《台文通訊精選》

| | | 轉寄

癭á

若是bat tī台灣tuà過ê人,加減攏bat生過粒á,有ê大,有ê細,有ê紅紅腫腫無膿,兩三工就無代誌,總是,你m̄知bat聽過癭á無?Tse是我tī高二hit年發生ê代誌。

Hit年ê熱天,有一日,tī洗身軀ê時,發現腹肚邊,有生一粒粒á。當時,感覺紅紅tsiūⁿ(癢) tsiūⁿ,也無特別掛意。嘴同嘴kā媽媽講,媽媽有六個kiáⁿ,平時對我huah疼huah酸;常常褒so(搓)一下就好ah;無想著,伊看了後,隨時tshuā我去民生西路口,tshuē田仙。田仙是一間tī民間開業ê漢醫,差不多阮民生西路矮厝莊á人ê腫瘤、粒á,攏用伊ê膏藥,貼(tah)貼leh就好。普通時,伊ê生理真ka-ia̍h,若是普通粒á,大約攏是看看一兩擺,就叫你the̍h藥膏轉去貼貼leh,幾工了後,就好kah離離。 總是,伊第一擺看著我ê細粒粒á ê時,伊kap媽媽講:「Tse若準m̄是普通粒á,m̄-koh,幾工了後,我就會知,你這貼膏藥the̍h轉去貼看māi…。 」我就照田仙ê吩咐,乖乖就將膏藥貼tī腹肚邊ê粒á頂面。

兩工了後,我發現粒á已經漲大,比膏藥koh khah大,去hō͘田仙koh換藥ê時,伊用koh khah大ê膏藥貼tī粒á頂,真稀罕ê,並無半點膿,也無看著白頭。田仙講: 「Tse是癭(ing)á,你ài khah忍耐淡薄,ài每三工來換膏藥,一直到看著膿頭走出來,tsik出來了後才會好。」田仙是阮莊頭上蓋受尊重ê草藥醫,伊看過ê症頭bē算得tsē ;所以雖然hit時升學ê壓力真大,補習、自習一大堆,總是去田仙hia換膏藥ê代誌,攏m̄敢tshìn-tshái馬馬虎虎。

就按呢,過了大約三禮拜外,hit粒ná紅豆á ê粒á,已經漲kah差不多有一粒柳丁ê大癭á。天氣koh熱,功課也tsē,猶koh ài細膩無beh hō͘人動著hit個疼ê所在,有時感覺真tshiah-ia̍h,也正正就是tī hit個上tshiah-ia̍h ê暗暝,田仙tī拍開膏藥,看我ê癭á ê時,雄雄puh一句:「膿頭看著lah,koh兩三工,大概就會發出來lah,khah細膩leh。」 然後,koh用酒精消毒,照常換一塊上大ê膏藥。兩工了後,洗身軀suah,突然感覺癭a2e5所在,癢癢溼溼,媽媽就隨時用酒精tī四邊消毒,然後,就將膏藥拆開,hit時陣,累積tī癭á內ê膿就慢慢á tsi̍k出來。Hit暗,tsik出來ê膿,差不多有七分半碗頭á hiah tsē,小弟小妹攏tī邊a看kah目睭青kìm-kìm;敏感ê二妹真m̄甘問我:「會疼bē?」因為,膿實在tsē kah驚人。上稀罕ê是;經過hit段ê診療,我tī這個時陣,反倒轉,規身軀輕鬆起來,因為,我感覺我體內ê lah-sap 、毒素攏總透放出來,所以,bē疼,一點á to bē疼。顛倒,是tī接受治療,tī puh 膿頭ê hit段時間,真鬱悶,真tshiah-ia̍h,到tsit-má為止,我若想著,就感慨無限,整個過程m̄免開刀、手術,而且以後無koh再發,kan-na tī 腹肚邊有一個細細ê疤。

最近,看著新政府就任,所遇著重重疊疊ê代誌,我突然覺悟,咱台灣,經過半世紀國民黨ê統治,是已經親像生了潛伏未發ê癭á,新政府tī治療貼膏藥,引出病源ê階段,常常受誤會,別人ê粒á兩三貼膏藥就好溜溜,你治tsiah-ni̍h久,一定是醫術無高明,suah m̄知影,斬草ài斷根,治癭á ài引出膿頭,按呢,才會藥到病除,惡膿盡出, 規個身軀得著根本ê,永遠ê治療。