《宋澤萊新著《天路拾穗》台譯版》

 | | | 轉寄

第三部：聖靈內住篇_32【題目】「上主ê靈tòa tī lín心內」是啥物意思？

作者 宋澤萊 2026.10.11






32【題目】「上主ê靈tòa tī lín心內」是啥物意思？


〈羅馬書〉 八章9 節，保羅講：「若是上主ê靈tòa tī lín心內，lín to̍h bē屬肉體，就ánne屬聖靈à。」對tsit句話，我摸tshōe真tsē pái，m̄koh無法度得tio̍h確定ê意義。主要是tsitê「心」字hō͘ 我感覺躊躇驚惶，「心」tsitê名詞tī修辭學上是真oh定義ê。

下kha有兩个解說，一个bē通，一个勉強ē通：

假使講「心」tsitê字是teh指「記憶」，ánne「上主ê靈tòa tī lín心內」to̍h ētàng解釋做「上主ê靈存在tī lín ê記憶裡」，表面上ê意思是非常清楚。比論講，某一pái，你去參加特會，被國際有名ê傳道者hōaⁿ手tī頭殼頂面，你忽然一時感受tio̍h聖靈循環流轉tī身體裡，三腳tiô兩腳跳，當場倒tī土kha，唱起靈歌。Tāitsì過了三個月á是三年，你iáu是ētàng記tiâu當時聖靈停留tī你身軀頂ê經驗，你真容易to̍h回憶起當初聖靈tī你身軀頂所做ê上主聖工，你保留聖靈ê印象tī你ê「記憶」裡。Ánne，這to̍h是「上主ê靈tòa tī lín心內」ê一種解說。M̄koh，你一旦採用「心」to̍h是「記憶」tsitê解說，to̍h真oh對後面「Lín to̍h bē屬肉體，就ánne屬聖靈」tsit句話做合理ê理解。Kám講經過國際有名ê傳道者hōaⁿ手tī頭殼頂面，ētàng唱靈歌ê人，kám講ta̍k人靠tio̍h伊對聖靈ê ê「記憶」to̍h「無屬肉體，就ánne屬聖靈」？Kám講經過國際有名ê傳道者hōaⁿ手tī頭殼頂面，ta̍k个ētàng唱靈歌ê人，靠tio̍h伊對聖靈ê ê「記憶」，就ánne完全成聖﹝無屬肉體﹞？我想beh tī信仰ê路裡無tsiahni̍h sio̍k ê tāitsì！到目前為止，我mā無聽過有人經過某傳道者hōaⁿ手，靠tio̍h對聖靈ê「記憶」to̍h完全離開邪情私慾ê實例；我mā m̄相信世間人ê「記憶」有tsiahni̍h大ê功能thang取代聖靈實體ê偉大事工。假使ánne，保羅to̍h無需要對〈哥林多前書〉hit陣有聖靈經歷卻情慾旺盛ê信徒發大受氣。所以tī tsia kā「心」解釋做「記憶」是講bē通！

假使講「心」tsitê字是teh指「時時刻刻聖靈永住身軀了後ê「察覺á是感覺」to̍h比較khah四配。Án怎講leh？因為聖靈永住tī身裡是ētàng感覺tio̍h ê，對聖靈內住tī身體ê tó一个位置á是聖靈所hō͘ in ê平安喜樂，á是認罪悔改，甚至是hō͘你永遠ê性命，lóng ē有明確ê察覺。同時當你轉向聖潔ê大道大步進前ê時，你ē感覺你得tio̍h到taⁿ無人有ê自由，這mā是一種tiāⁿtiāⁿ有ê感覺。總講一句，當你有tsiahê時時刻刻聖靈永住身軀了後ê「察覺á是感覺」了後，你tsiah ē發現kakī成做聖潔，也to̍h是「無屬肉體，就ánne屬聖靈」à。

所以我認為kā「上主ê靈tòa tī lín心內」解釋做「時時刻刻聖靈永住身軀 了後ê察覺á是感覺」tsiah講ē通！

──2014、08、08 tī鹿港