《台語荒漠甘泉(全羅版)》

| | | 轉寄

"Sìn-jīm Siōng-tè ê ìng-ún"

listen

Tshit ge̍h tsa̍p-saⁿ (Tshit ge̍h tsa̍p-saⁿ ji̍t)

"Tsiàu só͘ kì-tsài kóng, Guá siat-li̍p lí tsuè tsuē-tsuē pang-kok ê pē." (Lô-má 4:17)

Tsit ê king-bûn sī sím-mi̍h ì-sù? Tsiū-sī A-pik-la̍h-hán tī bô thang ǹg-bāng ê tiong-kan, tuì ǹg-bāng lâi sìn (Lô-má 4:18) A-pik-la̍h-hán nî-kí hiah nih tuā, tsiàu siông-sik, beh siⁿ kiáⁿ sī tsin bô khó-lîng, sī tsin hong-tông ê sū. Tsóng-sī Siōng-tè tī só͘ ìng-ún iáu buē si̍t-hiān í-tsîng, tsiū tshing i tsuè “tsuē-tsuē kok ê pē.” (Tshòng-sè-kì 17:4) A-pik-la̍h-hán siong-sìn ka-kī uē tsuè lāu-pē, in-uī Siōng-tè án-ni kóng kè. Tse sī tsin-tsiàⁿ ê sìn-sim, siong-sìn koh suan-pò͘ Siōng-tè só͘ kóng ê, ta̍h ji̍p tī khuàⁿ sī khang-khang bô mi̍h ê só͘-tsāi, khiok huat-kiàn kha ē sī kiat-kiat si̍t-si̍t ê tsio̍h-puâⁿ.

Só͘-í thang tuā-táⁿ suan-pò͘ Siōng-tè kóng lí tsiong-lâi beh ū ê. I uē sîng-tsiū lí só͘ sìn ê. Put-kò it-tīng hián-bîng tsin-tsiàⁿ ê sìn-sim, koh tsiong kui-ê lâng kau-thok I. --- tuì “Iù-sut-á”

Lán pit-su guān-ì khò sìn-sim sing-ua̍h, bô hi-bāng siūⁿ beh kè pa̍t-tsióng ê sing-ua̍h hong-sik. Lán pit-su guān-ì hō͘ tsiu-uî ê ting-hé long hua khì, thiⁿ-tíng ê muí tsi̍t lia̍p tshiⁿ iā lóng bô kng, sing-ua̍h tī uân-tsuân o͘-àm guî-hiám ê pau-uî tiong. Tio̍h, lán pit-su guān-ì án-ni tsuè, Siōng-tè uē tī lán ê sim-lîng lāi hō͘ sìn-sim ê ting-hé tiám to̍h khí-lâi. --- Thomas C. Upham

Tng lí tuì huâi-gî ê tshiū-ki tíng thiàu lo̍h-khì, lī-khui lí só͘ kám-kak an-tsuân ê siū, sìn-jīm sìn-sim ê si̍t, tshin-tshiūⁿ suè-tsiah tsiáu-á iáu-buē tshì-kè i ê si̍t-kó͘ tsi̍t-iūⁿ. Tāi-sing khó-lîng kám-kak uē siak lo̍h-khì tē-bīn, suè-suè ê tsiáu-á iā ū tsit tsióng ê kám-kak, tān-sī i pīng bô siak lo̍h-khì, in-uī ū si̍t lâi tsi-tshî i, sīm-tsì ká-sú i ê si̍t-kó͘ sit-hāu, bô kàu la̍t, tuā-tsiah tsiáu-á uē pe tī i ê ē-bīn kā i hû khí-lâi, hō͘ i buē siak lo̍h tē.

Siōng-tè iā uē án-ni kiù lí, tsí-iàu sìn-jīm I tsiū hó, in-uī I ê “tsiàⁿ-tshiú hû-tshî” lí. (Si-phian 18:35) Lí beh ka-kī mn̄g “guá sī-m̄-sī ta̍h-ji̍p tī bô-mi̍h ê tiong-kan” mah? Tse iā sī suè-tsiah tsiáu-á beh mn̄g ê. Lán tsai ū khong-khì tsûn-tsāi, khong-khì khuàⁿ khí-lâi ná bô si̍t-thé, bô mi̍h. Siâng-khuán, lí tsai ū Siōng-tè ê ìng-ún tī-teh, tsiah ê ìng-ún tong-jiân m̄-sī khang-hu ê. Lí kiám iáu uē kóng, “Hit ê li̍k-liōng bô khó-lîng tsi-tshî guá hit ê khó-lîn ê lîng-hûn.” Kiám kóng Siōng-tè kóng-kè ê, I buē tsi-tshî mah? “Lí siūⁿ lí iông-ī khut-ho̍k ê pún-sìng kiám uē tī tsing-tsiàn tiong tit-tio̍h sìng-lī mah?” Siōng-tè kiám ū án-ni kóng-kè mah? “Guá kiaⁿ-hiâⁿ ê sim kiám uē tit-tio̍h an-lîng mah?” Siōng-tè kiám ū án-ni kóng-kè mah?

Nā-sī Siōng-tè khak-si̍t ū án-ni kóng-kè, lí tong-jiân buē kóng I uē kóng pe̍h-tsha̍t. Nā-sī I kóng-kè, I kiám tsuè buē kàu mah? Nā-sī I tap-ìng lí, khíng-tīng hō͘ lí ê ìng-ún, lí bián huâi-gî, lí thang tsua̍t-tuì siong-sìn. Lí ū I ê ìng-ún, si̍t-tsè-siōng lí só͘ tit ê ìng-ún ū koh-khah tsuē, tsiū-sī lí iáu-ū tit-tio̍h hit-uī kian-tīng kóng-tshut tse ìng-ún ê Siōng-tè.

Tsú kóng, “guá si̍t-tsāi kā lín kóng”, (Lō͘-ka 12:5) siong-sìn I! --- J.B. Figgis

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com