《台語荒漠甘泉（全羅版）》

"Koh-u̍ah ê kua-siann"

作者 陳清俊 翻譯

listen

Sì ge̍h jī-tshit (Sì ge̍h jī-tsa̍p-tshit ji̍t)

"Gúa bat sí, tann lí khùann, gúa sī u̍ah kàu tāi-tāi." (Khé-sī-lio̍k 1:18)

Hue! Koh-u̍ah-tsiat ê pik-ha̍p-hue! Lí bat tùi tsin-tsūe iu-siong ê lâng kóng tsit ê íng-úan koh tinn-bi̍t ê kòo-sū, tshiánn kin-á-ji̍t iā kóng hōo gúa thiann. Tshiong-múa tì-hūi tse kóo-ló ê Sìng-king! Gúa beh tha̍k "sí tsiū-sī lī-ik" (Hui-li̍p-pí 1:21) ê si-phian put-piàn ê pó-tsìng. Si-jîn! Tshiánn lí tha̍k lí hiah ê si-phian, múi tsi̍t hâng lóng sī íng-úan sìnn-miā ê hok-im. Tshiùnn-kua tsiá! Tshiánn lín koh tshiùnn hí-lo̍k ê tsàn-bí kua --- hōo gúa thiann tio̍h gúa sim-ài ê koh-u̍ah ê si-kua.
Tshiū, hue, tsiáu, hái, thinn, kap hong lóng lâi tsùe-hé khin-khin gîm tse kua, hûe-ìng i, hōo tē-kiû-siōng múi tsi̍t lia̍p gûan-tsú, múi tsi̍t lia̍p lia̍p-tsú lóng phah-phik, lâi tshiùnn lâi hô. Hōo khong-tiong tshiong-múa tse kua-siann. Gúa ài kóng tse kòo-sū, thûan koh-tsài thûan, ti̍t-kàu hi-bāng tsiânn-tsùe sìn-liām, sìn-liām piàn-tsùe khak-tshiat ê tì-sik. Lâi thûan-iông, tshin-tshiūnn Pó-lô tsi̍t-iūnn, ti̍t-kàu bīn-tùi sí-bông, sìn-sim kian-tīng, bīn huat-kng, tsin an-siông, sìng-lī ê kè-khì.

Iu-iông siong-sim ê lâng,
Kiânn-kè hûn-bōng ê sió-hāng,
Lī-khui sóo teh khùann-kòo ê bōng,
Giâ thâu ǹg thinn lâi tit hi-bāng.

M̄ sī pi-siong ê sî,
Sī koh-u̍ah pik-ha̍p-hue khui hue kî,
Lîng siū kik-tōng lâi huann-hí,
Koh-u̍ah-tsiat tsing-siann tūa tân kiò tshínn.

Nā-sī Ki-tok iáu tī hûn-bōng kann-lô,
Lán iáu-sī tsūe ê hu-lóo,
I nā bô tùi sí-lâng koh-u̍ah,
Sáng ūe hōo lâu ba̍k-sái piàn tshiùnn-kua?

Nā-sī Ki-tok sí-khì, tsiū tsin tshinn-tshám,
In-ūi I koh-u̍ah, iânn-kè sí-bông tē-tsām,
Thîng-tsí iu-siong, tsi̍t kang mā bián ai-thòng,
Tī Koh-u̍ah-tsiat, iu-khóo ing-kai bâi-tsòng. --- May Riley Smith

Tsi̍t ūi tshut-miâ ê bo̍k-su teh tsún-pī i koh-u̍ah-tsiat ê káng-tsiong, hut-jiân siūnn tio̍h "Gúa ê Tsú sī u̍ah-teh." Kik-tōng kah thiàu-khí-lâi, kiânn-lâi kiânn-khì ka-kī kóng, "Ki-tok sī u̍ah-teh, I ê sin-thé sī sio-sio, m̄-sī kan-ta í-tsîng sī, hiān-tsāi iā sī."
Ki-tok m̄-nā sī sū-si̍t, sī tsi̍t ê u̍ah-u̍ah ê sū-si̍t, I tsiū-sī koh-u̍ah-tsiat kong-hui ê tsin-lí!
Tùi tsit ê tsin-si̍t, koh-u̍ah-tsiat ê pik-ha̍p-hue tng khui ê sî, thinn-sài tsē tī múi tsi̍t ê sìn-tôo ê hûn-bōng pinn. Lán siong-sìn koh-u̍ah ê Tsú, m̄-sī kan-ta tī I ê hûn-bōng tsîng teh tsông-pài, sim-lîng iā beh ǹg kûainn lâi pài u̍ah-u̍ah ê Ki-tok. In-ūi I u̍ah-teh, lán iā beh u̍ah-teh. --- Abbott Benjamin Vaughan

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw