《台語荒漠甘泉（全羅版）》

"Tsú ê lōo khah kuân lán ê lōo"

作者 陳清俊 翻譯

listen
Sì ge̍h tsa̍p-sann (Sì ge̍h tsa̍p-sann ji̍t)

"Iâ-hô-hua ê tshíu tī-hia hē tī guá ê sin-tsīunn; I tuì guá kóng, Lí khí-lâi, khì pînn-îunn, Guá beh tī-hia kap lí kóng-uē." (Í-se-kiat 3:22)

Lí kiám bat thiann tio̍h, hōo Ki-tok sóo tiōng-iōng ê lâng, in bô king-giām tio̍h ti̍k-pia̍t thìng-hāu ê sî-kî, á-sī kò-jîn ê kè-uē sīu kái-uānn mah? Sù-tôo Pó-lô sīu sàng kàu A-la̍h-pik ê sua-bôo sann nî kú, tī-hia, i tit-tio̍h hok-im ê hong-hù. Hiān-kim, hōo Siōng-tè sóo tiōng-iōng ê lâng, lóng ài ū tsi̍t-tuānn thìng-hāu ê sî-kan. Lí kiám bat thuân sìn-khò Iâ-soo ê sìn-sit, I khiok ài lí sing thìng-hāu lâi bîng-pi̍k sìn-khò sī sím-mi̍h mah?
Guá pún-sin iā ū tsit khuán ê king-giām, tsí-sī bô tshin-tshīunn Pó-lô hiah tshim-khik, tsóng-sī guân-tsik sī siāng-khuán. Ū tsi̍t pái guá sīunn bûn-ha̍k-kài ê mn̂g í-king uī guá lâi khui, sī tsin hó ê ki-huē, tsóng-sī koh hut-jiân kuainn khí-lâi. Guá ê i-sing tuì guá kóng, "Lí pit-su tī sing-tsûn kap siá-tsok tiong suán-ti̍k tsi̍t hāng, lí buē thang nn̄g hāng lóng beh tit." He sī 1860 nî ê sî, it-ti̍t kàu 1869 nî guá tsiah uân-sîng "Bo̍k-ióng si-kua." Tī tse í-tsîng guá lóng bô lī-khui guá ka-kī khiā-khí ê sóo-tsāi. Tī tsit káu nî kú sî-kan ê thìng-hāu, hōo guá khuànn tio̍h tshut-sik ê tì-huī.
Siōng-tè ê thiànn sī íng buē kái-piàn, sīm-tsì lán khuànn buē tio̍h, kám-kak buē tio̍h, I iáu-sī thiànn lán. I ê thiànn kap I ê kuân-li̍k sī pîng-tíng koh phóo-sè-sìng. I siông-siông hōo lán kám-kak bô sím-mi̍h tsìn-tián thang huann-hí, in-uī I tsai sím-mi̍h sî sī siōng hó ê sî-tsūn lâi hōo lán uân-sîng I ê kang. --- Ing-kok sìng-si lú tsok-tsiá Frances Ridley Havergal

Guá tsīng-tsīng pàng hē kang-tsok.
Tsiap-sīu tsit-tsām tsīng-hioh tsi hok.
Tsú kóng "an-hioh, tsiām-sî pàng-hē tshòng-tsok."
Kap Iâ-soo tan-to̍k tsuè-hé, guá sim huê-ìng khuài-lo̍k.

Tī I ê tshíu, guá tit an-hioh tsīng-ióng,
Hiān-tsāi ê phuà-pīnn, iā sī I kè-uē tiong,
Siông-siông lán ài kang-tsok, I khiok kiò lán an-siông,
Lán ê lōo sī uan-khiau bô bîng, I ê lōo siōng tíng siōng.

I beh uân-sîng I sóo hōo lán ê kang-tiânn,
Iáu ū tsin-tsuē tshe-sū ài ià-siān ê kha lâi kiânn,
Iáu ū tsin-tsuē tsik-jīm ài nńg-tsiánn ê tshíu lâi tann,
Hiān-tsāi, tsīu-sī thiann-thàn I bīng-līng ê sim-siann.

I hōo lán hioh-khùn ê hok-khì sī an-lîng,
Ha̍p I ê sim-ì lâi liap-tsō lán ê lîng,
I tīng I ê khò-tîng, I beh án-ni uân-sîng,
Ài tsai, I sī Tuā Sai-hū, tē it tíng.

M̄-nā kang-tsok, lán iáu ài sīu hùn-liān,
Ha̍k-si̍p sūn-ho̍k kap sīu-khóo ê tsing-tsiàn,
I ê tann sī khuài, I ê tànn sī khin,
I ê kuán-kàu sī su-iàu, it-tshè suí koh tsin,

Lán sī I ê lôo-po̍k, bô thang suán-ti̍k,
Ài lán ê tshíu īng kok tsióng kang-kū, lîng-li̍k,
Bô lūn kang-tsok á hioh-khùn, lóng ài king-li̍k,
M̄-sī tsiàu lán sim-ì, sī tsiàu I ê sìn-tik!

Thinn-pē m̄-nā thê-kiōng lán kang-tsok ê sóo-tsāi, I iā hōo lán ū hioh-khùn ê sóo-tsāi. Kám-siā I, tngg lán siān koh thiám ê sî, tshuā lán kàu khue-pinn thang hioh-khùn. Thang hioh tsi̍t-si-á kú!

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw