《宋澤萊新著《天路拾穗》台譯版》

 | | | 轉寄

第二部：聖靈灌AK_22【題目】「人工ê方言﹝靈語﹞m̄是方言。」Tsit句話是án怎是錯誤ê？

作者 宋澤萊 2026.08.02




22【題目】「人工ê方言﹝靈語﹞m̄是方言。」Tsit句話是án怎是錯誤ê？

筆者常tiāⁿtiāⁿ tī網路頂看tio̍h有人講：「人工ê方言﹝靈語﹞m̄是方言。」Tsit句話通常lóng是hit kóa反對別人方言祈禱ê一種騙人ê講法，目的是beh hō͘生手誤信方言oh得學習，不如phah消學習ê念頭；同時mā用來排斥其他ētàng講方言ê教派，就ánne誇口kakī教派ê方言tsiah是真正方言ê一種幼稚行為。總講一句是因為魔鬼無ài人有tsit項屬靈ê恩賜，tsiah ē有tsit種hàm古ê講法。咱kám ētàng中計！

通常，咱學習講方言siōng簡單ê方法是請教別人；也to̍h是看別人án怎講方言，問對方講方言ê撇步，了後kakī靠tio̍h信心kā方言講出來，to̍h親像細漢gín'á學習老母ê嘴形發音講話ánne，本來to̍h是非常單純ê學習講話ê可愛技藝。M̄koh魔鬼ē thiau故意kā tsit項tāitsì講kah真複雜，hō͘人心生驚畏，就ánne hō͘人phah消學習方言ê念頭。

魔鬼可能ē假鬼假怪kā生手講：「你啥物lóng mài做，假使講聖靈beh hō͘你講方言，祂自然to̍h ē hō͘你講方言。你啥物mā無需要做，啥物mā無需要想！一旦你靠tio̍h kakī ê心意、動作講出方言，he to̍h是人工方言，卻m̄是真方言！」

Tsit種話kám tio̍h？當然m̄ tio̍h！筆者beh kā你講，假使你啥物lóng m̄做（無想beh kakī開嘴講話），tio̍h算聖靈降tī你ê身軀頂，你mā可能講bē出任何ê方言。當然有一種情形是：當聖靈非常phongphài降tī你身軀頂，kā你ânân包leh，你有可能被動講出方言，因為聖靈極想beh hō͘你講方言；m̄ koh，我beh kā你講，tsit種狀況無tsē，人ê一生kantaⁿ ētàng tú tio̍h一兩pái，甚至完全無可能tú tio̍h；假使你無法度tú tio̍h tsitê罕得有ê狀況，kám m̄是就 ánne kah講方言完全絕緣loh？總講一句，講方言tsit種恩賜tī背後當然有聖靈teh推動，mā是聖靈提升咱靈命ê計畫kah作為，m̄koh通常tī一般ê狀況，一定tio̍h是信徒先有意願tsiah ēsái，為tio̍h hō͘學習有效率，聖靈一定ē暗中考察你ê意願，而且幫忙你，假使你無一絲á意願，聖靈 ná tio̍h浪費祂ê時間？

Koh再講，咱一般人只要開始ē曉方言，了後大概to̍h永遠lóng ē曉方言ā。To̍h kahná kah泅水仝款，只要學ē曉泅水，大概一生lóng ē曉泅水。Kiámtshái頭一pái是聖靈hō͘你ētàng講方言，m̄koh以後你kám beh講方言lóng是你kakī ê決定。譬如講你tsitmá想beh講方言，你to̍h一定tio̍h kakī開嘴講方言；你想beh停止講方言，mā是由你決定，聖靈根本無koh管你。你bētàng講聖靈頭一pái叫你講方言tsiah是方言，後來由kakī開嘴講出來ê方言（to̍h是所謂ê人工方言）m̄是方言！其實，咱一生中所講ê方言，差不多lóng是人工ê方言（kakī開嘴講ê），真少講是聖靈壓迫咱講出來ê。其實任何方面，聖靈lóng bē壓迫咱去做啥物，除非是咱犯tio̍h重大ê tāitsì（比論講咱犯tio̍h穩死/包死ê罪）。所以假使講人工ê方言m̄是方言，ánne差不多所有ê方言lóng m̄是方言ā。

咱應該知影，方言本身to̍h是一種語言，kah咱一般人用英語á是台語祈禱仝款lóng是語言；當咱開嘴講話ê時，to̍h是用咱ê人工講話，除了運用人工以外，咱真oh講話！Tsit種狀況kah咱ê悟性祈禱（日常語言ê祈禱）完全仝款ê，你一定tio̍h開嘴用人工kā你ê祈禱詞，用北京語á是台語講出來，tsiah ētàng完成悟性ê祈禱，並m̄是kakī完全無任何ê動作！所以咱ná ētàng亂講：「人工ê方言m̄是方言！」leh？

Koh再講一遍，講方言並無困難，只要請教別人，按照別人ê嘴形á是發音ê技巧，phah拚學習，根本無需要gōa久（真可能kantaⁿ需要瞬間），聖靈to̍h ē hō͘你講出方言。它m̄驚「人工」，驚ê是你根本無願意開嘴kā它講出來。

是án怎學習方言tsiahni̍h簡單leh？馬可福音 十六章17~18節耶穌講：「信ê人一定有神跡tòe in，to̍h是奉我ê名趕鬼；講新方言。」只要對上主、對耶穌、對聖靈有信心ê人，lóng ētàng憑你ê人工，kā方言講出來。咱 ná tio̍h聽從魔鬼ê恐嚇講：「人工ê方言m̄是方言！」

──2021、05、30 tī鹿港