《台語荒漠甘泉（全羅版）》

"Uân-tsuân kau-thok"

作者 陳清俊 翻譯

listen

Sì ge̍h jī-tsa̍p (Sì ge̍h jī-tsa̍p ji̍t)

"M̄-sī īng kuân-sè, m̄-sī īng lîng-li̍k, tsīu-sī īng Guá ê Sîn; tse sī bān-kun ê Iâ-hô-hua kóng ê." (Sat-ka-lī-a 4:6)

Ū tsi̍t pái, guá tī tsi̍t ê tsin kiā ê suann-lōo kiânn, khuànn tio̍h tsi̍t ê tsa-poo gín-ná tī suann-kha khiâ kha-ta̍h-tshia teh peh-suann, khiâ kah tsin tshut-la̍t, koh tú-tio̍h tuì-thâu-hong teh tshe, hut-jiân ū tsi̍t-tsiah kong-tshia (streetcar) iā bān-bān teh peh-suann. Tsit ê gín-ná tsīu īng tshíu khíu-tiâu tshia ê tsi̍t ki huâinn-kuainn, lí thang tsai, tsit ê gín-ná tsīu bô su-iàu huì tsin tsuē la̍t lâi tsīunn suann lah.
Guá sīunn tio̍h "Guá ê ià-siān kap luán-jio̍k ná tshin-tshīunn hit ê gín-ná teh ta̍h kha-ta̍h-tshia, tsīunn suann ê sî, tú-tio̍h tsióng-tsióng ê huán-tuì, hōo guá tì-kàu bô khuì-la̍t. Tsóng-sī tī hū-kūn ū tsin-tuā ê pang-tsān suî tshíu thang lâi lia̍h-tio̍h, Tsīu-sī Tsú Iâ-soo ê li̍k-liōng. Guá sóo su-iàu ê, tsīu-sī kap I tsiap-tshiok sio-liân, guá sóo su-iàu īng lâi lia̍h-tiâu ê sī tshin-tshīunn sió tsíng-thâu-á ê sìn-sim. Án-ni I ê li̍k-liōng tsiânn tsuè guá ê, guá tsīu beh sîng-tsīu guá sóo bô kàu-la̍t tsuè ê sū-hōng."
Khuànn-tio̍h khiâ kha-ta̍h-tshia ê gín-ná, guá pàng-hē guá ê ià-siān, jīm-sik tio̍h tsit ê uí-tāi ê tsin-lí. --- "Khah hong-sīng ê sìnn-miā"

Uân-tsuân kau-thok

Hòng-khì ka-kī kau-thok Sìng-lîng!
Bô sioh tāi-kè, tshē-kîu I ê hong-sīng,
Tsām tn̄g sóo-ū ê tînn-puànn, soh-liân khuân-kíng,
Sái ǹg tshim-tshim tsín-kìu kap pó-síu ê tāi-lîng.

Hòng-khì ka-kī kau-thok Sìng-lîng!
Tîm lo̍h-khì, bô koh ū ka-kī, piànn kàu tshing,
Ti̍t-kàu khang-khang phuà-tshuì tī I kha-tsîng,
Tán I tshiong-muá, hōo sū-kang uân-sîng.

Uân-tsuân sūn-ho̍k Siōng-tè lâi kî-tó,
Tû-liáu I ê lōo, bô beh tshē kî-thann tsi tō,
Hòng-khì an-ia̍t an-lo̍k, suán-ti̍k I, tsuè tsì-pó,
Thiann I ê siann, Tán I ê tsí-tō.

Uân-tsuân sūn-ho̍k, bô thàn ka-kī ì-tsì,
Bô-lūn Tsiām-sî á íng-uán, lóng sī I, iā tsí sī I,
Guá ê kè-uē kap bo̍k-piau lóng siau-sit tī I ê hó-ì,
Lóng-tsóng bô, khiok sím-mi̍h lóng ū, nā-sī tiàm-tī I.

Uân-tsuân kau-thok sūn-ho̍k sī kam-tinn,
Sīu I thiànn ê sok-pa̍k, khiok ū kî-biāu tsū-îu ì-gī,
Bô tsuē ê tînn-puànn, bô kiann bô giâu-gî,
Bô-huân bô-ló, bô tāng-tànn, bô siong-pi.

Uân-tsuân kau-thok sūn-ho̍k, tinn-bi̍t an-hioh,
Thìng-hāu tī I sù-hok ê ta̍h-kha-tsio̍h,
Tán-thāi Sîn-sìng lâng-kheh lâi thiànn-sioh,
Thuàn-liān guá sim-lîng ha̍p uân-bí tshùn-tshioh.

Khuànn ah! Sìng-lîng lâi, guá tshiong-muá, sìn-ho̍k!
Tī I, guá buán-tsiok, tī I, guá uân-sîng kang-tsok,
Guá lîng ê kngg bô koh àm, tsin-tsiànn hīng-hok,
Tngg guá síu sè-iok, uân-tsuân kau-thok.


附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw