《哈佛台語筆記》

 | | | 轉寄

台灣文學系所新瓶舊裝？

作者 李勤岸 2008.07.27

br> Tī 時勢 ê 潮流及教育部大力推動之下，台灣文學系所 tī 這幾年來陸陸續續設立。到今年為止，已經有十幾間學校有設台灣文學系所。這是相當 hō͘ 人歡喜安慰 ê 一件 tāi-tsì。M̄-koh 咱若進一步詳細 kā 觀察，猶是 bē 禁 tit 萬分憂心！到底有 tó 一寡系所 in 所教 ê 是正港 ê 台灣文學，又 koh 有 tó 幾個只不過是 the̍h 新瓶來 té 舊酒？
咱用以下兩個憑準（criteria)來做檢驗：
一、台灣文學 ê 主體性
「台灣文學」tī 1979 年鄉土文學論戰以後 tsiah 開始 hō͘ 人提出來熱烈討論，到八○年代 tsiah 開始建立起台灣文學 ê 主體性。台灣文學是「以台灣本土意識為中心，描寫台灣斯土斯民」ê 作品。台灣文學是獨立自主 ê 文學，m̄ 是中國文學 ê 旁支抑是邊埵。
Tī 1997 年真理大學開始設立台灣第一個台灣文學系進前，台灣文學 ê 相關課程是開 tiàm 中國文學系下底 ê。中國文學系開台灣文學課自然 kā 台灣文學看做中國文學 ê 一部分。獨立出來 ê 台灣文學系所教 ê 台灣文學自然是以台灣為主體論述，若是教中國文學就 kā 中國文學當做台灣文學 ê 一部分或者是外國文學。客觀 ti̍k 來講，tī 台灣寫出來 ê 中國文學就是台灣文學 ê 一部分；若是 tī 中國寫出來 ê 中國文學就是外國文學。
假使因為教育部鼓勵設立台灣文學系所，就以原來 ê 中文系教授做班底繼續申請台灣文學系所，通過了後，招生 koh 規定 to̍h ài 是中文系畢業，考試 to̍h ài 考中國文學史，老師攏是原中文系 ê 老師，真濟原中文系 ê 重心課程猶原照開不誤。按呢，只不過是擴充原中文系 ê 地盤，爭搶教育部 ê 資源 niā-tiāⁿ,只不過是 the̍h 新瓶來 té 舊酒，掛羊頭賣狗肉。學生考 tiâu 了後難免會有受騙 ê 感覺。
按呢 ê 台灣文學系所咱 kā 叫做「假台灣文學系所」。
二、為培養母語師資
教育部出版 ê《教育白皮書》清清楚楚點明鼓勵設立台灣文學系所 ê 目的之一是「為培養母語師資」。
2001 年開始，九年一貫課程綱要要求國小到國中 ài 修母語，國小是必選，國中是選修。母語教育 tânⁿ 開始，母語師資十分欠缺，目前只有運用教育部考試通過 ê 三千外名母語支援教師，或者以校內在職教師另外修習母語課程來暫時應付。教育部知影這 m̄ 是久長 ê 辦法，近年內一定 ài 訓練專業 ê 母語教師出來。鼓勵開設台灣文學系所來培養母語師資是正確 ê 一條路。
問題是台灣文學系所開設以後，有 tó 幾個學校猶會記得這個目標？Koh 再加上教育部也無法 thang 管，只會 tàng kù-tsāi 伊發展。Tsiah-ni̍h 濟 ê 台灣文學系所有 tó 幾個系所有將母語當作考試科目？考 tiâu 了後 koh 必修母語學分？教師內底有幾個是研究母語 ê?就咱所知，有一寡學校甚至排斥母語抑是母語文學 ！ 這款 ê 台灣文學系所咱 kā 叫做「半仿仔台灣文學系所」。
通會過這兩個憑準，以台灣文學為主體，又 koh 重視母語 ê，tsiah 是真正 ê 台灣文學系所。請問，台灣到底有幾個「假台灣文學系所」？有幾個「半仿仔台灣文學系所」？又 koh tshun 幾個真正 ê 台灣文學系所？
─ 2005 年 10 月發表 tī《東海岸評論》202 期