《台灣諺語鹹酸甜》

 | | | 轉寄

三兄弟股一條瓊麻索。

作者 蕭平治 2006.05.14

瓊麻就是龍舌蘭，俗稱樹絲，因為伊樹葉ê 纖維，韌koh m̄ 驚水浸，提來股索仔，堅固耐用，是討海人ê 重要工具，南部出產kài 濟。

用瓊麻股索á是m̄-bat 看過，用黃麻絞索仔，m̄但bat khuàiⁿ，gín-á時代mā bat kap 大人絞過，不過絞-- ê是兩股ê 索仔，絞三股--ê 就無hit款功夫。

過去生活tī 庄腳ê 作穡人，擔擔（taⁿ-tàⁿ）ê 畚箕、米luâ ài 縛索仔，載貨、縛柴ài 用索仔liāu ，牽牛、駕kha 車、駛田、捆豬、拖車…步步lóng-tio̍h用索仔，索仔tī 田庄所在是生活必須品。細條索仔用雙手撚，抑是tiàm 腳頭 u 搓就會使tsit ，大條索若無用家私頭仔來股，是無可能ê 代誌，過去作田人若有閒工，就三、五個招--leh ，互相tàu 相仝，phah幾條á索á khǹg-leh thang 用。

股索仔ài 用絞索仔機，he 是一套用木材做ê 工具，前車是四角型ê 框架，kah 黏tī 椅條頂，有三kâi 孔，穿三支ㄣ字形ê 鉸仔，前面會tàng結索仔，後面用一塊竹phuè 鑽三kâi 孔，拄好lop-tī 三支絞á，thiòng-á 三支同齊股tín 動；後車kan-nā 一支柴柱，半人kuân ê 所在鑿（tsha̍k）一孔，共款穿一支ㄣ字形ê 絞仔；另外有一粒羊仔頭形ê tīng 柴，刻三條溝，beh hō͘ 三股ê 黃麻khuà tī 溝內，tsiah 會tàng平平順順、pêⁿ-pêⁿ 正正股成一條索仔。

股索仔tio̍h-ài 三個人，一個huāⁿ 前車，顧hit 三支絞仔ê 運轉，絞正絞，一個固定後車，用倒手挽hit 支柴柱hō͘ 固定，koh著用正手股絞仔，而且ài 倒絞，另外一個huāⁿ 羊仔頭，huāⁿ 羊仔頭tsiah 是師傅，索仔絞會suí lóng著靠伊ê 功夫kap 指揮。

Tsit-mái 開始beh 絞索仔--lò͘：前車先絞一支絞仔，師傅提黃麻皮套tiàm 絞仔頭，然後一皮一皮紡，紡一條五丈長ê 無股ê 索仔，tsiah koh紡一條兩丈半--ê，五丈-- ê拗做兩kue̍h，套tī 後車，尾節套tī 前車，tsit-má 前車三支絞仔縛三條索，後車一支絞仔mā縛三條索，師傅掠羊仔頭uì 前車hit 旁套好勢，然後一聲開始，前後車股無停，師傅huāⁿ羊仔頭順索á股一直倒退lu ，後車一直股一直hō͘ 索仔khiú晉前，手挽腳kīng，驚做索仔siuⁿ līng ，索á若siuⁿ līng ，絞khit 來ê 索仔一定phàⁿ-phàⁿ，bē 堅固耐用。

後車ná會行晉前neh？因為索仔愈絞愈ân suah愈絞愈短，本來是兩丈半，絞好可能tshun 兩丈兩尺，kiu 三尺算真正常。一條絞好tsiah-koh絞一條，beh 大beh 細，由在師傅斟酌suah 黃麻，黃麻若suah濟，索á自然大條，黃麻若suah少，索á當然細條，若是絞兩股ê 索á就khah簡單，可惜bē勇mā khah pháiⁿ看頭，he 是師á工學絞，絞tshit-thô --ê。

「三兄弟股一條瓊麻索」，若有和協會齊，he 是真簡單，團結就是力量，看田庄人絞索á就是上好ê 證明，早當時阮田庄兄弟leh 絞索仔，無一定是親兄弟，卻是合作團結ê 力量是無teh 比，因為庄內ê 厝邊隔壁lóng若親兄弟，過去ê 庄腳人，m̄ 免去強調啥物『敦親睦鄰，守望相助』，庄頭ê 安全就顧kah 好勢好勢，時代leh 變，社會一直變遷，古早味，古早ê 人情味，使人懷念。

「三兄弟絞一條黃麻索」ê 『團結力量』，會tàng hō͘ 有心愛台灣ê 鄉親兄弟做參考，「團結」ê 台灣，tsiah 是有向望-- ê。

【註解】： 1.瓊麻：khîng-muâ。2.纖維：tshiam-uî。3.韌：jūn。4.股：kó͘。絞。5.索仔：[繩子]。6.kài 濟：真濟。7.擔擔：taⁿ-tàⁿ。8.米luâ ：米籮。9.liāu ：[纏繞著綁物]。10.kha 車：駕牛ê 器具。11.步步：ta̍k項。12.撚：lián 。13.腳頭 u ：[膝蓋]。14.搓：so。15.家私頭仔：工具。16.khǹg-leh thang 用：[放著備用]。17.kah 黏tī 椅條頂：[架在長板凳上]。18.三kâi 孔：三個洞。19.竹phuè ：[竹片]。20.lop -tī ：[套進在…]。21.thiòng-á ：thìng-hó(聽好），可以。22.戳：tsha̍k ，鑿。23.tīng 柴：[硬木頭]。24.khuà tī ：[擱置在…]。25.huāⁿ 前車：操作機器叫huāⁿ。26.絞正絞：[右旋轉]。27.挽：bán，[用力挽住]。28.正手：[右手]。29.倒絞：[反轉]。30.無股ê 索仔：親像大條紗仔。31.拗做兩kue̍h ：[折成兩節]。32.倒退lu ：[倒退走]。33.khiú：giú 、[拉]。34.手挽腳kīng ：[手腳並用、穩住木柱]。35.傷līng ：[太鬆了]。36.phàⁿ-phàⁿ ：[鬆鬆的，不夠堅固]。37.ân ：[緊]。38.kiu：[縮]。39.suah 黃麻：[一片一片加黃麻下去]。40.bē 勇：[不堅固耐用]。41.和協會齊：[同心協力]。