《台語荒漠甘泉（全羅版）》

"Kàng hōo, sù hok"

作者 陳清俊 翻譯

listen

La̍k ge̍h tsa̍p-gōo (La̍k ge̍h tsa̍p-gōo ji̍t)

"Siōng-tè hōo guá tī guá sīu-khóo ê tuē-hngg hing-ōng." (Tshòng-sè-kì 41:52)

Tsi̍t uī si-jîn khiā tī I ê thang-á tsîng teh khuànn guā-bīn teh lo̍h sai-pak-hōo, sī tsin tuā hōo, lo̍h kàu tsin lī-hāi. Tsóng-sī si-jîn sóo khuànn ê, m̄-sī kan-ta tsi̍t tsūn hōo nā-tiānn, i khuànn tio̍h sīu hōo lūn-ti̍k ê thóo-tē huat-tshut kok-tsióng ê hue-luí, tsuân-tē tshiong-muá suí kap phang-bī. I gîm kóng,

Lo̍h ê m̄-sī hōo, sī tsuí-sian-hue,
Muí-tih hōo tih tī suann-phiânn, khuànn-tio̍h tsi̍t tuā phiàn iá-hue,
Oo-hûn tà lâi, jia-khàm tsuân-tshī thong-kue,
Lo̍h ê m̄-sī hōo, sī muî-kuì hue.

Tsuè Siōng-tè ê kiánn-jî, khó-lîng tú-teh sīu tio̍h tshì-liān, tuì Siōng-tè kóng, “Siōng-tè ah, kin-mî lo̍h tsiah tuā ê hōo, tshiau-kè guá sóo uē jím-sīu ê. Tsiong guá ê kè-uē tshiong khì, guá sit-bāng, thiat-té sit-pāi. Guá phī-phī-tshuah ê sim sīu ki̍k-tuā ê thòng-khóo, ai-siong. Khóo-thàng ê hōo, tāng-tāng phah tī guá ê lîng.”
Pîng-íu, lí uân-tsuân gōo-kái lah! Siōng-tè bô īng hōo lâi phah lí, sī kàng hōo sù hok-khì. Siong-sìn Siōng-tè ê uē, lí beh tsai, tuā hōo tiong, sī uē tshut-hiān sio̍k-lîng ê hue-luí. Tsiah ê hue pí lí tī bô hong bô hōo ê sìnn-miā sóo khui ê hue khah phang khah suí.
Tngg lí khuànn-kìnn hōo, lí kiám ū khuànn tio̍h hue mah? Tsiah ê khó-giām teh hōo lí sīu-khóo, lí kiám tsai, tī lí ê jîn-sing tiong ū bí-lē sìn-sim ê hue uē tshut-hiān. Lí sīunn beh siám-pī thòng-khóo, Siōng-tè sóo khuànn-tio̍h ê sī tuì lí ê lîng beh ū tông-tsîng, un-jîu ê sim huat-sing. Ki̍k-tuā ê siong-pi khóo-lān hōo lí ê sim kiu-thè, tān-sī Siōng-tè beh hōo lí ê sìnn-miā koh-khah hong-sīng.
Pîng-íu, m̄-sī! Hiòng lí lo̍h ê hōo m̄-sī thòng-khóo, sī un-jîu, thiànn-thàng, tông-tsîng, un-tsû, jím-nāi, tíng-tíng Sìng-lîng sóo sinn ê tsióng-tsióng hue-luí kap ké-tsí. Lí sìnn-miā ê lîng sóo tit tio̍h ê hong-hù, tī sè-kan it-tshè an-i̍k tiong sī buē thang sán-sing ê. --- J.M.M.

Po̍k-hong-hōo ê kua-si

Khiā-khîm tī khong-khì tiong pîng-tsīng,
Ji̍t-kngg lo̍h tī tshing-tshing phang-hue tíng,
Koo-to̍k lú-kheh Iu-lū tîng-tîng,
Thàu-tsá kàu àm teh tsiàn-tsing,
Tuì bô-kua ê khîm-hiân sīunn beh huat-tshut gua̍t-sing,
Tuânn koh tuânn iā bô huán-ìng,
Ti̍t kàu kiông-hong po̍k-hōo luî-tân bô thîng,
Tsú ê tshíu huānn tī po̍k-hong bīn-tsîng,
Huàn-tshínn liáu bí-biāu im-ūn,
Kiông-hong ná tsiàn-sū khí hing-hùn,
Huat-tshut sìng-lī ióng-kám ê hō-kak,
Hong-hōo tshìunn tshut Siōng-tè thiànn ê im-ga̍k.


附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw