《蘇老師 ê 台語教室》

 | | | 轉寄

記tī頭殼碗ê故事

作者 鍾蘭英 2023.11.26

記tī頭殼碗ê故事 鍾蘭英(我是客家人teh學寫台文)
講著美濃鎮竹山溝，真濟人tio̍h會講，竹山溝有一欉真大欉ê檨仔，邊á有
一間土地伯公(客家人ê福德正神)。聽人講，hit欉樹仔足老ah。我細漢ê時
bat問過阮阿公，伯公樹幾歲ah?阿公講：經過幾代人ah，至少200外歲
ah。伯公樹ê樹kho͘足粗勇。阮細漢ê時，定定幾個囡仔手牽手，圍著伯公樹
ê腰，做伙唱童謠，唱一遍koh一遍。tú-tio̍h外面起風ê時，囡仔隨衝到伯
公樹跤搶lak落ê檨仔。目只有金金看著黃gìm-gìm koh飽tīⁿ ê檨仔lak
tī塗跤，這時逐个目睭足利，跤手緊，相爭koh刺激。伯公kah大樹互相做
伴，互相倚靠，大樹陪伯公，伯公保庇大樹，一日koh一日一年koh一年。

有時陣透早起床，為著beh去伯公跤khioh檨仔，檨仔是當時阮愛食ê物件。
阮細漢ê時，囡仔定定tī伯公跤sńg tshit-thô物仔，大人tī-hia答喙
鼓，講人ê閒仔話。鍾家、曾家ê夥房（家族）有人生囡仔、有嫁娶、農作
物豐收、賣大豬、囡仔考著好學校、揣著好頭路，一定愛tshoân牲禮祭拜
伯公，緊kā好消息報hō͘伯公知，感謝伯公ê保庇。伯公樹到今將近300歲
ah，koh枝葉旺盛、果實濟濟，實在無簡單。伯公樹飼我大漢，伯公保庇我
日日平安。我愛伯公愛大樹，祈願伯公kah大樹互相倚靠，世世代代bē分
開。