《哈佛台語筆記》

 | | | 轉寄

序　上崎•哈佛•落崎

作者 李勤岸 2007.04.01

看過一齣電影，背景是哈佛大學，故事是leh演一個哈佛校園邊仔ê homeless（遊民）及一個哈佛學生ê友情。有一遍，這個homeless tuè hit個學生入去教室旁聽，聽著教授講ê話伊擋bē tiâu就kā伊反駁，講kah規篇道理，全體學生suah一直kā拍pho̍k仔。下課了後，伊講一句真心適ê話：「此後我ê人生開始行落崎--lah！」伊講伊已經tī哈佛教過課--ah，koh來當然就是落崎。

我tsit-má ê人生就是當teh落崎。

2001年熱--人我應聘去哈佛大學開台語課。2004年寒--人因為台灣師範大學台文所所長莊萬壽教授極力邀約，決定放棄哈佛ê教職，轉來台灣做伙拍拚。我想，台灣應該比哈佛koh khah需要我ê奉獻，所以我就轉來--ah。

Tī哈佛兩冬半，算--起-來過了真充實，除了教學，四界講演，mā寫兩本詩集，一本散文集。Hit兩本詩集《母語ê心靈雞湯》kap《大人囡仔詩》轉來就隨出版，這本散文集《哈佛台語筆記》拖到這陣tsiah出，有伊真特殊ê理由。

哈佛大學是當年美國文藝復興運動ê搖kô，美國文藝復興運動主張應該使用本土ê美語書寫美國本土。兩位重要ê領導人物愛默森（Ralph Waldo Emerson）及梭羅（Henry David Thoreau）攏出身哈佛，in tuà ê所在離我tuà ê Arlington mā真近。2003年母親節，同鄉會請我tī Emerson ê故居Concord演講，講美國ê文藝復興運動，然後做伙去拜訪梭羅ê Walden湖。當初in tsia ê作家旅行寫日記（joornal），所以若是熟似新朋友，為著表示熱情，通常會送家己ê日記hō͘對方看。我一開始到哈佛，就決定beh向in學習－－開始寫日記。我kā號做「哈佛大學台語筆記」，每工透早到學校，電腦拍--開，先寫一篇一千字左右ê日記tsiah講。後來，出發演講，tī機頂，tī旅社，notebook拍--開，隨時隨地攏會tàng寫筆記。甚至感覺作家應該隨身tsah筆記型電腦，親像畫家寫生按呢，會tàng就目睭所看kā「寫生」落--來。

一開始真認真寫，想講人哈佛今仔日會tàng成做世界第一ê大學，必然有伊值得咱台灣人學習ê所在。我既然來--ah，就好好仔kā觀察、體會、記錄，無定mā會tàng成做咱台灣教育ê參考。兩冬半，照講我ê joornal應該寫有幾若百篇tsiah著。可惜，寫一段間，討神就走來搶地盤，ah散文tō m̄-bat聽講有「神」，所以只好乖乖仔讓位。Koh來ê joornal就tshun標題及編號niā-tiāⁿ，想講以後總是會有時間來寫。其實無影，轉來台灣就一直無閒。這本冊就一直拖落去，無法度tshuē出時間thang koh轉去添寫hiah-ê標題。最近，感覺應該kā出出--leh，mā順suà kā哈佛ê斷斷--leh。

既然落崎，就接受落崎ê現實，mài koh ua̍t頭轉去看hit個高峰，mài koh懷念，mài koh比較，可能會tàng hō͘我落崎ê路行著khah bē hiah艱苦。

第二輯〈Essay•小品〉有收幾篇tī哈佛期間及進前所寫ê小品文，以及前前後後所寫ê短論，有關係語文運動--ê，mā有幾篇是我ê冊抑是台語文專刊ê序語、後記，以及三篇得獎感言。

第三輯〈Speets•講演〉收三篇tī哈佛期間ê演講稿。我tī哈佛教冊這段期間總共講三十幾場，坐飛機飛來飛去，平均一個月超過一場。Tī哈佛大學有講過三場。有一場tī燕京圖書館講ê〈詩想與詩行：Taiwanese Literature〉，引起中國學者圍攻，koh tī網路寫文章追擊，講我強調台語創作是「飲水不思源」，為著台獨不擇手段。我想，in永遠無法度了解台灣人堅持母語寫作就是因為beh飲水思源。可惜這篇演講無留講稿。附錄ê〈哈佛期間巡迴演講小事記〉錄我演講ê題目、時間、地點及對象。我2002年聯合Boston台灣人社團成立Boston 228紀念會，〈建構台灣人ê集體記憶〉就是第一冬舉辦紀念會ê演講稿。隔冬koh tī哈佛辦228紀念會。這場228紀念會有可能是哈佛四百冬來ê第一場228紀念會。我用台語講，由我ê學生葉介庭翻譯做英語。M̄是我無才調用英語講，我就是beh堅持一個母語運動者對使用母語ê堅持。