《押韻啟應詩篇》

 | | | 轉寄

台語押韻啟應詩篇 101

作者 Tīⁿ Jî-gio̍k 2008.01.21

101　　Tāi-pi̍t ê si.

1a　Guá beh tshiùⁿ tsû-ài kap kong-pîng ê kua;
　　我 要 唱 慈 愛 及 公 平 的 歌；

1b　　　Iâ-hô-hua ah, guá beh ǹg Lí tshiùⁿ o -ló ê kua.
　　　　耶 和 華 啊，我 要 向 你 唱 讚 美 的 歌。

2a　Guá beh īng tì-huī kiâⁿ tī uân-tsuân ê lō͘ ;
　　我 要 用 智 慧 行 在 完 全 的 路；

2b　　　Lí beh siáⁿ-sî kàu guá tsia khuàⁿ-kò͘ ?
　　　　你 要 甚 時 到 我 此 看 顧？
　　　　Guá beh īng tshing-khì ê sim kiâⁿ tī guá tshù-lāi ê tuē-pho͘. 　　
　　　　我 要 用 清 氣 的 心 行 在 我 厝 內 的 地 鋪。

3a　Siâ-phiah ê sū , guá lóng m̄ pâi tī guá ê ba̍k-tsîng;
　　邪 僻 的 事，我 攏 不 排 在 我 的 目 前；

3b　　　Puē-tō ê lâng só͘ tsuè ê sū, guá tsin uàn-hūn in ê put-tsìng,
　　　　背 道 的 人 所 做 的 事，我 真 怨 恨 伊 的 不 正，
　　　　m̄-hō͘ i liâm-tio̍h guá ê hing-tsîng.
　　　　不 讓 他 黏 著 我 的 胸 前。

4a　Uan-khiau ê sim tik-khak hō͘ i lī-khui guá;
　　彎 曲 的 心 的 確 使 它 離 開 我；

4b　　　It -tshè ê pháiⁿ guá m̄-bat i juā tuā.
　　　　一 切 的 歹 我 不 識 它 偌 大。

5a　Àm-tiong huí-pòng i ê tshù-piⁿ--ê ,
　　暗 中 毀 謗 他的 厝 邊 者，

5b　　　Guá beh bia̍t i ;
　　　　我 要 滅 他；

5c　Ba̍k-tsiu-kho͘ tuā--ê , sim kiau-ngō͘--ê ,
　　目 珠 眶 大 的，心 驕 傲 的，

5d　　　Guá bô iông-ún i .
　　　　我 無 容 允 他。

6a　Guá ê ba̍k-tsiu beh khuàⁿ kok-lāi sîng-si̍t--ê ,
　　我 的 目 珠 要 看 國 內 誠 實 者，

6b　　　Hō͘ in kap guá saⁿ-kap tuà;
　　　　使 伊 與 我 相 與 住；

6c　　Kiâⁿ tī uân-tsuân ê lō͘--ê ,
　　行 在 完 全 的 路 的，

6d　　　I beh ho̍k-sāi guá.
　　　　他 要 服 侍 我。

7a　Kiâⁿ khuí-tsà ê lâng,
　　行 詭 詐 的 人，

7b　　　Buē-tit-thang tsē guá ê ke-lāi siū tsun-kìng,
　　　　不 得 通 坐 我 的 家 內 受 尊 敬，

7c　Kóng pe̍h-tsha̍t-uē ê lâng, 　　
　　講 白 賊 話 的 人，

7d　　　Buē-tit-thang khiā-tiâu tī guá ê ba̍k-tsiu-tsîng.
　　　　不 得 通 khiā 住 在 我 的 目 珠 前。

8a　Ta̍k tsá-khí guá beh bia̍t-bô kok-lāi ê pháiⁿ-lâng;
　　逐 早 起 我 要 滅 亡 國 內 的 歹 人；

8b　　　Thang tsiong it-tshè tsuè-pháiⁿ ê lâng,
　　　　通 將 一 切 做 歹 的 人，
　　　　tuì Iâ-hô-hua ê siâⁿ tû--khì, kàu khang-khang.
　　　　對 耶 和 華 的 城 除 去，到 空 空 。