《受恩蒙福的一生》

 | | | 轉寄

新ê機會

作者 林宗要 2010.10.10

用西結十八：20-24、30-32

人一生ê成敗kap機會有極密切ê關係。因為機會存在tī人生中間，人一生ê成敗，決定tī是m̄是掌握機會。真tsē成功ê人，通常是真gâu利用時間，把握機會。因為光陰ná箭，sut一下tio̍h過去啊，buē等人。希臘人bat有tsit種ê傳說:「機會ê前擴有兩條辮子，後腦光溜溜，一枝頭毛lóng看無無」，這teh說明機會來ê時，每一個人lóng有可能kā伊掠tiâu，因為伊ê前擴有兩條辮仔，真簡單to̍h掠會tiâu。一旦錯失良機，m̄管你用toh一種方法，lóng無法挽回。

希臘人ê傳說真有道理，當機會來臨ê時，真簡單掌握，beh共伊掠tiâu m̄是真困難，若錯失機會，beh挽回就oh了。咱tiāⁿ-tiāⁿ聽tio̍h「Ài把握機會，bē-tàng錯失良機」，可見機會kap人生關係juā-ni̍h-á密切ah！

咱lóng知影，人ê一生是tuì「機會ê累積」，機會決定人ê成敗。所以俗語講：「時間to̍h是金錢」，有ê時「時間比黃金koh-khah值錢，koh-khah貴重」。因為黃金若是失去thang koh再得，但是機會suah 無法度。一旦失去機會，永遠無可能koh tńg來。「把握良機」非常重要，若無「失之交臂」就可惜了。

維也納有一位名醫叫勞爾貝斯，醫術非常高明，因為手術buē流血，名聲透全球。有一pái，伊到美國講學，順續做美西一日遊，當伊家己一個人tī 人tuà ê社區散步ê時，狠狠落大雨，伊馬上走uì siōng近ê一間厝，請求hō͘伊避雨，結果女主人應門了後，真buē耐性ê講：「請到別位去，阮tau麻煩已經有夠tsē啊。」，然後kā門關起--來。Tsit位醫生真無奈ê沃雨行tī路上，tú-tio̍h一台車，tsiah載伊tńg去旅館。過幾工，新聞刊出勞爾貝斯tńg維也納ê消息，紹介伊ê醫術kap相關醫療相片。Hit位拒絕伊請求避雨ê夫人看tio̍h了後，非常後悔，無接待tsit位不速之客，因為tsit位醫生to̍h是伊致重病ê tsa-bó͘-kiáⁿ siōng好ê救星。上帝送伊上門，伊suah bē曉把握機會。

Tuì頂面這則故事，hō͘咱了解tio̍h箴言第三章27節ê真理，伊講：「你ê手若有行善ê能力，bē-tàng推辭。」傳道書九章十節mā án-ne講：「你ê手該做ê事，ài盡力去做，因為陰間無khang-khè，無計畫，無知識，無智慧，但是你beh去--ê，to̍h是tsit-ê所在」續落來koh講「Tī這個世上，真gâu走sio-jik ê人無一定得獎，勇敢ê人無一定相戰to̍h贏，聰明ê人，無一定有飯食，機智ê人，無一定好額，khiàng腳ê人，無一定tī kuân位，時運左右一切」。（傳道書九：11）時運to̍h是機會。

上帝hō͘人ê機會lóng是平等--ê，無論貧賤富貴lóng仝款，無對誰較好。差別ê是人對機會ê處理態度是m̄是積極、謹慎。Tiāⁿ-tiāⁿ聽tio̍h有人怨嘆講「無機會」。Kah-ná the怨嘆上帝無公平，無hō͘伊機會，其實m̄是án-ne，上帝hō͘任何人ê機會lóng相仝，無偏心。拿破崙講：「『怨嘆無機會』是弱者ê藉口。」一般來講，各人所處ê環境，mā可能有所無仝，但是若態度積極，真gâu把握機會，無一個buē成功ê。

社會上一kuá成功ê案例，研究in成功ê原因，lóng是真gâu把握時機。當然mā有一kuá是靠祖先ê庇蔭，繼承了一kuá本底to̍h有ê基礎，tsiah好額成功。但是tsiah-ê人若無kā良機把握hō͘ tiâu，mā會栽tī失敗ê洪流，毀掉先人所hō͘ in ê恩澤。

Tsit-má咱同齊來反省咱ê信仰生活，基督徒應當以上帝hō͘ in ê信仰機會，去提昇基督徒屬靈生活ê層次。上帝hō͘人ê機會是仝款ê，但是往往因為基督徒ê態度無仝，所表現出ê信仰層次mā有差別。

信仰生活ê重點，tī基督徒如何面對上帝所賜ê信仰機會，如何掌握問題，進一步koh有新ê屬靈造就，mā to̍h是靈命更新。基督徒對上帝所hō͘ in ê機會ê態度，往往決定in ê信仰生活ê品質好bái。咱uì下腳幾方面來看：

（一） 淨化ê人生
基督徒ê時常生活tī宗教氣氛十分厚ê環境中，tī tsit種氣氛薰陶之下，hō͘伊成做符合上帝旨意ê人，沐浴tī tsit ê環境ê基督徒，當然是上帝所喜樂ê。

若是有ê人久長浸tī tsiok厚ê宗教氣氛中，suah失去了信仰ê警覺性，結局無法度表現出基督徒美好ê一面，無法度hō͘家己ê行為，達tio̍h如聖經頂面所描述ê「作光kap作鹽ê境界」。甚至比非教徒iáu khah hâm-bān，koh-khah hō͘人討厭，tsit種基督徒ê存在，m̄-nā buē榮耀上帝，顛倒會hō͘上帝ê名聲受tio̍h侮辱。Tsiah-ê人雖然身穿基督外衫，suah無基督ê真道tī伊ê內心，對上帝ê救贖無清楚，對聖經中ê真理mā m̄是真了解，普通時仔做禮拜mā只是應付應--付，完全無接納主耶穌tī伊ê心中，koh-khah無像哥林多後書五章17節所講--ê「無論siáng，一旦有了基督ê性命，to̍h是新造ê人；舊--ê已經過去，新--ê已經來臨。」Tsit種信仰體驗。

Tsiah-ê kan-ta有外表ê基督徒，心kap人ê無一致，伊ê信仰是無真實--ê，in無徹底ê把握上帝所hō͘ in淨化人心ê機會。Ná親像主耶穌批評當地ê法利賽人仝款，講in ê人生比如粉飾ê墳墓，外表美觀，但是內面suah藏tio̍h臭骨骸。只有虛偽ê外表，上帝所要求ê公義，仁義tī in身上lóng tshuē未tio̍h。完全是假仙假ta̍t。In ê心思意念無hō͘上帝所賜hō͘人ê機會所代替，靈命無更新，舊我無去除。雖然tsiah-ê法利賽人tī當時ê社會地位非常kuân，但是實質上in ê存在是完全無價值--ê。主耶穌形容in是青盲ê嚮導，是毒蛇、毒蠍之流（馬太23章33節），in是無法度逃避上帝ê審判--ê。Kah-ná馬太廿一章，主耶穌咒懺hit叢無花果樹仝款。只有美麗ê外貌，suah無實質ê內容。

Tī信仰生活中án-ne是一件真驚人ê tāi-tsì。信仰好ê人，伊是承受了上帝賜hō͘人，有淨化人心，改變人性恩典ê機會。所以基督徒若buē-sái成做新造ê人，就失去了做基督徒ê意義。Tio̍h會hông當做廢物tàn-sak，由人蹧躂。有一個源潔流清ê故事，án-ne講：古早時某部落，有一口公用井，有一工，忽然臭氣沖天，無法度lim，經由開會討論，認為是鬼怪作祟，道士作法無效，用消毒劑消毒mā無效，最後派一個人落去井內探勘，結果發現死貓tī內底，將伊撈起來並淘井，徹底清潔tio̍h有效。人心mā仝款，人若無上帝所賜ê機會淨化，伊ê心思意念有可能是濁濁lah-sap ê。

（二） 新ê機會，hō͘人看見上帝
主耶穌tī八福中講--著心肝純潔ê人有福lah！因in ài-beh看見上帝，這to̍h是上帝賜hō͘人機會，siōng具價值ê事實。舊約聖經記載，人buē-sái看tio̍h上帝，因為看tio̍h ê人必死。M̄-koh tī上帝賜hō͘人ê新機會，耶穌基督降臨ê tsit件tāi-tsì頂面，hiah-ê人lóng ē-tàng藉tsit-ê事實看見上帝。Tú親像八福中主耶穌所講--ê。另外耶穌teh面對十字架ê道路中，bat向伊ê學生講過：M̄免擔憂、煩惱，ài確信上帝，祂只是先去預備地方。我beh去ê所在，hit條路lín是知影--ê。多馬問講：「主ah！阮m̄知你beh到toh位去，怎樣會知影hit條路neh？」，耶穌講：「我to̍h是道路、真理、性命；若m̄是藉tio̍h我，無人ē-tàng到老父hia去」（約翰十四章）。腓力iáu要求主耶穌ē-tàng「將天父顯現hō͘阮看，án-ne阮就心滿意足啊」。對腓力所提出ê問題，主耶穌講：「腓力，我kap lín作伙已經tsiah-ni̍h久啊，你iáu m̄-bat我mah？」Siáng看見我，就等於看tio̍h天父。這kap舊約所講ê lóng仝款，上帝將伊ê孤kiáⁿ賜hō͘世人，目的是hō͘人藉tio̍h tsit-ê事實去體驗天父ê存在。這是上帝ê恩典。To̍h是新約ê恩典。因為世人本身滿是lap-sap，無可能親近上帝，需要靠主耶穌所流ê寶血來洗清氣，tsiah ē-tàng得tio̍h救贖。主耶穌ê降世，to̍h是上帝賜hō͘世人唯一ê機會。人ài藉tsit-ê機會，去建立kap上帝關係；經由信心去承接上帝賜hō͘咱ê，用真實ê信仰kap主耶穌契合了後，內心ê罪惡lap-sap lóng會hō͘伊洗清氣，tsiah成做心肝純潔ê人。Tī-tsia有福了，必ē-tàng看見上帝。

主所賜ê機會，完全屬於每一個人，無像當時ê猶太人所講ê諺語：「老爸食酸葡萄，連kiáⁿ兒ê嘴齒lóng感覺酸。」（以西結十八：1）teh信仰ê領域內底，每一ê人面對上帝賜予ê機會ài家己負責，buē-sái父子互相影響，互相牽累。以西結十八章二十節講：「好人the-beh因為行善得tio̍h報賞；Pháiⁿ人beh因為作惡受懲罰」。Tsit點基督徒應當認bat清楚。Tī教會的確mā有tsit種案例，老父信仰值得o-ló，受人景仰，但是kiáⁿ兒suah無視上帝hō͘ in ê信仰機會。Tī舊約聖經內底以利kap撒母耳ê故事to̍h是。Tsit種因為看見上帝tsiah做上帝囝兒ê事實，是ài建立tī人對上帝所賜ê機會，表現tī個人ê信仰生活內底。這是做一個基督徒ài嚴肅面對，而且ài kā伊深思。信仰雖然是一個人ê問題，但是做人老父老母iáu buē-sái推卸責任，自細漢就ài教育kiáⁿ兒認bat上帝，hō͘ in成做心肝純潔。俗語講：「父母不保kiáⁿ兒賢」。Tio̍h是講，tio̍h算父母ê品德koh-khah án怎kuân，mā buē-tàng保證每一個kiáⁿ兒lóng會像父母仝款。所以，做人父母--ê千萬bē-tàng疏忽kiáⁿ兒ê宗教教育。

（三） 用美好ê見證生活來回應上帝所賜予ê機會
當一個人面對上帝所賜予之機會ê時，並m̄是用伊ê身分地位或者先祖對信仰ê貢獻來回應，是用伊本身是m̄是真誠來決定。馬太福音第三章，施洗約翰對當時ê社會領導人，亦to̍h是法利賽kap撒都該人發警語就thang知影。Tsiah-ê人有不哩仔自負，認為靠tio̍h社會kap宗教信仰ê地位，就thang優先進入上帝國。因此，約翰提出忠告，嚴厲責備。警告世人，人kap上帝ê關係m̄是決定tī外表或者傳統，是決定teh個人ê實際行為。先知以西結tī舊約聖經內底，mā特別強調這一點。

以西結強調，有信仰ê人，必須用美好ê見證去回應上帝所賜ê機會。M̄是靠外表或者世襲。先知用二種人來比喻，to̍h是義人kap惡人。上帝ài ê是態度真誠，生活上koh有美好ê見證，tsiah m̄是身上hiah-ê稱呼。義人e所以hông叫做義人，是因為伊ê行為符合上帝ê要求，良善美好。若是義人m̄ koh做善事，盡做一kuá pháiⁿ人所做會hō͘人怨恨ê pháiⁿ tāi-tsì，án-ne伊過去所做ê善事，就無koh hông紀念，伊ài因為犯罪來死亡，以西結十八：24 tsit句話有真發人省思。

人ài不斷來結出符合上帝美旨ê果子。這是咱信仰生活ê重點。先知bat用惡人做例來告誡咱，人若ē-tàng真心改過完全歸向上帝，上帝就bue7ka7伊過去所犯ê過錯記leh。只要伊誠心悔改，上帝會赦免伊，buē koh去追求伊。這to̍h是上帝ê恩典。

就提掃羅kap大衛王來講！大衛王ê手段殘忍殺害人ê翁婿，奪取部屬ê bó͘（撒母耳記下十一：12），但是掃羅是犯了無順從上帝旨意ê錯，自作主張（撒母耳記上十五章），兩者比較起來，若用現代司法量刑，應該是大衛王罪khah重，但是大衛王suah khah受tio̍h上帝悅納，原因tī 二人對上帝所賜ê機會，表現出無仝ê態度。掃羅認為家己無m̄-tio̍h；大衛王suah是誠心悔改認罪。這兩人ê故事，時常hō͘神學家提來講。上帝所喜樂ê是憂傷痛悔ê心靈（詩篇五十一：17），咱若讀詩篇五十一篇，就會明白大衛王為啥物會hō͘神喜樂ê原因，tī伊ē-tàng用懺悔ê心，去回應上帝所賜hō͘伊ê機會。

咱koh來看新約時代ê保羅kap猶大。保羅對基督hō͘伊ê機會，伊會用真誠悔悟ê心去面對；但是猶大suah無。這to̍h是猶大敗亡ê原因。保羅mā因此成做基督教史上非常重要ê人物。

總講一句，tī人生ê旅途中，上帝不斷ê賜機會hō͘人，面對機會，咱ê表現可能有m̄-tio̍h，但是失敗ê時，ài有憂傷痛悔ê心靈，真誠悔改。因為上帝是無希望任何人滅亡--ê。（以西結十八：13）