《台語荒漠甘泉（全羅版）》

"Sìn-khò Iâ-soo tsin-tsiànn tinn-bi̍t"

作者 陳清俊 翻譯

listen


La̍k ge̍h tshue-it (La̍k ge̍h it ji̍t)

"I bat tuì in kóng, Tsit-ê tsīu-sī an-hioh , lín tio̍h hōo ià-siān ê lâng tit-tio̍h an-hioh ; koh kóng, Tsit-ê tsīu-sī khuìnn-ua̍h; tsóng-sī in m̄-khíng thiann." (Í-sài-a 28:12)

Lí uī-sím-mi̍h huân-ló? Huân-ló ū sím-mi̍h lōo-īng? Lí sī tī tsi̍t-tsiah tuā tsûn tíng, lí buē thang ka-kī sái-tsûn, liân khíu phâng ê hūn iā bô, tsóng-sī khiok siông-siông huân-ló, tshin-tshīunn lí teh sái-tsûn, ná tshin-tshīunn lí sī tsûn-tíunn, ài-tsai, tsûn-tíunn sī Siōng-tè. Lîng-hûn ah, ài an-tsīng, Siōng-tè sī tsú-lâng!
Lí ê sing-ua̍h tuā jiáu-tōng koh suan-huâ, kiám uē tsìng-bîng Siōng-tè í-king lī-khui I ê pó-tsō mah? I pīng bô án-ni. I ê bé tsīn-la̍t hiòng-tsîng pun-pháu, I ê tshia ná hong-thai kín-kín teh kiânn, tsóng-sī bé ū bé-li̍k-soh, Siōng-tè the̍h tī tshíu ni̍h, Siōng-tè tsiàu I ê ì-sù sái tshia!
Lán ê Siōng-tè Iâ-hô-hua sī Tsú-tsáinn! Siong-sìn I, lí uē pîng-an. “M̄ bián kiann.” (Má-thài 14:27). --- Tsarles H. Spurgeon

Guá ê lîng ah, kim-àm an-tsīng hioh-khùn,
Hong-thai sàu tī Siōng-tè tuā-tsûn,
Sī Siōng-tè ê tsûn, m̄-sī lí ê, an-sim khùn.

Guá ê lîng ah, kim-àm an-tsīng hioh-khùn,
Siōng-tè ê tshíu tsóo-tsí môo-kuí tsìn-kun,
Sī Siōng-tè ê tshíu, m̄-sī lí ê, an-sim khùn.

Guá ê lîng ah, kim-àm an-tsīng hioh-khùn,
Àm-mî tiong, Siōng-tè ê thiànn kiông koh ún,
Ū Siōng-tè ê thiànn, m̄-sī lí, an-sim khùn.

Guá ê lîng ah, kim-àm an-tsīng hioh-khùn,
Siōng-tè an-uì siong-sim thî-khàu ê jîn-kûn,
Sī Siōng-tè teh an-uì, m̄-sī lí, an-sim khùn.

Guá khǹg lín m̄-thang hue-sim, sit-bāng. Hue-sim khut-ho̍k sī tsin tuā ê íu-hi̍k, in-uī tuì-ti̍k tsiong hue-sim pau-tsong kah tsin suí, khuànn buē tshut i ê guî-hiám. Bô-bāng hōo lán ê sim koo-ta, hōo lán kám-kak buē tio̍h Siōng-tè ê tsiok-hok kap un-tián, hōo lán siunn khuànn-tāng gi̍k-kíng, tāng-tànn ná tshin-tshīunn siunn tāng pē buē khí. Tsóng-sī Siōng-tè tuì lí ê kè-uē kap si̍t-si sī tuā tì-huī bô pí. --- Madame Guyon

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw