《台語荒漠甘泉（全羅版）》

"Sìng-kiat, tsiânn-sìng"

作者 陳清俊 翻譯

listen





Tsa̍p-jī ge̍h tsa̍p-tshit ji̍t

"Gūan pîng-an ê Siōng-tè ka-kī hōo lín it-tsīn tsiânn-sìng; koh gūan lín ê sîn kap hûn í-ki̍p sing-khu tī lán ê Tsú Iâ-soo Ki-tok koh-lâi ê sî, lóng tit-tio̍h pó-tsûan, bô thang hiâm. Tiàu lín ê sī sìn-si̍t, I iā beh tsiânn i." (I Thiap-sat-lô-nî-ka 5:23-24)

Gúa tha̍k kè, "nā m̄ sī sìng bô lâng ūe kìnn-tio̍h Tsú," kúi-nā nî liáu-āu, gúa khai-sí tsiàu tsit ê tsin-lí lâi kiânn, iā kóo-lē hiah ê thiann tsit ê ūe beh án-ni tsùe ê lâng. Tsa̍p nî kè liáu-āu, Siōng-tè hōo gúa koh-khah bîng-pi̍k án-tsúann tit-tio̍h sìng-kiat ê hong-huat, tsiū-sī tsià-tio̍h tùi Siōng-tè ê kiánn ê sìn-sim. Gúa khai-sí kap lâng hun-hióng, "lán tùi tsūe-ok tiong siū tsín-kiù tshut-lâi, sìn-sim hōo lán tsiânn tsùe sìng-kiat." Tī su-jîn tiûnn-ha̍p, tī kong-khai tiûnn-sóo, tī bûn-jī-siōng, lóng ūi tse tsùe kiàn-tsìng. Siōng-tè iā īng tsiânn pah tsiânn tshing ê kiàn-tsìng-jîn lâi khak-jīm. Gúa hiān-tsāi kè-sio̍k put-tūan suan-iông tsit ê tō-lí í-king ū sann-tsa̍p gūa nî, Siōng-tè iā kè-sio̍k khak-jīm gúa ê kang-tsok. --- John Wesley tī 1771 nî siá

Gúa jīn-bat Iâ-soo, I tùi gúa tsin pó-kùi, put-kò gúa huat-hiān gúa ê lāi-sim tshim-tshim ê ūi ū tsi̍t-kúa mi̍h hōo gúa būe thang pó-tshî huann-hí, jím-nāi kap jîn-tsû. Gúa tsīn-la̍t lâi ap-tsè tsiah ê mi̍h, tsóng-sī in iáu sī tsûn-tsāi ti sim lāi. Tsùe-āu gúa ǹg Iâ-soo kiû pang-tsān, tng gúa tsiong gúa ê ì-tsì kau hōo I, I tsìn-ji̍p gúa ê sim, tsiong sóo-ū hiah ê bô huann-hí, jím-nāi, kap jîn-tsû ê mi̍h tsûan-pōo tshing-tû, jiân-āu I tsiong mn̂g kuainn khí-lâi. --- George Fox

Tsiū tī tsit ê sî, tī gúa tsiap-siū Siōng-tè liáu-āu, gúa kui ê sim bô koh tshùi-ta. Gúa tan-to̍k kap I tī-teh, I tshiong-múa gúa ê múi tsi̍t ê khang-hi. Tû-liáu I, gúa bô sím-mi̍h gūan-bōng, su-kiû, á-sī ì-tsì. I tsiong gúa ê siang-kha hē tī I khuan-khuah ê pâng-king nih, gúa sim tsûn kìng-ùi, I īng I ê tūa-thiànn tsing-ho̍k liáu gúa ê sim, hōo gúa tūa tio̍h-kiann. --- Lady Huntington

Tu̍t-jiân gúa kám-kak ū tsi̍t ki tshiú, m̄-sī nńg-tsiánn, sī tsûan-lîng ê tshiú, m̄-sī siū-khì sī tsû-ài ê tshiú hē tī gúa ê thâu-hia̍h. Gūa-tsāi ê kám-kak bô tshin-tshiūnn lūe-tsāi ê kám-kak hiah tūa, hiah kiông-lia̍t. Hit ki tshiú tsìn-ji̍p gúa thâu-khak, koh ji̍p gúa sim, ū sìng-kiat tû tsūe ê lîng-li̍k. In-ūi tsit ê la̍t, gúa phak lo̍h tē, kiann koh huann-hí, gúa tūa-tūa-siann huah tshut-lâi. Hit ki tshiú kè-sio̍k tī gúa ê sin-thé lāi-gūa kang-tsok, i súa kàu tó-ūi, tsiū tī hia lâu Kiù-tsú îng-iāu lîng-li̍k ê ìn-kì. Siōng-tè ê thiànn tshin-tshiūnn hái-iûnn im-ba̍t, thun-bia̍t gúa ū kúi-nā hun-tsing ê sî-kan, hit ê íng, hit ê tô kún kè, tshiong tī gúa ê tíng-bīn tsi̍t-iūnn. --- Hamline Tsú-kàu

Gúa tùi sìng-kiat ê khùann-huat siá khí-lâi sī án-ni: Sìng-kiat tùi gúa ū tinn-tinn, an-siông, huann-hí, khó-ài, tshing-thiat ê sìng-tsit. Tsiah-ê tùa hōo sim-lîng tsi̍t-tsióng bô-huat piáu-ta̍t ê sûn-kiat, kong-hui, pîng-an, ki̍k-tūa ê hí-lo̍k. Ūann ūe kóng, sìng-kiat hōo sim-lîng tshin-tshiūnn Siōng-tè ê hn̂g, á-sī tshân, sinn tshut kok tsióng hó koh súi ê hue kap tsúi-kó, tī hia, lâng-lâng ài, kap sè-kài hûan-tsa̍p keh-khui, hióng-siū tsi̍t tsióng kam-tinn lîng-tsīng, jiû-hô sin-sian ê ji̍t-kng. --- Jonathan Edwards

Thiànn ê tūa-tsúi sàu ji̍p tshim-tshim sim-té,
Hōo su-sióng, ǹg-bāng kap kám-kak lóng tshing-pe̍h,
Ûan-tsûan ê kiù-un! Ûan-tsûan ê kiù-sè!
Kiù tshut tsūe ê kè-hūan kap kûan-sè.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw