《台語荒漠甘泉（全羅版）》

"An-ùi lâng ê lâng"

作者 陳清俊 翻譯

listen




Tsa̍p-jī ge̍h tsa̍p ji̍t

"Gúan hi̍k-sī siū hūan-lān, sī beh tsùe lín siū an-ùi kap tit kiù ê lōo-īng; hi̍k-sī siū an-ùi, sī beh tsùe siū an-ùi ê lōo-īng; tsit ê an-ùi hōo lín ūe thun-lún kan-khóo, tsiàu gúan sóo tú-tio̍h ê tsi̍t-iūnn. Koh gúan sóo thùe lín ǹg-bāng ê sī kian-kòo, in-ūi tsai lín kì-jiân ū hūn tī tsiah ê kan-khóo, tsiū ū hūn tī an-ùi, iā sī án-ni." (II Ko-lîm-to 1:6-7)

Lí ê pîng-iú tiong sī-m̄-sī ū tsit khúan ê lâng, tng lí tú-tio̍h khùn-lân, siong-sim ê sî, ūe tshē in kóng-ūe, thiann in ê kiàn-gī. In sóo kóng, sóo thê lóng tsin sik-tòng, ná tshin-tshiūnn lí sóo su-iàu ê tsi̍t-iūnn. Nā-sī ū, lí khó-lîng bô thé-hūe tio̍h, in tsit tsióng ūe i-tī siong-sim, tshit-khì ba̍k-sái ê tsâi-lîng sī bô iông-ī tit-lâi, ài hù tsin tūa ê tāi-kè. Lí nā tiâu-tsa tsi̍t ē in ê kè-khì, lí beh huat-kiàn in sóo siū ê khóo-lān pí jīm-hô lâng khah tsūe.

In khùann-kìnn sìnn-miā ê ting bān-bān hua khì, in khùann kè hí-lo̍k ê kim-úann tī in ê kha ē kòng-phùa, úann nih ê mi̍h phùn kàu tsi̍t sì-kùe. In king-li̍k kè tūa hong-lōng, pháinn siu-sîng, tsiànn tiong-tàu tūa oo-àm, tān-sī tsiah ê lóng sī pit-iàu ê, pang-tsān in thang tsùe kái-thuat lâng thòng-khóo ê hōo-sū, i-sing kap bo̍k-su.

Tsng-múa tang-hong phang-liāu ê siunn-á, ūn-puann lâi sī tsin hùi-khì, koh tsin bān. Tsóng-sī in tsi̍t ē kàu, khong-khì tiong tsiū ū bí-biāu ê phang-bī. Siâng-khúan khóo-thàng tsin oh jím-siū, tsóng-sī tī lāi-bīn sī ún-tsông hùn-liān, tì-sik, kap bû-kiông ê ǹg-bāng. Kî-tiong múi tsi̍t hāng mi̍h, m̄-nā hōo lán li̍k-liōng, iā hōo lán sîng-si̍k, koh hōo lán ū tsâi-lîng pang-tsān pa̍t-lâng. Bo̍h-tit hûan-ló, bo̍h-tit kā-gê tshiat-khí, tsí-iàu khut-kiông kian-kuat thìng-hāu khóo-lān kè-khì. Ūann-ūe kóng, ài kuat-sim tsiàu Siōng-tè ê tsí-ì, ūi tio̍h lí kap lí tsiu-ûi ê lâng, tsīn-liōng tùi khóo-lān tiong tit lī-ik.

Thiann-tio̍h tinn-bi̍t ê kua-si,
Tshiong-múa tī tsá-khí-sî,
Kua-siann hô-tíng ê súi koh iù,
Ná un-jiû kî-tó ê khún-kiû.
Gúa tshiau-tshē tshiùnn-kua ê gûan-liāu,
Bí-biāu siann ê gûan-tiāu,
Tshē-tio̍h tsi̍t tsiah siū-siong ê tsiáu,
Hōo bû-tsîng ê tshì-á tsha̍k tiâu-tiâu.

Gúa khùann-kìnn tsi̍t ê iu-siong ê lîng,
I thòng-khóo ê si̍t kńg kiu tsīng-tsīng,
Huat-tshut hi-bāng, huann-hí kap khùai-lo̍k
Tsiok-hok tsit ê lâu ba̍k-sái ê suann-kok;
Gúa tsai sìnn-miā ê kam-tinn,
Sī tùi thòng-khóo kap siong-pi lâi sinn,
Siū tánn-kik ê lîng gîm-si,
I ê sim tsha̍k tī tshì-á nih.

Ū thiànn lí ê tsi̍t ê jîn-sū,
Sī hit-ê siū-tìng tī si̍p-jī-kè ê Kiù-tsú,
Thih-ting tìng thàu kha-tshiú pe̍h,
Tshiunn iā tsha̍k kè i hia̍p-ē,
Bô tsîng tsâm-jím pinn sut kè,
Kiù-tsú koh jím-siū lúe-mē,
I ūi lí ê kiù-sio̍k tìng si̍p-jī-kè,
I ê thâu-hia̍h tsha̍k tī tshì-á té.

Lí siū-khóo būe pûann kè Tsú sóo lim,
Lí kiám ūe huat tshut tinn-bi̍t ê siann-im?
I ê un-tián kàu-gia̍h lí īng,
Tng lí ê sim siū thòng-khóo sóo tìng,
Lí gūan-ì tsiok-hok I sóo thiànn ê sim-lîng,
Tùi lí siū siong kap thiah-tshùi ê jîn-sing.
Tshin-tshiūnn hit tsiah tshiùnn kua ê tsiáu,
I ê sim hōo tshì-á tsha̍k tiâu-tiâu?

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw