《台語荒漠甘泉（全羅版）》

"Ap-li̍k ê kong-hāu "

作者 陳清俊 翻譯

listen

Gōo ge̍h tsa̍p-pueh (Gōo ge̍h tsa̍p-pueh ji̍t)

"Guán sī sīu teh-tāng tsin thiám kàu tngg buē khí, liân ua̍h iā bô ǹg-bāng; … beh hōo guán bô uá-khò ka-kī, to̍k-to̍k uá-khò hōo sí-lâng koh-ua̍h ê Siōng-tè." (Ṳ Ko-lîm-to 1:8-9)

Buē nîu ê ap-li̍k kàu ki̍k,
Kiông-tuā ap-li̍k tshiau-kè guá lîng-li̍k,
Tè tī sin-thé, tī lîng-hûn, tī sim-thâu,
Kàu oo-àm-hîn, khuì buē tháu,
Tuì tuì-ti̍k lâi, tuì hó pîng-íu huat,
Ap-li̍k ka ap-li̍k, ti̍t-kàu beh sí-thuat.

Ap kàu tsai tsí-ū ǹg Siōng-tè kîu,
Ap kàu huann-hí I ê thuî I ê kuáinn lâi kiânn,
Ap kàu tsí sīunn beh tháu-khui tit tsū-îu,
Ap kàu siong-sìn bô khó-lîng ê sū uē tsiânn,
Ap kàu tsí ū uī Tsú lâi tsûn-lîu,
Ap kàu ua̍h tshut Ki-tok ê sìnn-miā.

Jîn-sing khùn-lân ê sî ê ap-li̍k hōo lán uē pó-sioh sìnn-miā. Muí pái tuì khùn-lân tshì-giām hue-hok kè-lâi, lán lóng tshin-tshīunn koh tsi̍t pái ê khai-sí, koh-khah uē pó-sioh sìnn-miā. Hōo lán koh-khah uī Siōng-tè uī jîn-luī lâi phah-piànn. Lán sóo sīu ê khùn-lân uē pang-tsān lán liáu-kái pa̍t-lâng ê khùn-lân, hōo lán lú uē pang-tsān, tông-tsîng in.
Ū lâng bô tú-tio̍h sīu-khóo, tuì khùn-khóo ê liáu-kái bô kàu, tsīu īng lí-lūn, á-sī ìng-ún lâi phue-phîng hiah-ê in-uī sīu-khóo lâi tò-thè ê lâng. Nā-sī tsi̍t ê lâng, bô-lūn tsa-poo, á-sī tsa-bóo, king-kè tuā khóo-lān liáu, lóng buē án-ni tsuè. In huán-tńg piàn tsin un-jîu khiam-pi, liáu-kái khóo-lān ê ì-gī. Pó-lô kóng, “Án-ni sí ê la̍t teh kiânn tī guán” (Ṳ Ko-lîm-to 4:12) tsīu-sī tsit ê ì-sù.
Khó-giām kap kan-lân tshui lán hiòng tsîng kiânn. Khóo-lān tshin-tshīunn tsing-khì-ki ê lôo-hé beh thui-tōng khí-lûn, tài-tōng ki-khì tín-tāng, hōo tsûn uē bīn-tuì hong-íng sái-kè tuā hái-iông. --- A. B. Simpson

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw