《宋澤萊新著《天路拾穗》台譯版》

 | | | 轉寄

第一部：稱義得救_主題8：「洗禮」ê深層意義

作者 2026.02.22




第一部 稱義得救


主題8：「洗禮」ê深層意義


1, 想bē通「歸入基督耶穌ê死」tsit句話

當初受洗ê時，我to̍h聽過「歸入基督ê死」tsit句話，m̄koh久長以來，我對tsit句話並無真理解。Kahná知影一旦歸入基督ê死，咱to̍h無罪ā；m̄koh bē了解是án怎歸入基督ê死咱to̍h無罪？

「歸入基督ê死」tsit句話，應當是來自〈羅馬書〉6章2─4節ê tsit段話： 「咱tī罪頂面死去ê人，kám thang iáu tī罪裡活leh？ Kám m̄知咱這受洗歸入基督耶穌ê人是受洗歸入祂ê死？ 所以，咱藉tio̍h洗禮歸入死，kah祂做伙埋葬，原是teh叫咱一舉一動有新生ê樣式，親像基督藉tio̍h父ê榮光tùi死裡koh活。」

Tsit段話是保羅用來談論洗禮ê功用，而且教示hit kóa受洗以後iáu活tī罪裡ê信徒。「咱tī罪頂面死去ê人」tsit句話是teh指「罪被免除ê咱」ê意思。也to̍h是講一旦咱受洗，罪to̍h hông免除，所以保羅tsiah講kám thang繼續teh過犯罪ê生活。Tī tsia「藉tio̍h洗禮歸入基督ê死了後，咱ê罪to̍h hông免除」受tio̍h保羅ê肯定。

我總是teh想，是án怎保羅beh ánne講？基督ê死究竟有啥物力量， ētàng叫咱閃避永死ê罪？基督ê死究竟用啥物方式拯救咱？……我想bē出答案。

無想tio̍h幾工前，我做一个異夢，得tio̍h答案。聖靈藉tio̍h tsitê異夢，回答我ê問題。我kā異夢大部分描述像下面ánne：

2, 一个有趣味ê異夢

我tī一條車來來去去ê大街路騎我ê機車，忽然間，我看見阮bó͘駛一台大型車tùi後面超越我，她駛車ê速度真緊。我回頭，to̍h看見阮bó͘ ê車後面綴一陣警察車，警示燈閃閃發光。明顯阮bó͘ tsìn前嚴重lòng紅燈á是違反其它交通規則，tsiah引來一陣交通警察ê追捕。

M̄koh，我看tio̍h車窗裡我ê牽手kahná真鎮定，她加快速度，向前奔走。來到一个車輛koh khah tsē ê路段，她小khóa偏ǹg倒pêng緊急走去，致使她ê車kah一台對面烏kah發光ê大型車摩擦閃過，濺起一tsūn ê火星。烏kah發光ê大型車駛過去了後，我to̍h看tio̍h阮bó͘駛車快速轉入去街路tòpêng ê一个別人ê門口埕。Tsit時，我tsiah看清楚hit戶人當teh辦喪事。

Tsit家人明顯m̄是sàntshiah人家，因為有一个相當廣闊ê門口埕。正面ê大廳gîmtsîⁿ前排放靈位ê祭壇，真像一个大ê升旗台，有kóa氣派。Tī大廳ê正pêng有一个有掛布簾ê門，tùi tsitê門入去大概to̍h ētànḡ進入大廳，hitê大廳裡一定有停裝屍體ê棺柴。

阮bó͘非常鎮定，她無tsông到祭壇，卻真敏捷駛入去hitê 正pêng有掛布簾ê門。我禁bētiâu驚kah huah起來，感覺她ná ēsái tsông入去別人khǹg棺柴ê內廳。M̄koh，她ê車siuⁿ緊，一下á to̍h駛入去門內，布簾koh垂落來，koh khah án怎都看bē tio̍h她ê車à，kahná啥物tāitsì mā無發生。我心內想講：tsitmá慘ah，災禍koh khah大à，喪家一定無beh放她suah！

我隨時kā機車停落來，趕緊走去到喪家ê後埕，beh tshōe喪家道歉。一來到後埕，to̍h看tio̍h阮bó͘ 當teh kah喪家ê人講話。Hitê喪家ê人非常和氣，kah kakī ê親人無兩樣。In kā阮夫妻兩人講：「暫時tòa tsia m̄thang出去，因為外面有警察！」

喪家ánne講，我趕緊走去到看ētio̍h門口埕ê所在去偷看，to̍h發見街路hit pêng停一排ê警察車，警示燈閃sih kah koh khah厲害，真tsē警察tī hia來回行動。M̄koh，因為無法度確定我ê牽手是m̄是來到喪家（因為門口埕看bē tio̍h她ê車），而且礙tī「喪家為大」ê風俗習慣，in mā m̄敢大主大意tsông入來喪家裡。警察kantaⁿ ētàng tī庭院外ê街路行來行去，偷偷á探看。

阮tī後埕一直等待，直到黃昏，夜幕慢慢á 垂落來。To̍h tī暗暝ê燈光tú beh光起來ê時，忽然有人huah：「停電loh！」就ánne烏暗罩tiâu天地，看bē tio̍h幾尺以外ê物件。

喪家tsit時走來對阮夫妻講：「好勢ah，tsitmá in koh khah án怎都tshōe bētio̍h lín à，lín thang離開。」

就ánne，阮重新起身，tùi後埕溜走去！

3.夢ê解析

頂面to̍h是異夢ê大概情形，看一下真，kahná m̄是án怎吉利。M̄koh，我知影這是聖靈hō͘我ê教誨，乃是beh對我說明「歸入基督ê死」tsit句話ê真正意義！

我kā我頂面所講所描述ê異夢ê重點文字解析tī下面：

A.「阮bó͘真tsìn前是嚴重lòng紅燈á是違反其它交通規則，tsiah引來一陣交通警察ê追捕。」是表明咱世間人犯嚴重ê罪，而且是罪證確實，無thang推辭，終其尾引起上主派來追捕ê使者，想beh逮捕咱來究責。

B.「烏kah發光ê大型車」是表明了這是一个異夢，因為異夢大部分lóng有色彩，而且色彩lóng真艷麗，假使是烏色ê，to̍h ē烏kah ná漆，發出光輝。

C.「我tsiah看清楚hit戶當teh辦喪事。Tsit家人明顯m̄是sàntshiah人家，因為有一个相當廣闊ê門口埕。正面ê大廳gîmtsîⁿ前tshāi靈位ê祭壇，真像一个大ê升旗台，有kóa氣派。Tī大廳ê正pêng有一个有掛布簾ê門，tùi tsitê門入去大概to̍h ētànḡ進入大廳，hitê大廳裡一定khǹg屍體ê棺材。」這是表明受洗典禮m̄是凍酸ê，是公開有氣派ê。

D.「阮bó͘非常鎮定，伊並無tsông到靈位，卻真快速駛入去hitê有掛布簾ê門。我禁bētiâu驚kah huah起來，感覺她ná ēsái tsông入去別人khǹg棺材ê內廳。」這是表明咱tī走投無路ê時快速歸入耶穌ê死kah喪禮內面，也to̍h是指受洗。

E.「一來到後埕，to̍h看tio̍h阮bó͘ 當teh kah喪家ê人講話。Hitê喪家ê人非常和氣，kah kakī ê親人無兩樣。」這是表明咱歸入耶穌ê死了後，真緊有koh活，當teh kah仝款是歸入基督ê死koh活ê眾基督徒親切講話。

F.「M̄koh，因為無法度確定阮牽手來到喪家（因為門口埕看bē tio̍h她ê車），而且礙tī『喪家為大』ê風俗習慣，in mā m̄敢大主大意tsông入來喪家厝裡。警察kantaⁿ ētàng tī庭院外ê街路頂行來行去，偷偷á探看。」這是表明耶穌ê死kah喪禮是宇宙間ê一件嚴肅ê大事，hō͘天使mā m̄敢隨便侵犯tio̍h耶穌ê喪禮。

G.「阮tī後埕一直teh等待，直到黃昏，夜幕慢慢垂落來。To̍h tī暗暝ê燈光tú beh光起來ê時，忽然有人huah：『停電loh！』就ánne烏暗罩tiâu天地，看bē tio̍h幾尺以外ê物件。」這是表明就ánne以後，咱kah外面ê世界斷絕關係，咱是屬tī耶穌tsit pêng ê人，無koh是屬世ê人。

H.「喪家tsit時走來對阮夫妻講：『好勢ah，tsitmá in koh khah án怎都tshōe bētio̍h lín loh，lín thang離開。』」這是表明咱bih tī基督ê逃城世界裡，tio̍h算咱tsìn前犯嚴重ê罪，罰罪使者mā tshōe bētio̍h咱。Tī基督開創ê國度裡，咱得tio̍h自由ā！

4. 錯誤觀念ê糾正

Tsitê異夢釐清tsìn前我幾个錯誤ê觀念：

A. Tsìn前我總是認為洗禮是一種歡喜快樂ê典禮，m̄koh tsitmá看起來，它koh khah是一个喪禮。的確，若是用「koh活」ê觀念來看，它是有喜氣；m̄koh若用歸入基督ê死來看，它既然是耶穌ê喪禮，mā是咱ê喪禮。

B. Tsìn前我總是認為一旦歸入耶穌ê死，一定tio̍h等真久，咱tsiah ē koh活，m̄koh tsitmá看起來，歸入耶穌ê死kah koh活kahná是同時ê。咱tī前庭歸入死，tī後埕to̍h有koh活。

C. Tsìn前我總是認為歸入耶穌ê死，咱ê罪to̍h好kahná是tī罪狀上被「抹」掉，tsitmá看起來卻m̄是。咱歸入耶穌ê死kah喪禮，是teh指耶穌用祂ê死kah喪禮jia蓋咱，咱進入耶穌所創立ê逃城世界裡，hō͘上主ê罰罪使者m̄敢來tshōe咱，á是tshōe bētio̍h咱。咱ê罪其實iáu掌握tī罰罪使者ê手裡，而且罪證確實，一旦你離開耶穌ê jia蓋（m̄信耶穌），罰罪使者iáu是ētàng tshōe tio̍h你！

──2014、09、11 tī鹿港