē suán an-tsuân ê lōo-kìng. --- tuì "Tsú-ji̍t-o̍h ha̍k-pò"

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw