《台灣另類牧師．醫師─謝緯》

 | | | 轉寄

8-05 為主甘願做戇人

作者 陳金興 2012.01.29

2月20日，謝緯 tī 北門為烏腳病患手術，切除七位病人ê腳， koh 真感慨講：「kám講無根本 ê 治療方法？」雖然截肢m̄是根本 ê 辦法，但是彰化沿海各鄉鎮，猶原有真多患者欲進入「憐憫之門」來接受治療。

謝緯 án-ne 拚命為烏腳病患服務ê精神，實在感動真 tsē人。 M̄-koh，當年陪謝緯同齊前往北門ê謝綸，卻謙虛講：「阮 kan-ta 一禮拜去替患者開刀一 pái，無算什麼。阮開刀了後就 tńg來南投， tshun 落來照顧病患 ê khang-khoè， lóng 落 tī 王醫師夫婦身上。王金河醫師被稱做「烏腳病之父」，一點 á lóng 無超過。因為當時有芥菜種會募集經費， koh tú 佳哉北門嶼當地有一位願意鬥腳手 ê 基督徒醫師王金河，免費診所 tsiah 會得 thang 成立， hiah-ê 患者 tsiah 有機會接受醫治 kap 照顧。」

Tsit 種完美ê組合，謝緯夫人楊瓊英mā講：「這真正是上帝美好ê安排。」 mā 就是講，醫治烏腳病 ê 這「鐵三角」， tī 北門憐憫之門免費診所 ê 經營上，每一个「角」，lóng 是 bē-tàng 欠缺 ê。

除了為病人開刀以外，謝緯 mā 真關心北門嶼教會傳道師 ê 生活。1964年9月中，伊 bat 問當時駐堂ê傳道師謝薰芳， tī 傳道工作上有遭遇甚麼困難 bo͘h ？謝薰芳 ìn 伊講，無論是探訪 tī偏僻庄頭 khiā 起 ê 會友，或是去訪問退院 ê 患者， lóng tio̍h 靠行路，hō͘ 伊 tī 時間 kap 體力上，lóng 感覺有一點 á 力不從心。謝緯聽完，後禮拜 koh 去手術ê時，tō 拿一千 goā 元， hō͘ 謝薰芳買一台鐵馬騎。

另外，北門嶼教會ê會友，大部份 lóng 是散赤 ê，經濟 khah 困難，無法度負擔傳道師年終二個月 ê 慰問金 ( 計二千元 )。謝緯知影 tsit-ê tāi-tsì 了後，tī 後禮拜去北門ê時，koh tsah 二千元 hō͘ 謝薰芳做年終獎金。

1970年5月23日，謝緯 kap 夫人楊瓊英同齊前往北門，參加免費診所創辦10週年感恩禮拜，並以「為主甘願做戇人」為題證道。