《台灣另類牧師．醫師─謝緯》

 | | | 轉寄

序三 ： 走tshoē台灣典範人物

作者 陳金興 2011.05.29

tī久長ê年代中，謝緯，這位台灣基督教史上bē-tàng欠缺ê牧師，我無印象；謝緯，這位為著救人ê性命煞犧牲家己ê醫師，我也無印象。直到九○年代，因為王金河醫師對烏腳病ê貢獻，纔(tsiah)知謝緯這个名，也開始刻tiâut tī我ê頭腦內。 2004年秋，我真福氣到長榮大學籌設台灣研究所，較有機會去了解由(tùi)外國長老教會來ê宣教與醫療史事，對hiah-ê長期為貧苦人民、歹命病人無私忘我奉獻ê真多教會人物，由(tùi)心底發出深深ê敬佩與懷念。

台灣研究所第一屆研究生陳金興先生，少年ê時曾(bat)受謝緯家族in之照顧，且(koh)親自感受謝緯ê身教。所以，伊就決心選擇要寫關係謝緯ê書，就是後來完成ê《謝緯與台灣醫療宣教》碩士論文，呈現一般論文所欠缺ê真實kap親切感，我深受感動。尤其使我歡喜ê，是無偌久伊復(koh)將論文改寫做這本通俗性ê謝緯傳記，會得thang將台灣人ê典範紹介予社會大眾，這是咱這世人迫切ài做ê人生功課。

解嚴到今二十外年中，台灣主體性ê文教推展，路途坎坷(kham-khia̍t)，無一項會比建立典範人物以及傳承ê代誌tsiah-nih 艱難。清治以前ê封建舊社會，台灣ê典範人物是霧霧無清與分歧的。二十世紀起，新殖民主義與新思潮ê交集，使具有現代意義ê台灣人ê典範漸漸興起。 M̄-kú外來統治者不斷粗殘teh消滅及扭曲台灣ê典範人物，suah致使台灣人獨立自主ê精神史，難(oh)得串聯。我tiāⁿ-tiāⁿ 與朋友作夥ê時，無論熟識抑是無熟識ê，攏勸in寫家己或別人ê見聞或傳記。只有記錄起來,纔有存在；只有寫出來，纔有歷史ê發言權；tī市面上可看著關係台灣人典範ê傳記實在siuⁿ少。痛心來講，tī媒體、文教體制受人綁架ê狀況下，台灣人差不多無好人，可做典範者ê，koh-khah少。

金興年過半百， 纔去讀長榮大學台灣所，名義上是我ê學生，年齡也差bē少，總是我kā伊當做我值得學習ê朋友。伊言談樸實、氣度溫良，對台灣ê情感有料想bē-tio̍h ê堅持，無惜放棄tī彰化長期英語教學ê工作，重新tńg去校園，投入台灣文化ê研究。我猶(iau)tī台灣師大ê時，伊就時常來台北參與有關我ê活動。了後，復來台南三年，開車奔波，對伊ê身體有較不(buē)堪得。畢業了後，復完成這本《台灣另類牧師‧醫師─謝緯》。台灣今仔日面臨空前ê危機，金興努力又koh無放輕鬆ê累積，tú-á親像伊所陳述ê，謝緯用五元美金ê信心，來打造台灣肺病療養院仝款，目睭前又復是一片光明與希望。

適值謝緯牧師/醫師過往四十週年前夕，我真榮幸書寫金興大作ê序文。tī紀念典範ê時刻，我期待tī名間鄉車禍事故現場，ē-tàng豎(tshāi)一塊「謝緯醫師終焉之地」ê碑，予（hō͘）台灣人永遠ê記憶。



─ 長榮大學台灣研究所 講座教授
莊萬壽
2010年5月14日 凌晨 台北