《《原鄉．夜合》 客語詩集》

 | | | 轉寄

田舍臨暗 Thièn sa lìm am

作者 曾貴海 白話字：邱淑華 2008.01.06

田舍臨暗
Thièn sa lìm am
煮熟ke紅日頭
Tsú su̍k ke ngit tèu
龜做一粒大圓粄
Kuî tso yit lia̍p thai yàn pán
對筆直ke檳榔樹中間
Tui piat tshṳ̍t ke pîn lòng su tsûng kiân
慢慢蹓落雲層ke梯仔
Man man liu lo̍k yùn tshèn ke thôi é
坐在海面搖來搖去
Tshô tshai hói mien yèu lòi yèu hi

夜色像細雨毛仔
Ya set tshiong se yí mô é
靜靜飛落鄉村田舍
Tshin tshin pî lo̍k hiông tshûn thièn sa
田坵上ke人影
Thièn khiû hong ke ngìn yáng
愈看愈黑愈像一堆小稈棚
Ya̍t khon ya̍t vû ya̍t tshiong yit tôi se kón phàng

一群又一群鳥仔飛過來
Yit khiùn yu yit khiùn tiâu é pî ko lòi
啄走臨暗ke光彩
Tuí tsèu lìm am ke kông tshái
飛歸鳥竇
Pî kuî tiâu teu

天地分一大塊黑布矇著目珠
Thiên thi pûn yit khuai vû pu mâng tén mu̍k tsû
掀開來
Hiân khôi lòi
變出一隻大月公
Pien tshut yit tsak thai ngia̍t kûng