《受恩蒙福的一生》

 | | | 轉寄

Tī上帝面前富足

作者 林宗要 2010.11.14

路加十二：13-21

「好額」是現實中每一個人人生心中想盡辦法達成ê一件人生大事，的確，富足ê人生生活對人生ê狀況有特別ê關係，伊會「成全」人生ê願望，hō͘人生有順心如意ê生活，這to̍h是造成人幸福ê條件，確實人生ê幸福是建立tī人生活tī順心如意ê世界，因為伊的確會hō͘人生生活tī真完美滿足ê境況中，相信這to̍h是人所追求ê幸福，因此人生tsiah會用盡所有ê辦法beh得tio̍h會hō͘人生富裕ê物質（錢財），因為tī台灣人心中，「有錢使鬼會e磨」若用普通話來講是「金錢萬能」，tī人間是無可能真正叫鬼去e磨，但是只要有錢就做會tio̍h，to̍h是tsit句話ê真意。確實tī人間社會中，咱會看tio̍h有一kuá tsit種人生現象，to̍h是人所認為無可能ê狀況，tiāⁿ-tiāⁿ因為有金錢介入tsiah變做可能。過去咱tiāⁿ-tiāⁿ聽見一句「有錢辦生，無錢辦死」Tī古早ê官府kap現代ê司法界，確實有tsit種無合理ê現象。「有錢烏龜坐大廳，無錢秀才人人驚」（有錢講話會大聲，無錢講話無人聽）Tsit種現實是現代人ê狀況，因為過份追求重視tsit種現實tsiah致使現代人活tī功利ê現實過程中，tsiah造成了真tsē人生社會ê負面狀況，tī咱ê現實社會中，咱所看tio̍h ê真tsē人生烏暗負面ê人生內容，差不多lóng是因為人生對現實ê錢財所表現ê心態tsiah形成ê負面價值，tsit種人生價值觀成做社會價值觀ê問題ê評判基準，m̄管你ê人格、品德如何，只要tī你ê現實境況中有充足ê財富，你講話就會大聲，tī台灣ê地方議會，真tsē議長或者主席，有真tsē是有烏道背景，原因是in用手段kap關係去thàn特別ê錢（普通人若有3～4％ ê利純，in ē-tàng有20～40％ ê利益，所以烏道beh好額特別kín，因為無人敢反抗，只有按照in ê不法規則）Tsit種現象tī台灣社會真普遍，mā是政黨kap烏道勾結ê惡質ê政治文化。Tī án-ne ê狀況中，自然會影響tio̍h社會、政治、文化等等ê品質，因為咱知影，人性ê惡劣kap墮落，有時m̄是用換一個環境就會有所改善，因為人性是真垃圾難解ê實在，雖然tī外表有議員或者代表ê名稱，但是實質上in ê生活方式iáu離buē開烏道ê處理方式，以前bat有立委hông掠去關tī狗籠仔內tàn tī荒郊野外，tī籠仔頂koh貼替天行道字句，雖然無破案，但是大部分人lóng會了解是啥人ê做法，tsit種做法to̍h是烏道處理tāi-tsì ê方法，雖然咱ê俗語講，「君子愛財取之有道」，但是對現實功利心siuⁿ重ê部分現代人已經失去了意義，所以tsiah會有hiah-ni̍h tsē人為tio̍h beh好額來無暝無日汗流滿面，甚至有人為財來死，tsit種真普遍ê心態，是teh說明現代人對人生ê富足ê一種共通ê意識型態。因為大部分ê人lóng認為富足ê人生生活確實會hō͘人生生活順心如意，實在是如此，因為咱每一個人lóng bat體會過無錢ê艱苦，為tio̍h beh克服貧困ê現實，正常ê人lóng會善用伊ê人生資源想beh有koh-khah tsē ê財富，ná親像主耶穌比喻中hit位財主，照理伊應該m̄免koh再去煩惱財富ê問題，因為siuⁿ富裕了，m̄-koh咱tī-tsia suaht ē-tàng看tio̍h人生現象，to̍h是無人會嫌家己siuⁿ富足，你看咱ê社會上hiah-ê大好額人，in ê財富非常tsē，但是in mā無停止追求財富ê心志，因為財富kap貪欲永遠是連做伙ê，只要tī人生社會中，貪ê意念若存在，伊是形成人生問題ê主因，tī人生社會中，咱tiāⁿ-tiāⁿ會看tio̍h因為貪欲之念來產生ê人類真大悲劇kap tsiok驚人ê後果。

印度－波羅門教徒死了後一bó͘ kap三ê細漢kiáⁿ生活非常艱苦，有一日伊變成一隻金鵝飛到伊ê bó͘面前，kā伊講ta̍k工tuì伊ê身上挽出一支金毛就ē-tàng解決生活問題（每工la̍k一支金毛）。

伊ê bó͘心貪認為tsing-seⁿ無可靠，趁伊無準備ê時kā伊掠來，kā伊所有ê毛挽了了，結果是平常ê鵝毛，了後繼續過tio̍h清苦ê生活，tsit-ê故事暗示咱了解貪欲是造成人生不幸ê原因kap產生真tsē問題ê原因，馬太十九章，好額青年離開主耶穌ê原因mā是kap財富有關，所以耶穌告誡學生講「富人入天國困難啊！」確實這是人生一ê大問題，對人生ê影響實在siuⁿ大，所以tī財富ê處理kap心態上若有方正ê態度，應該是一位成功ê人生，箴言三十：8-9「上帝ah！求你hō͘我mài sàn-tshiah mā mài富足，賜hō͘我需要ê食物，驚我飽足了後m̄認你，講耶和華是siáng neh？Koh驚我sàn-tshiah就偷the̍h 物件suah褻瀆我神ê名。」這是真理想人生對財富ê心態，但是事實上，人真困難生活tī理想境況中，因為關連tio̍h人心ê貪欲ê念頭，hō͘人生tsit種理想ê自我控制能力，處tī一方面是理想，另外一方面是現實ê狀況中，基督徒必須ài有信仰ê智慧去面對kap咱有切實關係ê富足ê問題。

（一） Tī智慧ê富足
智慧是人生生活中成敗ê關鍵，同時伊mā是kap人生ê財富有真深ê關係，雖然tī人生社會中，有時造成人ê富足可能kap運氣有關係，但是大部分ê人ê好額，是建立tī當是人ê智慧ê運用來ê，智慧ē-tàng講是人生生活ê總動機，因為人生ê存在實在無簡單而且複雜，tī án-ne繁雜ê人生現象中，人ài有khah理想ê存在必須ài有kuân度ê智慧，tsiah ē-tàng應付人生社會中ê複雜ê性格，咱ê主也bat向學生提起「Lín ài訓良ná粉鳥，靈巧ná蛇」ê人生內容。

因為伊確實ē-tàng幫助人化解問題、解決危機、造就人生，koh-khah了解人生頭前ê路，哲學家bat提起「世上所有ê善lóng規範tī智慧ê下腳」這to̍h是主耶穌基督向hit位提出「良善ê夫子，我當做啥物tāi-tsì……」ê時，主講除了神一位之外，無koh有良善ê了。詩篇kap箴言lóng有teh強調tsit項真理，「敬畏耶和華是智慧ê開端」當咱用主講ê話kap箴言ê教示來思考ê時，咱就會了解人真正ê智慧tuì án-ne tī善ê源頭耶和華上帝，tī-tsia提出ê智慧是uì萬項好ê根源ê上帝完全ê智慧，kap世間ê智慧無仝，台灣諺語有一句「賊計狀元才」表示犯罪ê人用kuân度ê智慧作犯罪ê工具，tsit種智慧tī上帝面前無受接納，基督徒tī上帝面前富足ê智慧m̄是tsit種智慧。

是uì siōng-kuân、良善ê上帝所賜ê、完全ê智慧，是/buē陷害人ê，是會造就人ê智慧，是會克服危機，引tshuā人生行向光明ê智慧，會hō͘持有ê人對事物有正確ê判斷kap辨別善惡ê智慧。基督徒必須ài有tsit種正面ê價值，建立tī信仰ê世界ê tsit種智慧，咱tī上帝面前若有tsit種tuì上帝所賜ê智慧ê時，就會成做上帝所喜樂ê人生，因為伊會帶領信徒生活teh符合上帝ê旨意ê人生過程，這是上帝對人類ê基本要求。有tsit種智慧ê人就ē-tàng完成上帝ê要求，這to̍h是上帝ê祝福。

（二） Tī信仰富足
彼得後書一：1「寫phe hō͘ he因為咱ê神kap救主耶穌基督之義，kap咱做伙得tio̍h仝款寶貴信心ê人……」，彼得tī-tsia用「寶貴信心」來形容咱ê信仰，hō͘咱想tio̍h主耶穌tī馬太十三章天國ê比喻中，財寶或者是珍貴ê真珠ê比喻，hông發現tio̍h ê人用盡所有ê方法來取得hit種寶貝，這是人生對現實中有價值ê事物所有ê普遍心態，咱ē-tàng tuì現實ê人生狀況來體會tio̍h tsit種真理，確實tī人間社會中，人為tio̍h beh得tio̍h心中認為khah寶貴ê物件，人會用盡所有ê方法去爭取，希望會得tio̍h心中理想ê價值。

當咱用tsit種心態去看信仰ê主ê時，咱就會koh-khah了解，主耶穌所留hō͘人類ê物件確實是無價之寶。若用現實ê物質觀看基督，伊死ê時只有留一領外衫，hō͘羅馬兵分去，除了這以外，基督無留任何物件（看會tio̍h ê物質），但是二千年來，伊留hō͘人類ê物件確實是無價之寶，二千年ê基督教歷史有完全ê說明tsit-ê事實，確實，耶穌基督tsit種寶貝ê信仰若臨到ê所在，tī hit個所在，就有完全無仝ê人生現象。

咱若看基督教史，咱就看tio̍h tī福音感化之下ê人ê情形，有意外中ê變化，真tsē野蠻ê民族因為福音ê進入hō͘ hit個社會成做文明ê事實。進化論ê提倡達爾文遊歷當時未開化ê民足tsiah ē-tàng吸收tio̍h文明ê空氣，但是當時伊tī十年了後koh再tńg來到以前ê所在，hō͘伊非常gōng-gia̍h，因為十年ê時間竟然會hō͘ tsiah-ê野蠻ê人生活tī文明kap社會中，主因to̍h是十guā年前，耶穌基督ê福音廣傳tī tsiah-ê未開化ê野蠻人中，改變in ê心態kap人生價值觀，hō͘上帝ê恩疼完全充滿tī tsit-ê社會，這to̍h是信仰ê能力，當一個人若實在用信心去經營人生ê時，伊ê人生所表達出來ê種種作為lóng是正面價值ê人生現象。

因為信仰m̄是只有tī心靈siōng而已，mā是beh將伊完全實行tī人ê生活內面，hō͘咱ê人生完全了解上帝ê旨意，比如保羅向歌羅西教會所講ê「願lín teh一切屬靈ê智慧悟性頂kuân，滿心知影神ê旨意」（一：9）完全了解上帝ê旨意to̍h是基督徒ê信仰生活，這是基督徒信仰生活siōng高貴ê內容。Tsit種生活to̍h是會結聖靈ê果子ê人生，因為信仰是信徒生活ê實際部分，是信徒ê生活kap行動面，「好叫lín行事為人對會起主，凡事蒙伊喜樂，tī一切善事頂面結果子，漸漸知影神」（一：10）To̍h是信徒信仰生活ê內容。

Tsit種有美好ê信仰見証ê生活是基督徒信仰ê實在價值，因為通過信徒ê信仰生活會顯示出各項ê好事（良善ê人生內容，to̍h是信徒實在ê信仰生活），因為tsit種美好to̍h是上帝創造人類ê目的，伊是確立teh了解上帝旨意ê人生過程中，創世紀三章始祖犯罪ê行為kā咱講一件真理，to̍h是無了解上帝ê旨意，因為上帝明明kā-in講，in suah去侵犯，致使成做無法度承接上帝恩典ê存在，tsiah hông趕出樂園，這是人生ê悲哀，mā teh提出人tī上帝面前罪ê問題，tī上帝面前富足是人tī基督ê恩典ê罪，hō͘人真坦然khiā-tī上帝面前，有良好、美善ê人生過程，tsit種過程，to̍h是信仰ê恩典，真自然，tsit種人生內容就ē-tàng表現出符合上帝美旨ê完美有價值ê人生狀況，這to̍h是結聖靈ê果子ê人生，是tī上帝面前富足ê信心ê結果。

確實，好額tī/teh上帝面前有信仰ê人，伊ê人生狀況buē一定是事事完美、一帆風順通順ê人生，反之或者者tī/teh伊ê人生過程中會經歷tio̍h真tsē ê困苦、逆境kap講bē盡ê患難mā buē一定，thang/ē-tàng對一位有富足ê信仰者來講，tsiah-ê人生ê患難是bē曉/buē/bē影響﹝响﹞in ê信仰，反而成為in信心ê鼓勵kap造就，hō͘ in koh-khah理想、成熟，益發榮耀上帝。

（三） Tī有疼心ê好所行ê富足
最後一項咱來想，富足tī「有疼心ê好所行」（提前六：17-18），基督徒是認bat上帝ê人，照約翰提起「上帝是疼」（約翰壹冊：4）所以屬於上帝ê信徒應該是疼ê存在者，因為無疼心是m̄-bat上帝ê人，所以無疼ê人生，本質上已經m̄是基督徒了。

保羅tī羅馬書十三章八節「凡事lóng bē-tàng虧欠人，只有互相sio疼，ài時常認為是虧欠」。

照保羅ê意思除了疼人以外，ē-tàng有虧欠人，獨獨相疼ê人生行為是bē-tàng虧欠人，因為基督徒相疼ê義務是無限ê，tī伊ê人生過程中，基督徒必須了解，伊有永遠還buē完ê疼人ê行為，mā to̍h是相疼是信仰生活中ê負債。

人對負債ê道德行為，事先是承認然後必須想辦法去還ê，這是做人ê基本道理，ē-sái講是現代人ê生活表現但是suah m̄是án-ne，m̄承認負債，同時用欺騙不法ê手段來應付伊ê負債，所以tī社會上tsiah有惡性倒閉kap狼毒手段ê詐欺，tsit種心態m̄是上帝所喜樂ê方式，人beh tī上帝面前成做富足ê人，伊必須善用伊充滿慈疼ê心情去對待人類，因為相疼ê生活是認bat上帝ê人ê標幟，一個人beh tī上帝面前富足，伊的確ài有tsit種疼人ê義務是無限ê心態，mā to̍h是伊ê人生資源中，充滿tio̍h完全ê疼，然後善用tsit種恩典ê疼去表現tī各樣ê好事頂面，因為tsit種人生中ê善行，是主耶穌揀選咱成做伊ê子民ê原因，「伊替咱犧牲家己，beh救贖咱脫離一切罪惡，koh洗淨咱，特作家己ê子民，熱心為善」（提多二：14），tsit種成做信徒ê神聖使命，每一個信徒必須ài有完全ê了解，因為基督救贖咱是beh hō͘咱成做伊聖潔ê人民，to̍h是表現出熱心tī各樣好事頂面，mā to̍h是對恩典ê信仰，用完全ê疼去採行咱做基督信者神聖ê使命。Tī西洋tiāⁿ-tiāⁿ有禮拜堂ê舊鐘仔會家己叫，是tī地方上值得受肯定ê美好行為hō͘上帝ê心喜樂ê時，鐘仔自然會tân，有一個故事說明tī聖誕暝，所有ê人盡in一切ê力量去事奉、捐獻，beh hō͘上帝ê心喜樂，所以有一kuá好額ê人確實奉獻真有價值ê錢財，但是鐘仔並無發出聲音，後來一位sàn-tshiah ê孩童，teh赴拜堂途中救一位可憐ê乞食，將伊beh獻hō͘耶穌ê禮物－全部ê pháng kap錢ê一半hō͘乞食，kan-ta留一半ê錢獻hō͘主耶穌，當伊ê錢khǹg入捐獻箱ê時，suah聽見鐘仔聲大tân，tsit種故事tī中世紀ê歐洲社會時常hông提起，伊teh說明（強調）信仰kap行為ê事實。因為雅各講：信心若無行為to̍h是死ê，死ê物件是無價值，因為伊內面無性命ê存在。

基督徒ê人生的確ài有疼，成做充滿疼心tsiah有好行為ê人，比如保羅所強調「Tī好事頂面富足」tsiah是高貴有價值ê人生，卡內基是美國ê鋼鐵大王，本部tī賓州ê匹茲堡，伊少年ê時bat立志「我必須爬到人類寶座siōng kuân ê位」，後來伊確實得但是當伊tī人類siōng kuân ê位ê時，伊體會tio̍h孤單kap寂寞，只tshun伊一人！因此tsiah自省，tsit種人生kám是實在真正ê人生？只有富足tī家己tī上帝面前suah無富足ê人生是悲哀不幸--ê，因此決定將伊所有ê財富捐hō͘教會、學校、救濟等事業機構，家己立墓牌「Tī-tsia有人安息，伊會kap比伊聰明ê人合作」，或者咱看石油大王洛克斐勒mā是仝款，伊tī在生ê時捐獻美金五億五千萬kho͘（四大基金無包括在內），九十七歲死ê時，只tshun一張第一號ê普通股票。Tsiah-ê lóng是teh說明tī上帝面前富足tī有疼心ê善行！

結論：富足tī人生中是一件值得歡喜ê tāi-tsì，普通人tiāⁿ-tiāⁿ用tse來解釋人ê成功，基督徒tī上帝面前ê富足mā是án-ne，希望咱tī上帝面前ê富足是有智慧、信心kap有疼心ê好行為，用tse來解釋基督徒ê信仰生活ê份量。