《台語荒漠甘泉（全羅版）》

"Hong-thai āu ê an-lîng"

作者 陳清俊 翻譯

listen
Gōo ge̍h tsa̍p-it (Gōo ge̍h tsa̍p-it ji̍t)

"Gúan king-kè tsúi-hé, Tsóng-sī Lí hōo gúan kàu pù-ū ê sóo-tsāi." (Si-phian 66:12)

Ná tshin-tshiūnn mâu-tún ê khúan, lâng ài king-kè tshiong-thu̍t liáu-āu tsiah ūe tit-tio̍h tsin-tsiànn ê an-hioh. Tùi tshiong-thut sóo tit-tio̍h ê an-hioh, m̄-sī tshin-tshiūnn hong-thai tsîng sóo kiann ê an-tsīng, sī tshin-tshiūnn hong-thai āu sóo tit-tio̍h khong-khì tshing-sin ê an-lîng.
M̄-bat tú-tio̍h iu-siong ê lâng khùann sī siū tsiok-hok ê, tsóng-sī khiok m̄-sī kian-kiông, sim-kíng an-jiân ê lâng. In ê phín-keh būe bat siū tio̍h khó-giām, ū sī liân tsi̍t tiám-tiám ê tshò-tsiat, sit-pāi iā m̄-tsai án-tsúann tùi-hù. Siōng khó-khò ê tsúi-siú, nā bô king-li̍k kè po̍k-hong po̍k-hōo ê king-li̍k, sī būe thang tit-tio̍h. Tng hong-pîng lōng-tsīng ê kiânn-tsûn, ta̍k tsióng ê tsúi-siú lóng bô būn-tê. Nā-sī tú-tio̍h po̍k-hong, tūa hong-lōng ê sî, lí kiám m̄-sī ài ū king-giām ê tsúi-siú mah? I tsai án-tsúann tô-thuat po̍k-hong, tsai tsûn-sin kap soh ê kiông-tōo, tsai án-tsúann īng tūa, tsiong tsûn an-tsûan tìng tī hái tiong.
Ah, múi tsi̍t pái thòng-khóo lâi-lîm ê sî, lán lóng bô li̍k-liōng. Lán ê hi-bōng ê ki, ná hông siū at-tsi̍h, lán ê sim ná tshiūnn phû-tô-tîn siū hong-hōo sàu lo̍h pînn, ka-kī bô la̍t thang khiā khí-lâi. Tsit sî lán ài giâ thâu gióng-bōng kóng, "sī Tsú!" (Iok-hān 21:7), sìn-sim khai-sí tsiong lán tó lo̍h-khì ê hi-bōng koh thánn khí-lâi, khînn tiâu-tiâu liâm tī Siōng-tè ê kha tsîng. Tsùe-āu ê kiat-kó sī sìn-khò, an-tsûan, kap pîng-an.

Tùi-thâu-hong phah tī gúa ê sìnn-miā,
Gúa tsit ê sió tsûn iô būe tiānn,
It-tshè kè-ūe lóng iáu būe tsiânn,
Sim-tiong ǹg-bāng piàn bô iánn.
"Jiân-āu I khiā," kóng "tiānn-tiānn"
Gúa sim tit an-ùi, bô koh kiann.

Kiann-hiânn giâu-gî ná tūa hong,
Sim-sîn tîm-tāng, bô thài-iông,
Tshūa gúa, sù gúa ū gán-kong,
Oo-àm-mî, gúa būe thang tòng.
"Jiân-āu I khí-lâi" kóng "an-siông"
I ê bīn tshiong-múa un-tián hîng-iông.

Khó-giām tsing-ka, iu-lū ke-thinn,
Sim-sîn tîm-tāng lo̍h tshim khinn,
Sún-sit it-tshè, būe thang pó-liû sím-mi̍h,
Būe thang kái-thuat gúa kau-tînn,
"Jiân-āu I peh khí," Kóng, "tsīng-khì"
Hong hái pîng-tsīng, Sī Tsú! I tsiáng-lí. --- L.S.P.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw