《哈佛台語筆記》

 | | | 轉寄

講演之旅第二站：柏克萊

作者 李勤岸 2007.05.27

主辦這場演講ê柏克萊台灣主權學生社kap台灣同學會本底希望我會當改tī 週間講，因為拜五ta̍k個人攏會有真濟活動，驚siuⁿ少人來。我做會到ê上早是拜五暗，因為拜四ê晡哈佛有課，愛koh坐九點鐘ê飛行機才會到西岸。南灣台灣同鄉會希望我khah uàⁿ轉--來，通tī in禮拜日ê年會講，我上uàⁿ拜一愛轉來，因為拜二ê早á有課。結果in無法度tshiâu我轉來ê班機，所以南灣彼場只好取消。

Sibyl來接我，i是第二代台美人，父母是客人，搬轉去台灣--ah，i kap小弟猶留tī舊金山。I舊年Berkeley政治系畢業，本底有食頭路，因為愛beh專業寫作，kā辭掉，已經完成一本描寫第二代台美人ê英文小說，最近beh出版。I ê暗有代誌無法度去聽演講，所以規tsuā路一直問問題，大部份攏是我演講會講著ê物件，嘛算先hō͘我慣勢盈暗ê英語演講。我猶m̄捌公開用英語演講過，出發前，才知影主辦ê是第二代ê台灣囡仔，大部份聽無台語，嘛希望吸引外國人來。

下班時間車塞kah足厲害，uì機場到學校，開點半外鐘。Rosie來接我去盈暗beh tuà ê Faculty Club，然後tshuā我去學校附近ê日本餐廳食定食。Rosie是Berkeley台灣主權學生社ê發起人，i teh讀政治學博士班，最近taⁿ-á 結婚， in翁是一個白人，捌tī Berkeley台語班學台語，i無beh 學華語，因為中國人壓迫台灣人。

趕到會場抵好8點。愛koh設定我ê筆記電腦kap投影機，看人已經bē少，koh陸續一直入來，過十外分，完全設定好勢，規間已經tsiⁿ kah tsa̍t-thóng-thóng，主持紹介我ê學生，紹介了只好khiā tī門口。本底kā我講大約會有30人，結果超過一百人。主辦單位想無到會有tsiah濟人，嘛無準備mài-khuh。我知影遮ê東亞語文系真濟中國來ê教授，知影研究閩南語ê中國人丁邦新嘛tī遮，看內底有幾若個老輩ê人kap外國人，我實在會緊張。

我hō͘安排講演之旅ê全美台灣學生社八個題目，Berkeley 這站beh聽四ê ，kā題目號做：台語文學：台灣母語運動新世紀新面貌，in有tī網路發消息，特別講我嘛有beh比較台語kap廈門話ê無仝。

我就真正uì台語kap廈門話ê無仝講起，koh講日本時代到taⁿ兩個殖民語政策ê影響，台語文學ê三個復興運動，最近台灣母語運動ê三個里程碑，母語文學運動ê六個成就，koh唸幾首我ê詩作，最後結論：台灣人beh脫離悲情ê 殖民語文學，建立家己ê母語文學，邁向台灣ê國家文學。

反應不止á熱烈，真濟人提出問題討論。有幾若個人會後koh來參我討論。 無人是惡意挑戰，並無中國教授來踢館。其中有一個白人問講新加坡是一個國家，是按怎in無想著beh用母語寫文學？我講he是因為in ê領導者無母語文化ê見識。聽眾內底有一個新加坡人會後有koh來參我討論這個問題。

我應該kā我ê英文講稿先拍好，練講一遍，通來講hō͘第二代kap外國人聽。Hō͘ in瞭解台灣ê母語運動kap台灣人追求國家自主ê 決心。後站密西根大學嘛希望我按呢做，洛杉磯嘛希望按呢，二月beh tī哈佛大學辦ê國際第二代台灣學生年會嘛仝款愛用英語。按呢嘛算kā台語文運動國際化。

Berkeley有tsiah濟人對台語有興趣，in ê台語課爭取10冬猶bē當成做正式課程，實在無道理，照講in比哈佛大學koh khah有條件開台語課tsiah tio̍h。有人kā我講in ê東亞語文系ê中國教授講台灣m̄是一個國家，bē當承認台語是一個語言，所以bē當正式開課，最後kan-nā算tī亞洲研究內底ê社團活動，一開始請長老教會牧師來教，後來學生家己教，學校hō͘ in半學分，koh bē當有成績。聽講賓州大學、Stanford大學嘛有teh開台語課，情形bāng有khah 好無？ 我kā學生講in koh去爭取，kā講人哈佛tō會當開--a，咱是按怎bē當？我koh答應in若是tshuē無受過語言學訓練ê教授，我願意過來。

2001/11/21

（Tsit篇本底是《哈佛台語筆記》輯一 Joornal•筆記－哈佛校園聽著台語ê鐘聲ê第8篇）