《台灣另類牧師．醫師─謝緯》

 | | | 轉寄

9-05 吳震春重整二基

作者 陳金興 2012.03.18

謝緯自1957年3月開始就擔任彰化基督教病院ê董事，1970年因為董事長翁嘉器出國，謝緯代理彰基董事長。他為tio̍h beh促成彰基kap二基nn̄g間病院彼此合作，增加彰化kap二林兩地ê醫療資源，mā相信tsit nn̄g間病院tùi án-ne發展oē tàng koh-khah好，bat建議院長蘭大弼 （Dr. David Landsboroogh,Ⅳ,M.D. 1914-2010）將二林基督教病院納入彰基ê醫療網，成做彰基二林分院。但是，蘭院長以無能力照顧二基病院做理由，無答應。

仝hit年6月謝緯受主揀召，過無joā久，二基病院業務開始萎縮，收入無法度維持營運，員工續落來陸續離職。1975年起，koh-khah因為有ê醫生出國進修， á 是家己開業，院務漸漸荒廢，住院部關閉，kan-ta門診部iáu維持營業，由黃明輝、蔡陽昆、陳曜煊等醫師，每禮拜一、三、五輪流看診；並有洪金柃、楊朝宗、侯安息、楊作舟、阮德茂等醫生，每禮拜一到拜六早起門診。另外，彰基施明哲、周神彬、吳彩霞、李滿堂、陳守平等醫生，亦前來支援。了後kúi年，二林基督教病院ê業務差不多tiāⁿ-khì，以早本來「人滿為患」ê景象無koh出現。直到1980年彰基院長吳震春接手了後，二基病院tsiah恢復生機，直到今仔日。

彰基病院院長蘭大弼teh-beh tī 1980年6月底退休tńg去英國ê時，為tio̍h hō͘病院ē-tàng繼續順利經營，院方董事會大力推薦並積極苦勸吳震春醫師前往就任。當時iáu tī台北馬偕病院服務ê吳震春，心中萬分kún-ká：「最近基督長老教會總會bueh聘請我接任彰化基督教病院院長ê缺，因為蘭大弼院長beh退休tńg去英國。對我來講，這是一件大事，因為它逼我ko͘-put-jī-tsong(不得不) tio̍h放棄過去三十三年tī台北所建設ê一切……。講實在，除了彰基ê董事長激烈以雙手歡迎以外，我ê親友lóng堅決反對我去受苦。確實，受邀請去彰基m̄是好sńg ê！」




●1980年7月初1，彰基董事長黃明輝(左)將醫院印信交接hō͘新任院長吳震春醫師(右)。




M̄-koh，經過慎重ê考慮了後，決定將醫療宣教ê使命，khǹg tī個人得失之上ê吳震春，tī 1980年7月，欣然就任彰化基督教病院第十任院長。Tsìn前，伊就bat到二林基督教病院支援看診，kap謝緯熟識，kap二基mā有一段感情。如今，看tio̍h二基ê tsit種情形，禁bē-tiâu心中一tsūn悲哀，吳震春認為「二林基督教病院ê荒廢，是基督徒ê見笑代」。因此，伊開始積極二基ê「復原」工作，偕同行政副院長郭文隆kap二基董事長蔡陽昆到二林視察、規劃重建工程、整修院區。為tio̍h hō͘ 醫生ê生活安定，伊起醫生宿舍，解決交通不便ê問題。

自1980年12月1日起，彰化基督教病院正式接管了慘澹經營數年ê「二林基督教病院」，並改名做「彰化基督教醫院二林分院」到taⁿ。原本teh-beh hua去ê院務，tī吳震春院長積極koh用心ê營運之下，會得thang起死回生，業務日日擴大，造福koh-khah tsē沿海ê民眾。