《哈佛台語筆記》

 | | | 轉寄

向望咱攏m̄是罪人─《咱攏是罪人》出版後記

作者 李勤岸 2008.08.10

br> 這本詩集就是原來計畫 tī 2001 年出版 ê《海翁宣言》。大部份作品是 2000-2001 年間 tī 花蓮 ê 國立東華大學英美語文學系教冊 ê 這段時間所寫。其中有部份作品已經收入我 ê《李勤岸台語詩選》。
台灣雖然真細，m̄-koh 被稱做後山 ê 東部又 koh hiah-ni̍h 迢遠（remote)。對大部份 ê 台灣人來講，花蓮、台東是旅遊 tsiah 會去想著 ê 所在，平時 tī in ê 腦裡並無存在，去後山一 tsuā ká-ná 是出國旅遊 leh。咱若看新聞報導抑是一般人 teh 講台灣，攏講北部、中部、南部，真少會去講著東部。對我這個典型 ê「西部人」來講，東部 ê 經驗是真希罕 ê。這是我規世人到 taⁿ 第三遍踏 tī 後山 ê 土地。第一遍是大學時代三個同學 tsham 一個美國來 ê 老師相招 uì 台東行到花蓮。我有寫一萬字 ê 遊記。第二遍是大學畢業 tī 高中教冊 ê 時，tshuā 畢業生坐花蓮輪畢業旅行，hîn 船 hîn kah 足厲害，吐 kah 膽汁攏吐出來，其他 ê 印象攏無去 ah。第三遍 koh 來，已經是二十冬後。這遍 m̄ 是旅遊，是 tī tsia 工作，而且差一點仔就「移民」來 tuà tī tsia。若 m̄ 是哈佛大學開台語課程，我應聘來教台語，我會留 tī 花蓮做東部人。
2001 年九月，國校 uì 一年級開始實施母語教育，所以台語 ê 書寫標準化已經是迫切需要 ê 代誌。若是書寫無一致，拼音方案混亂，會 hō͘ 母語教師、hō͘ 學生囡仔頭殼疼，會 hō͘ 反對母語教育 ê 人做藉口，成做母語教育 ê 絆腳石。若是逐人攏會 tàng 放棄家己 ê「符仔號」，hō͘ 標記方式一致，書寫標準化，按呢母語教育就 會 tàng 順利進行；若無，咱攏有可能是母語運動 ê 罪人。這是當時我為按怎 beh 寫這首〈咱攏是罪人〉，koh kā 當做廣告詩，四界刊登，凡若刊這首詩，我 m̄-nā 無 beh 領稿費，koh beh 出廣告費。用意是 beh 喚起大家 ê「罪過感」，甘願放棄家己發明 ê「符仔號」，m̄-thang 做母語教育 ê 歷史罪人。等將來母語教育成功了後，tsiah koh kā 你 ê 發明貢獻出來，大家 tsiah koh 來參詳。若無，母語一旦若亡，khah 好 ê 標記法不過就是用來替母語寫墓牌而已。
母語教育 ê 實施是母語運動真重要 ê 一個里程碑。Tī 這以前，無管你對語言學偌外行，tsú 你去發明，各展各人 ê tsing-tsông，盡量去推廣、去相 tsèⁿ。He 是答嘴鼓【口水戰】ê 時代。母語教育一旦開始實施，就已經進入拳頭母【肉搏戰】ê 時代，tèⁿ 頷頸根相 tsèⁿ 攏是加了嘴瀾！有才調就去編教材，教材編出來有出版社願意投資出版，有學校 beh 買，有老師 beh 教，有學生 beh 學，koh 學會曉，按呢就生存；無，鼻仔摸 leh，民主風度 mah。
這本詩集分做三部份，由 Marian，Ting 及 Yin 三個人翻做英語。這純粹是用翻譯者來分輯，m̄ 是以創作時間、地點抑是內容。感謝 in tsiah-ni̍h suí-khuì ê 英文翻譯。
感謝俊育兄初校 koh 翻寫全羅，麗雪、淑鳳、湘雅 及杏娥 ê 詳細校對。
希望咱 ê 母語教育成功，母語文學出頭天，咱攏 m̄ 是罪人。
─ 2003.7.23 tī 哈佛大學東亞語言文明系