《台灣另類牧師．醫師─謝緯》

 | | | 轉寄

4-03 謝緯kap楊瓊英結婚

作者 陳金興 2011.09.04

1921年出世ê楊瓊英，老父楊雲龍是眼科醫師，tī台南市民權路家己開業。老母吳順規，是謝緯老母吳上忍ê小妹。細漢ê時，楊瓊英bat跟(toè)老母到南投拜訪阿姨，當時就已經見過謝緯。M̄-kú 了後m̄-bat koh再聯絡，對伊mā無特殊ê感覺，kan-taⁿ知影有一位比家己khah大5歲ê表兄若定(nā-tiāⁿ)。

楊瓊英tī 1933年tùi台南州「末廣公學校」畢業了後，就到日本讀「惠泉女學園中學」。畢業了後，因為伊感覺替病人服務真正好，就kap tó-sàng(老父)講伊想beh去考護理學校。但是楊雲龍suah講：「bē-sái，你tio̍h去考醫學院。」楊瓊英就乖乖á去考，考tiâu仝款tī新宿區ê「東京女子醫學專門學校」(今東京女子醫科大學)，toà在學校宿舍，1943年畢業，但是伊對護士ê服務工作猶原有興趣。

1942年左右，tī留日家族ê聚會裡，楊瓊英kap謝緯koh相tú。Tú開始ê時，兩ê人kan-taⁿ恬恬觀察對方。楊瓊英對謝緯ê印象真好，因為伊真會曉照顧 kha̍h oàⁿ 到日本讀書 ê表兄弟姐妹，而且受過牧師養成教育ê謝緯，講話真實在，所以楊瓊英感覺謝緯是一個真有愛心koh真有責任感ê人。

謝緯畢業無 joā 久，就去靜岡縣松崎伊 ê 表哥汪同文醫師 hia 鬥相共(tàu-saⁿ-kāng)，tī-hia 伊koh再 tú tio̍h 楊瓊英。 謝緯ê＜在所不辭＞一文中有按呢寫講：「我踏入親戚ê厝ê時tsūn，第一個意外就是看tio̍h我ê表小妹。自從到日本以來，我就bat見過伊，但是kan-taⁿ是
tìm-thâu相借問nā-tiāⁿ，bô-gî-ngō͘
伊已經大漢成做一位美麗ê淑女 la̍h…。」 (由左至右:謝緯、楊東傑、楊瓊英)

葉官mā感覺謝緯kap楊瓊英若ē-tàng成做夫妻( ang-á-bó͘ )，thang講是「天作之合」，就主動為兩人傳訊息。M̄-kú過無 joā久，謝緯認為猶是直接kap楊瓊英面對面交談khah好，所以就主動約楊瓊英出來見面。經過幾nā pái ê交談了後，彼此lóng留落美好ê印象。結婚tsìn前，謝緯bat問楊瓊英，結婚了是m̄是會放棄醫學來照顧家庭？楊瓊英表示伊會。謝緯知影家己beh行ê路，是非常不容易ê，mā會有真tsē荊棘(tshì-phè)，伊問楊瓊英，m̄知伊有法度擔當無？楊瓊英講有。Tùi án-ne， 1944年4月30日tī南投教會kap台南太平境馬雅各紀念教會ê禮拜中，同時向會友報告in兩人teh-beh結婚ê 消息，當做是訂婚（當時教會內規是要連續三週“唱禮拜”，沒人異議才ē-tàng訂婚）。

原本厝內ê人希望in tńg來台灣了後tsiah結婚，m̄-kú當時戰爭已經進入尾聲，情勢真亂，擔心m̄知tang時tsiah ē-tàng tńg來到台灣，所以就tī雙方家長ê同意之下，謝緯kap楊瓊英tī 1945年11月17日結婚，由中江英樹(汪培英1878-1949)牧師證婚。






In ê結婚誓言án-ni寫： 「我ê愛情求主助，愛(thiàⁿ)你贏過全世界，taⁿ我立志獻家己，永永專專歸hō͘ 你。」謝緯kap楊瓊英兩人tī每年ê結婚紀念日，lóng重新親筆將誓言過抄，來表白兩人對tī愛情ê專一無變。