《台文通訊精選》

| | | 轉寄

買田看田底,娶某看娘lé

「買田看田底,娶某看娘lé」是一句真有教育性ê台灣俗語。台灣人常常用這句話來教示kiáⁿ孫後代,處世待人對事應該有ê準則kap態度。

是按怎買田tio̍h-ài注意看田底?因為若是好田底tō有利種作,會tàng好收成。所以若beh買田,往往tio̍h揀土質好、無沙石、khah有肥份、水量充足ê田地,平平勞力耕作,應該有khah好ê收成。

娶某是按怎tio̍h-ài看娘lé?因為查某kiáⁿ kap家己ê老母上蓋親近,這個查某gín-á tī老母養育下,人格形成ê過程中受老母ê影響上蓋深遠,所以台灣人認為這個真賢慧koh曉理,做人有好表現ê母親,娶伊ê查某kiáⁿ做家後,一定bē m̄-tio̍h。

這句俗語對字句表面解說大概是這款意思,可能mā會hō͘人感覺是tuì男性做中心ê想法。其實會tàng拆開性別,擴大引用,對tsē tsē問題用仝款模式思考以後,會tàng tshuē出最好ê答案。

作穡人辛辛苦苦,將秧(ng)á播tī田底,一khu田最好是一khu好田底ê田。好田底ê田才會有利耕作,自然mā會tàng期待好ê收成。生理人若beh去中國投資,代先tio̍h考慮中國官敢會khà油食錢、貪污歪哥,中國人敢會信用tìt。一定tio̍h-ài研究調查中國是m̄是一個有利投資ê環境。好ê投資環境應該是司法獨立公正、尊重人權、治安良好、言論自由、政治民主,勞動市場穩定素質優良,金融制度、市場機制健全運作,整個環境有利投資行為。「買田看田底」,若beh去中國投資,tio̍h-ài先瞭解確定中國是m̄是一個有利投資ê好田底。

台灣tī 12月初beh舉行立委kap縣市長ê改選,台灣選民tio̍h-ài先思考了解,選啥物人才是選tio̍h人。一個候選人ê學識能力當然是重要,koh khah重要ê是這個候選人ê出身背景、文化認同,心思意念是m̄是疼台灣。「娶某tio̍h-ai看娘lé」 lah。前擺台北市長選舉前,馬英九先生家己講:「不知為誰而戰」。馬先生tī台á頂對李前總統講:「報告主席,哇(uá)是lim台灣水,食台灣米大漢ê台灣人lah。」自稱台灣人卻m̄知為台灣而戰。後來伊ê老爸對伊講,為著會tàng將台灣保持tī中國ê內面,一定tio̍h出來參選,伊才決定參選台北市長。真tsē選民無檢驗馬先生ê出身家庭背景、政治理念、意識形態,tō將神聖ê一票投hō͘伊,最後當選做台北市長。

馬先生就任後,漸漸暴露伊ê真面目,伊聯中反台灣,phí-siùⁿ本土文化,任命龍應台做文化局長,專門tī台灣發揚中華文化。阿扁當選總統以後,tī各種場合故意對立,處處為難,根本無beh尊重國家元首、行政體制,公開侮辱總統講,甘願tī市政府辦公室掛in某ê相片,mā m̄掛陳總統ê相片。這擺風颱台北做大水,馬市長甘願台北市淹水,致使市民受著生命財產ê嚴重損失,mā m̄向中央報告求援協助救災,親像kā台北市拚入中國,成做中國ê一部份。

今年12月初台灣beh選舉,大家tio̍h好好會記得「買田看田底,娶某看娘lé」這句俗語,仙mā m̄ thang選出親像馬英九這款中國人做台灣任何行政首長,因為一個行政首長若心無台灣、只有中國,無beh認同疼惜台灣,時時刻刻teh聯中反台,中國m̄免「武力解決台灣」tō會tàng併吞台灣,台灣人tō koh一擺做人ê奴隸,kiáⁿ kiáⁿ孫孫永遠bē tàng出頭天。