《田岡良食筆尾》

| | | 轉寄

海漲人食罪?

Beh 正式上課進前,T 開講話仙,講著東京都知事石原慎太郎對日本地動 kap 海漲 ê 發言,石原提起著日本人道德崩敗,包括老長壽 ê 囝兒 sī 細隱瞞爸母過身,來 sia̍p 養老年金就有幾若百件 hiah 濟,毋 tsiah 石原認為海漲是 beh 洗蕩日本人 ê 罪惡。

H 反對 tsit –ê講法,伊講,就準海漲 hām 地動是為著 beh 洗盪罪惡,毋過 he 災厄究真無生目睭,失德者可能無拍 khih 角,顛倒是濟濟無辜 ê 人或是著傷或是無命,T 自按呢用「共業」來回應,講:就 ná 親像制度頂懸有所謂總統國務機要費 ê 問題,無分是啥人,攏 tio̍h 做伙承擔。

Kài 心適 ê 一點是:T kap H 攏是基督徒。

轉--來了後,斟酌 kā 想,深深感覺 hit 款 kā 苦厄當做有特殊目的 ê 言論,窮實 tsiâu 不止仔危險。以基督教 ê 信仰來講,表面上,舊約 ê 神 ká-ná 是一個取「族群/民族」做賞罰寸尺 ê 神,伊揀選以色列族,嘛定定愛以色列人 tī 戰爭 ê 中間,將某一個族群全滅(例:撒母耳記上 15 章);相對舊約,新約內底 ê 神 ná 親像是 kā 眼光 hē 來踮個人身軀頂,揀選 ê 限界,嘛無閣取某 mih 族群來做區別,上帝看待個人有 hiah-nī 仔點 tîn,耶穌是以有 kah 逐枝頭毛來比論--ê(馬太福音 10 章 30 節);總--是,tsit 款舊約/新約 ê 分界,嘛毋是絕對,以舊約來講,猶原 ē-tàng 看著上帝對個人 ê 注目,比論:上帝對以諾、挪亞、亞伯拉罕、以撒、約伯 hām 大衛等等個別施恩典,甚至當上帝決定 beh kā 所多瑪城無分男婦老幼一盡剿滅 ê 時,伊也 àⁿ 耳聽亞伯拉罕 ê 祈求,為著內底 he 少數 ê 好人,無 beh 無分無會總thâi(創世記 18 章),uì tsit-ê角度來看,beh 講基督教 ê 上帝,是一個因為罪惡,見烏著 tak ê 主宰者,ká-ná 嘛無足正確。

當然,聖經本身就是 kài 矛盾--ê,也因為按呢,無贊成頂懸看法 ê 人,永永有才調舉出濟濟反例(比論:做大水將世界毀滅,kám 講挪亞一家伙仔以外就攏無好人?)關係 tse,我無話 thang 說。

我想 beh 講--ê kan-taⁿ 是:設使人若相信大自然 kap 萬項 mi̍h ê 後壁,有某一種意向或者是規則 teh 運作,按呢,上好是相信 hit-ê意向 ê 主體 ia̍h 規則 ê 內容,是直透善良、全全平正、萬項攏知--ê,任何有神論 ia̍h 因果論者,若對 tsit-ê基本假設來 pué 喙,恐驚仔攏無法度 phiah 免虛無主義來 tak 纏,咱 kā 想,若 tsit 世間根本無最後 ê 一條限界,嘛無啥 mih 究極 ê 道理,一切,tsiâu 是自然 tik、隨機 ê 運作,或者是講,有破 phà ê 運作,按呢生,tsit 號信仰,是 beh 按怎 ē-tàng 完全對無神論者、唯物論者 ê 學說來走閃?無神論者 ia̍h 是唯物論者 in 有 in 家己 ê 思想體系,包括個人 kiau 群體倫理,hām 究極 ê 理路,若是咱所有--ê,獨獨是一個加加減減 ē 濫sam刣人 ê 主宰者,按呢,hām 自底就無 tsit 號主宰,到底是有偌濟精差?

我真懷疑,hit 款「罪惡 saⁿ-kap 承擔」、「群體內底 ê 無辜者受害 mā thang 看做是 beh 為群體洗蕩罪惡」ê 思想,事實上,是一款古代部落封閉社會 ê 思想喙殘(個人 kan-taⁿ 是群體 ê ke-si;用人來做祭 mi̍h 等等),若是 tsit-ê推 (tshui) 論無毋著,就莫怪 tsit 號集體性 ê 脈絡 hē 踮現此時個人主義 ê 思考 ē 跤,ē hō͘ 人感覺嶄然仔離經、荒譀--ah。