《台灣另類牧師．醫師─謝緯》

 | | | 轉寄

3-04 遲到早退ê學生

作者 陳金興 2011.08.14

1937年，中日戰爭爆發了後，日本總督府極力推動「皇民化運動」，koh鼓勵大家接受日本神道信仰，定期參拜神社，進行「正廳改善」kap「寺廟整理」運動，引起教會極力ê反抗，致使台南神學院被強迫關門。

關於當時日本壓制教會ê情形，謝緯tī〈在所不辭〉tsit篇文章中án-ne講： 「Tī我完成最後一年學業ê時tsūn，日本政府已經加強in對教會生活ê壓制。若我現在成做牧師，我會受tio̍h秘密警察ê監視，三不五時就來攪擾，以及各種規章ê限制。」

Tī謝緯teh-beh畢業ê時，因為當時台灣ê政治情形jú來jú緊張，日本壓迫基督教ê情形mā加真嚴重，致使伊koh-khah決心beh ài去日本讀醫學院。Tùi án-ne伊就向神學院kap教會當局申請赴日報考醫專，並說明回台了後，有be̍h服務tī醫療傳道工作，tsit-ê申請有得著批准。謝緯tī 1938年tsiaⁿ 月25日ê日記上有按呢寫講： 「(教會)傳道局正式通知我ē-tàng去參加醫專考試，傳道局有許可，我tsiah thang去。Tsit-ê tāi-tsì無joā愛hō͘人知影，驚hō͘人批評……事到如今，hō͘人批評mā好，我lóng m̄驚la̍h。我所驚ê只有一件事，就是我驚本身背叛上帝……我m̄是為tio̍h追求平安á 是好過日ê生活tsiah來選擇tsit條路。上帝啊，求祢幫助我tsit-ê決心，永遠bē改變。

謝緯無kap一般神學生仝款，tī畢業了後直接分發到教會做傳道師ê另外一個原因，謝緯夫人楊瓊英講： 「謝緯tī神學院teh-beh畢業ê時，同學lóng teh討論beh到tó 一間教會ê同時，伊ê心內mā teh kún-ká：我kám beh去教會？我若m̄去教會，上帝是m̄是會歡喜？伊lóng m̄ 敢向別人講伊beh讀醫學院ê事，驚別人認為伊beh ài thàn大錢，m̄去傳福音。其實伊m̄是，伊是beh醫療kap傳道相結合。」

另外，伊tī＜我ê生涯＞一文中，mā清楚按呢寫：
1. 因為戰爭ê緣故koh-khah àn怎to無tī教會工作ê信心lah。
2. 我寧願做自由傳道。
3. 若án-ne做ê話kap教會以外ê世界有koh-khah好ê關係。


1938年3月19日，謝緯自台南神學校畢業。但是，因為伊著急beh去日本讀醫學院，考完畢業考了後，無法度參加學校ê畢業典禮。Tsit點引起院長滿雄才ê無歡喜，想beh拒絕分畢業證書hō͘ 伊。楊士養牧師聽tio̍h tsit-ê tāi-tsì，極力為謝緯講情。伊去向院長表示，既然謝緯已經完成畢業考試，而且各科成績mā lóng及格，照理學校應該頒hō͘ 伊畢業證書tsiah-tio̍h。滿院長聽完了後，tsiah同意koh「破例」一pái，頒發畢業證書hō͘無參加畢業典禮ê謝緯，hō͘ tsit位「遲到早退」ê學生，會得thang安心kap順利前往日本繼續伊ê醫學院生涯。