《受恩蒙福的一生》

 | | | 轉寄

靈巧kap純樸

作者 林宗要 2010.10.24

馬太十：16

世界上有真tsē問題真pháiⁿ解決，尤其是民族kap民族之間kap因為宗教引起ê糾紛siōng-kài複雜，永遠是人類ê問題，現今民主kap共產陣營，已經m̄是以前hiah-ni̍h分明ê對峙狀態，美蘇關係mā已經改善，美國kap中國大陸mā開始來往，但是tī人ê問題上，á是無法度完全解決。

Tī tsit-má世界中，咱四界thang看見tsit種因為民族或者是宗教信仰所引起ê衝突，譬如1995年3月巴基斯坦kap土耳伊兩國發生ê嚴重衝突，死傷人數相當tsē，to̍h是因為無仝宗教信仰所引起。回教極端激進教派，khah buē用暴力砰掉in心目中ê敵人，像紐約世貿中心大樓hông khǹg炸彈爆炸，死傷嚴重，koh有一位印度人作家魯西迪（英國籍）寫一本小說有關回教ê小說，hông認為是侮辱阿拉，hō͘極端教義派下追殺令了後，不得不逃去英國避風頭，tsit種情形kap基督教ê作風完全無仝，tī無guā久tsìn前，有一部電影叫「耶穌最後ê試探」teh播送ê時，有一kuá基督徒bat tī街頭抗議、示威，過程相當理性kap溫和，mā無發生什麼問題，tsit部片雖然是用聖經中耶穌基督做主題，但是伊ê內容suah完全kap聖經脫節，電影內充滿性kap暴力，迎合現今低道德ê人類ê娛樂心理，同時一káo好奇ê基督徒，mā去排隊買票看，增加片商收入，tī美國四大城市ê電影院人滿滿，tuì tsiah-ê事實，ē-tàng了解基督教kap 回教ê基本差異。早期ê 回教徒ê標幟，to̍h是一手提可蘭經，另外一手提刀。中世紀時回教ê勢力差一點仔侵佔所有基督教ê國家，hit種強勢作風ê傳教方式，到taⁿ猶原盛行tī 回教國家，hiah-ê極端回教份子，猶原用劫持、暴力、綁票等驚人手段teh進行in ê殘酷惡行，án-ne咱thang看出，tsit兩種宗教信仰ê無仝。

Khiā-tī純信仰ê立場，tsit種用暴力做手段來達tio̍h目的，實在m̄是宗教信仰ê基礎，耶穌tī聖經中提醒學生了解一ê真理，to̍h是傳播福音，m̄是用強者ê武力去征服弱者，是用疼心去感化弱者，這to̍h是主耶穌tī-tsia所講ê：「Ài注意，我派lín出去，好親像kā羊送入去狼群中仝款」，這是一件相當危險ê事工，mā實在是困難重重ê tāi-tsì，tī面前tsit種危險性真kuân ê挑戰ê時，伊用代表靈巧ê蛇，kap象徵神聖ê粉鳥ê兩種性格，是面對tsit種kuân度危險ê時所ài具備ê特性。

Teh傳福音ê事工上，確實充滿tio̍h相當ê困難kap危險，tsit-ê事實，咱thang tuì二千年來教會宣教史發現，無論tī任何地區，只要福音初到ê所在，lóng有極大ê困難kap迫害，基督徒ài面對án-ne狀況，必須ài像主耶穌所講ê「Lín ài像蛇仝款ê靈巧、像鴿子仝款ê馴良」。伊ê信仰生活，若ē-tàng完全體會耶穌tī-tsia所講ê靈巧kap純樸ê時，必定是真完美、自然，tuì伊ê信仰所經營出來ê生活，就會有美好ê結果。因為通常tī人生中產生ê真tsē問題kap困擾，lóng是欠缺tsit種靈巧kap純樸ê心性所引起--ê，人ê一生若具備了tsit兩種特質，伊ê生活狀況必定會khah成熟kap完美，這to̍h是發揮基督徒信仰決定性ê事實，所以耶穌tī-tsia所講ê問題，若ē-tàng tī人生生活中好好á運用， án-ne伊ê信仰kap生活是值得肯定ê，伊ê生活內容ē-tàng發揚光大，tsit種生活，to̍h是榮耀歸主ê生活，是基督徒人生ê全部。

確實，基督徒tī現實生活中，必須具備充分ê智慧，因為伊是幫助kap化解人生問題重大ê因素。咱lóng知影，一個人tī社會上，是m̄是ē-tàng善用靈巧，是伊ê人生成敗ê關鍵。若真gâu運用伊，加減對伊ê人生ê運作，lóng有正面ê幫助，無論teh kap人ê往來，以及專業ê經營上，伊lóng真有幫助，tī聖經中，關於伊ê論述真普遍，尤其是詩篇kap箴言，關於智慧、靈巧ê教導bē少，整體上咱ē-tàng講，有智慧ê人生，會帶hō͘人生真tsē富裕kap福氣ê生活，伊ê人生teh智慧ê引tshuā之下，就ē-tàng合情合理，因此會體驗tio̍h真tsē人生正面價值ê生活。

Tī聖經人物中，約瑟用伊ê智慧，成做hit-ê時代ê偉人，約書亞mā是真有智慧ê人，所以ē-tàng繼承摩西帶領以色列人進入迦南地，完成艱難使命。所羅門王mā是真有智慧ê人，當上帝向伊顯現ê時，伊只求智慧，來方便領導上帝ê選民。咱thang tuì伊判斷gín-á以及真假花ê tāi-tsì，充分看出伊ê智慧，可惜伊因為墮落tsiah 名聲不保。司提反是符合初代教會選執事ê條件，是一個充滿智慧ê人，因此伊做真好ê事工，是第一位殉道者，可見智慧tī人生生活中ê重要性。

因此主耶穌教學生ài「靈巧像蛇、純樸像粉鳥」，因為主耶穌深知基督徒用單純ê信仰beh生存tī複雜社會中，必須ài有相當ê警覺性去評估屬於家己，有利teh信仰生活ê種種行為。

（一） 世上之ê賢人（有智慧ê人）
Tī歷史上有真tsē智慧人物，對人類有正面ê作用，但是mā有人用伊ê 才智去做一kuá對人類有負面不法ê tāi-tsì。Tú親像頂面聖經中所講ê，真有智慧ê人物，tsiah-ê人lóng真gâu運用伊kuân度ê智慧。
Tī中國歷史上mā出現真tsē有kuân度智慧ê人物，比如古早ê周公、孔明、……Tī伊ê性命中lóng有真優秀ê智慧表現，比如孔明ê空城計，若m̄是有kuân度ê智慧，實在是buē-sái去冒險，伊ê主因tī伊真清楚對方teh想什麼，亦to̍h是看破對方腳手，因為tsit-ê 事半功倍。戰國時代齊國ê晏子，mā是真有智慧ê人物，伊用二粒桃仔刣三ê士ê手路，是有真kuân智慧ê人物思考ê結果。通常tī人間社會中，tsit種智慧運用tī政治kap商界khah-tsē，尤其是政治人物ê智慧，往往關係tio̍h人類切身福祉，因為有影響力ê政治人物，ē-tàng造福人群，mā會hō͘人民tī痛苦之中，用咱國家目前ê政治環境，實在是非常無尊嚴ê政治實體，咱ê總統beh出國，處處受tio̍h阻礙，伊主要原因為何？是tī過去ê政治人物所造成ê悲哀，六十年代以前，咱是聯合國ê席位，koh來強調國家ê統一，kám m̄是比現在ê情勢koh-khah有利mah？可見政治家ê智慧對人民ê好kap不幸有決定性ê tāi-tsì。

Koh用sing-lí人ê觀點來看智慧，hiah-ê正派經營ê sing-lí人，in具備比一般人koh khah有智慧ê判斷kap分析能力，甚至有果敢ê意志去冒險，mā to̍h是tī別人iah未做tsìn前to̍h先料想tio̍h。

Tī信仰ê世界，mā真需要智慧去配合，因為咱ê信仰生活，以及教會ê經營，lóng是tī現實ê人生社會中，若是teh信仰中，若欠缺智慧ê運作，往往會引tshuā人ê信仰建立tī偏差ê智慧有關，比如美國大衛教派、日本ê真理教派、我國tī 1996年10月發生宋七力顯相館、妙天禪師、清海無上師…等等事件，但是若變成the感情用事，無理性來制衡ê時，往往會發生弊端，近來台灣教會靈恩運動，kap認為貝理斯是流奶kap蜜之地去鼓勵基督徒移民，lóng已經造成真tsē明顯ê問題。

（二） 智慧安在？
若用人生ê狀況來思考ê時，靈巧或者智慧，thang uì天生kap日後所有--ê，因為人有遺傳因素，因此teh相親ê時，每一個人lóng真注重先天因素ê條件，但是koh-khah重要ê是日後環境kap教育，mā to̍h是人格ê塑形是比任何事實koh-khah重要，一個本來tio̍h優秀ê人，若tī偏差ê家庭大漢，伊ê所建立ê人格是無完美ê人格，試想伊所有ê靈巧，m̄-nā對家庭無幫助，顛倒變成家庭ê問題。若是一個智力中等ê人，若tī良好ê家庭環境中大漢，有明理kap高尚ê父母thang做伊ê人格形成背景ê時，伊ê人格必定理想koh成熟，對伊ê人生kap社會lóng有積極kap有意義ê價值。

因此靈巧tsit-ê問題，必須ài有khah廣闊kap多方面考慮，因為tī咱社會中，存在真tsē惡質koh有計謀ê人，tsiah-ê人是tī伊ê日後環境中所造成，tsit-ê問題，是關聯tio̍h人ê罪行問題，tī人生中，咱定定會看tio̍h人用智慧去做違背上帝ê真理ê歹代，咱若看社會版ê新聞，hiah-ê犯法ê人，in ê才智，lóng相當ê kuân，智慧型犯罪tī現今社會真普遍，tsit種m̄是tuì上帝來ê智慧，tiāⁿ-tiāⁿ會造成人生社會ê烏暗kap紛爭。因為無上帝ê存在其中，但是tuì人所表現出來ê計謀ê結果，定定有傷天害裡ê tāi-tsì。

對基督徒來講，伊ē-tàng了解「敬畏耶和華是智慧ê開端，認bat tio̍h聖者，to̍h是聰明」（箴言九：10），這是基本真理。Tī聖經中，智慧是上帝所有，上帝是智慧ê開端，所以雅各講lín中間，若有人欠缺智慧，就ài向hit位白白hō͘眾人，mā無棄嫌人ê上帝祈求就會hō͘你，kan-ta ài用信心去求，全無懷疑（雅各一：5～6）。Tī-tsia咱ē-tàng看出，得tio̍h智慧ê人生，是the kap上帝ê關係，同時雅各koh再進一步講起智慧人ê生活kap內容（雅各三；13～18），一個充滿智慧ê人，必須ài有謙卑kap智慧ê好行為，表現出美好ê人生內涵，bē-tàng有bái ê私慾，ài像保羅tī加拉太書第五章所講聖靈所結ê果子ê生活內容ê人生，tsiah是真正屬於上帝tsiah有智慧ê人生。

對基督徒來講，咱是hō͘耶穌救贖，重新賜hō͘咱有屬於上帝生活ê人生，tú親像保羅向歌羅西教會所講「當用各種智慧kā基督ê道理，豐豐富富ê存tī心內」（歌羅西三：16），或者看哥林多前書第一章20～31節，咱mā會了解，智慧ê根本問題，無論是舊約時代所羅門王求智慧、箴言講tio̍h智慧或者約伯記廿八章12～28上帝了解智慧，作者用任何物件lóng無法度取代伊，人生mā 真pháiⁿ掌握伊，但是上帝了解智慧ê路，知影去toh位tshuē智慧（約伯廿八：23），因為祂是智慧ê所有者，tī最後段經文講：「敬畏神to̍h是智慧、離開邪惡to̍h是聰明」（約伯廿八：28）Tī人生社會中，咱ē-tàng體會出靈巧ê人生內容kap人生ê實質關係。

（三） 靈巧kap純樸（實際生活中ê人生）
耶穌向學生講：「Lín ài靈巧像蛇，馴良像粉鳥」，tī當時學生所面對ê人生現象，是真複雜koh艱難ê現實環境，tsit種不斷面對挑戰ê人生狀況，to̍h是基督徒人生生活ê寫照。確實若用認真正心態去經營人生ê時，必定會經歷真tsē挑戰，好親像保羅向提摩太所講：「只要是立志跟隨基督耶穌，過敬虔生活ê人，lóng會受逼迫。」（提摩太後書三：12）Tsit種情形tī基督徒現實生活中是真平常ê情形，因為基督徒ê人生buē-sái kap世界認輸，若是beh認輸，就bē受tio̍h逼迫。咱若看初代教會ê迫害史ê時，hiah-ê變節，認輸ê基督徒，lóng buē受逼迫，受tio̍h逼迫hiah-ê人，lóng是tsiok堅持對主耶穌基督信仰忠貞ê基督徒。

但是基督徒必須ài認清咱所生存ê現實社會，定定kap敬虔ê信仰原則有真大ê差別，tsit種差別，to̍h是基督徒信仰生活ê重點，tī-tsia就必須具備tsit種靈巧ê判斷力kap絕對意志，tsiah ē-tàng面對現實ê環境，tú親像詩人所講：「我beh用智慧行完全ê路」（詩篇一○一：2）這是基督徒信仰生活siōng重要生活內容，用智慧去行完全（理想、完美）ê人生道路，這是何等偉大ê生活，因為現實ê社會，ná親像耶穌所講比如羊送入去狼群中間仝款，咱若用敬虔信仰角度去思考基督徒現實生活ê種種問題，咱就會了解耶穌tī-tsia所講ê內容，當然，若用tshìn-tshái或者認輸ê態度去生活，自然to̍h是tshìn-tshái kap認輸ê一生。既然像羊hit種tī狼群中生活是基督徒信仰生活ê事實ê時，就必須ài有tsit種靈巧kap純樸ê生活來應付，這mā to̍h是基督徒生活ê高智慧。

因為面對tio̍h複雜、混亂、多元化ê人生社會現象ê時，有ê時會面對tio̍h是或者非、ē-tàng或者bē-tàng ê人生選擇。咱生存ê現實環境，m̄是只有單純ê教會而已，iáu有教會以外生活場合，基督徒buē-sái因為信仰無仝，就排斥伊，án-ne做，是說明咱無通達人情世故，但是mā buē-sái因為人情ê原因，suah傷害tio̍h信仰ê真理。

相信tsit種現實生活問題，每一個基督徒lóng會體會tio̍h，主耶穌在世ê時tiāⁿ-tiāⁿ tú-tio̍h像約翰福音八章面對hit位犯罪ê tsa-bó͘ kap納稅hō͘撒該ê問題，tsiah-ê問題lóng充分表達出耶穌基督智慧ê所在。

當然，基督徒tī tsit種人情世事中，必須有充分ê信仰背景做基礎，然後tsiah ē-tàng有所表現，比如基督徒ài疼仇敵ê愛心問題。

最後，基督徒必須ài了解，咱ê身分是kuân價贖tńg ê，同時基督徒mā是生活tī現實ê社會中，靈巧kap純樸ê智慧ài如何去撙節，mā是關連tio̍h教會成敗ê因素。