《台灣另類牧師．醫師─謝緯》

 | | | 轉寄

2-02 高校考試落榜

作者 陳金興 2011.07.17

原來就對文學真有趣味ê謝緯， tī 中學四年級 ê 時 mā 去 kap lâng 參加高校考試 (註1)，為 tio̍h 方便將來報考台北帝國大學，想欲進入文學部讀書。但是， suah 考 bô-tiâu 。中學五年畢業了後，伊 koh 再赴考，猶原是落榜。 Tsit 時 tsūn ，高校考試 nn̄g-pái 攏考 bô tiâu ê 謝緯，真 ǹg 望 ē-tàng koh 再去日本報考文學部。但是受老母拒絕，並要求伊隨時去讀台南神學院。老父 mā 對伊 án-ne 講： 「當年你破病 tī 絕望中奉獻家己，上帝有聽你 ê 祈禱。 Taⁿ 你頭前 ê 聖工已經有好 ê 計畫， tio̍h 繼續祈禱，若是上帝 ê 旨意，伊一定會親像十年前仝款 àⁿ-lo̍h 聽你 ê 祈禱！因為你已經屬tī 伊； mài koh 家己 tī hia 掛慮煩惱 lah ……」。

謝緯 ê 父母為 tio̍h 伊 ê tāi-tsì，tō 真著急去向吳天賜牧師求助。彼時 tī 埔里烏牛欄教會(今愛蘭教會)牧會 ê 吳天賜馬上 tō趕到南投。謝斌除了向吳天賜說明謝緯報考高校 bô tiâu ê 經過情形以外， koh sūn-soà 問吳天賜豈 (kiám) 猶會記得謝緯 tī 9 歲破病 ê 時，因為 in 四 ê 人 ê 祈禱 tsiah 得著醫治 tsit tsân 代誌？吳天賜表示會記得，續落來伊問講：「阿緯 kiám 無照誓約去讀神學院 mah？」謝斌 ìn 講「無」，並表示謝緯因高校考試 nn̄g 擺攏無 tiâu ，每工 tī 厝內無精無神、餒志消沉，已經án-ne 過一年 goā ，所以想 beh 拜託吳天賜撥工 tshoā 謝緯到台南去讀神學院，有得著吳天賜答應。

Tùi án-ne ，吳天賜有照謝斌 ê 請求，提醒謝緯細漢 ê 時對神 ê 應允，到神學院去讀 tsheh 。想 beh phah 破傳統 ê 謝緯，用無仝ê思維對吳天賜講：「我 beh獻 hō͘ 上帝， m̄-kú 方式有真 tsē種，無一定 tio̍h 用 tī 教會做牧師 ê 方式……。」話雖然是 án-ne 講，不過伊猶久有聽父母 ê 話，最後，謝緯也是由吳天賜 tshoā 去台南。 Hit 時台南神學校(註2) 已經開學一個 goā 月。

.............................................................................................................

(註1)
日治時代學生中學畢業了後，需要代先受過預科教育， tsiah 有資格進入大學， tī 1941年 (昭和16年) 台北帝國大學增設預科以前，「台灣總督府台北高等學校」(高校)是台灣島內唯一升大學(台北帝國大學) ê 管道。當時台灣人子弟 (男)若 beh 考台北帝國大學，一般正規 ê 順序為公學校 6 年，中學 5 年，高等學校 3年， koh 再參加考試。中學 m̄ 免讀完 tō ē-thang 報考高校；高校 mā 無一定讀完 tō ē-thang 報考台北帝國大學。但是， mā ē-tàng tī 中學畢業了後，直接到日本報考大學。女子 ê 學制是公學校 6 年，中學 5 年，讀到高等女學校，若 beh koh 讀大學，就 ài 到內地日本。

(註2)
台南神學院（Tainan Theological College And Seminary）是一個神學教育機構， 1865 年英國長老教會差遣馬雅各醫生來台佈道。因為感受著培養本地宣教人才 ê 需要，就 tī 1869 年 tī台南二老口醫館之禮拜堂開辦「傳道者速成班」。了後 tī 台南 kap 高雄旗后 mā 成立「傳教者養成班」。到 1876 年合併，創辦「台南大學（神學校)」。第一任校長是巴克禮牧師（Rev. Dr. Thomas Barclay M.A. 1849-1935)，學生只有十幾个、教師三名、教室一間、宿舍一棟。1913 年更改校名為「台南神學校」。1925 年巴博士退休，由宣教師滿雄才牧師（Rev. W.E. Montgomery) 擔任校長。1948 年 koh 再更改校名為「台南神學院」，招考高中畢業生修業四年。