《台灣另類牧師．醫師─謝緯》

 | | | 轉寄

9-07 喜樂之家 ê 成立

作者 陳金興 2012.04.01

因為瑪喜樂有照顧小兒麻痺患者tsit方面ê經驗，所以當謝緯tī二基病院beh成立「附設小兒麻痺保育院」ê時，頭一個想tio̍h ê siōng適當人選，就是她。起初，瑪喜樂心中非常躊躇，m̄知應該離開埔里hiah-ê可憐、sàn-tshiah ê原住民病患bò͘？Koh-khah m̄知家己是m̄是有能力完成謝緯ê付託？過tsi̍t-tsām-á了後，瑪喜樂答應謝緯ê邀請，tī 1964年5月進入籌備中ê二林基督教病院。當瑪喜樂tú-tú到二林ê時，看tio̍h tsiah-ni̍h-tsē小兒麻痺孩童，她問上帝講：「我ē-tàng為 in做一寡仔什麼mah？」

當二林基督教病院11月初3開幕ê時，hit日就來了222位小兒麻痺患者。病院四界，目睭所看會著ê，lóng是tī土腳teh爬ê gín-á。當時ê瑪喜樂親目睭看著有hiah-ni̍h tsē患者需要幫忙，就決定beh專心來照顧in。1965年8月，二林基督教病院內底有成立「附設小兒麻痺保育院」，委託瑪喜樂負責hit-ê保育院ê院務。因為醫生資源欠缺，就邀請屏東基督教病院ê醫生前來支援診斷治療，病患分別tī二林開刀，或是遠送屏東治療。仝年11月，hit-ê保育院開始接受由高甘霖牧師所主持ê「基督教兒童福利基金會」（CCF）ê協助。1967年9月，改名做「二林基督教保育院」，繼續接納治療小兒麻痺孩童。但是，因為入來病院ê病童jú來jú tsē，病房無夠安置當時ê 60名小兒麻痺院童。為tio̍h因應koh-khah tsē ê其他病患ê需要，二基病院只好將tsiah-ê小兒麻痺患者獨立出去。

瑪喜樂知影必須替tsiah-ê gín-á另外tshoē所在，伊mā體會到必須tshoē一koá外援，tsiah有夠額替in發展未來。1968年6月，瑪喜樂邀請tùi世界展望會來ê司德鳳（Betty Stanton）小姐擔任喜樂保育院第一任院長。仝年7月，瑪喜樂tńg去美國拜訪世界展望會鬥saⁿ-kāng。經過展望會ê雜誌報導了後，得tio̍h bē少ê捐款援助，有夠額阿嬤tī二林高中對面買2,200坪ê土地（喜樂保育院現址）建院。1969年koh得到展望會贈送一台專車。仝年11月成立董事會，正式獨立收容院童70名，並tī 1970年5月24日正式立案，改名為「彰化縣私立基督教喜樂保育院」。










瑪喜樂bat受頒第五屆「醫療奉獻獎」（1995年）。1998年得到省府榮譽省民證kap彰化縣榮譽縣民證、內政部台灣永久居留證。1999年獲頒中華民國華夏三等獎章、2000年獲總統頒授紫色大綬景星勳章kap台灣基督長老教會總會榮譽宣教師證。並以91歲高齡tī 2005年獲頒第三屆「總統文化獎」（社會服務類「太陽獎」），這是第一位外國人得tio̍h ê獎項。