《台文通訊精選》

 | | | 轉寄

蟬á聲

作者 胡民祥 2006.07.30

啊，蟬á叫ê聲。

Tuì二樓ê窗á傳入來，m̄知伊是歇tī tó位，是tī青翠lò lò ê楓樹，抑是kuân kah beh達天ê碎葉樹，抑是koh khah遠ê一大片ê青松。

風吹微微，為何，短短急急三聲tō停去。敢是我teh做夢？M̄-koh，白日夢是無可能lah。

北美洲ê蟬á難得叫，至少，阮賓州西旁ê山河林鄉ê蟬á，就是按呢，m̄肯展喉獻聲長叫。雖然罕得叫，叫著koh急koh短，總是攏會引來思鄉ê情緒。

阮嘉南平原故鄉ê蟬á，in上愛貼tī苦楝樹，抑是檨á叢，叫規個熱天。今年五月中旬，我轉去探訪父母，轉去到曾文溪岸ê胡厝寮。我有一工，行落曾文溪埔ê田園，尋tshuē童年牽牛食草ê夢，行到麻善大橋ê南旁橋頭。橋頭有一個部落叫做溪底寮，有十thóng戶ê人家厝。

Beh入庄頭ê路邊一排ê檨á樹，續落去是一簇一簇ê竹抱。我khiā tī檨á腳，風一陣一陣吹過來，蟬á直直叫，一聲過一聲，hō͘阮流浪海外ê遊子，聽kah神神，時光轉向童年。

Gín-á時代，用竹篙粘點á膠，掠苦楝樹ê蟬á。Khah gâu ê gín-á，用棕簑絲拍活結，縛tī竹篙尾溜，kap蟬á鬥智慧。棕簑絲幼koh細，蟬á m̄知是陷阱，伸腳爪kap絲線爽tshit-thô。想bē到，一時大地動，suah kap竹篙做伙lak落地面，去hō͘ gín-á掠去。

蟬á聲。我想beh聽台北林口「竹林山寺」ê蟬á ê蟬聲；茶園邊相思樹ê蟬á ê叫聲；陳文成童年ê蟬á聲。

十二年前，文成離開賓西山河之鄉，轉去台灣探親，枉死母校台大蕃薯園，就是蟬á叫天ê季節。

聽著蟬á ê叫聲，阮tio̍h會想起伊，想起tī熱天ê時，替同鄉會募款，阮做伙tī水邊公園，賣台灣菜丸á ê往事。若像故鄉ê蟬á直直叫，伊攏bē thiám。直直叫人客，來買菜丸á。

聽著蟬á叫天，阮就會懷念故鄉，阮就會想起文成。