《受恩蒙福的一生》

 | | | 轉寄

因為你ê存在

作者 林宗要 2011.01.02

使徒行傳廿七：9-38

「存在」tsit兩字咱各人lóng ē-tàng瞭解，伊是指生存ê意思。但是tī一般ê生活中，人khah少用伊，因為伊ê含意略略仔帶有哲學氣味，事實伊mā是十二、十三世紀ê時Stsolasticism（經院哲學）來ê語源，通常是tuì德語翻譯出來ê，經院哲學tī中世紀流行三、四百年，hit-ê時代哲學to̍h是神學。

通常用tī教會既定ê教義，用哲學ê方式kā伊探討、辨明、組織是哲學ê本分，範圍是teh探究，批評或者改造新ê真理。

Ài調和、統一理性kap信仰是經院哲學主要強調ê點（9-12世紀發生期，13世紀全盛期，14-15世界衰落期）Anselmus（1033-1109），Abelardus（1079-1142），Thomas Aquino （1227-1272），Francesco（1182-1226）lóng是tsit-ê時代ê代表人物，對當時ê經院哲學lóng有影響，tsit句「存在」tī當時是beh表現一件事物ê存在所使用--ê。譬如：人是有理性ê動物，tsit件tāi-tsì ê理性動物是teh說明人ê本質。

人是啥物？是teh指示咱是「啥物」，to̍h是存在ê意思。經院哲學ê人，用「本質tī存在tsìn前」。譬如：創造者上帝kap 被造物ê關係，一切ê tāi-tsì lóng tī創造者上帝ê思維中（計劃、攝理中）或者是用木匠ê製作器具，伊tī腦海中一定ài先有一個大概ê輪廓（比如現代製圖ê寸尺、形體）然後tsiah進行khang-khè，tsit-ê預先ê計畫是構成製好ê成品ê本質。Tsit種情況thang用tī上帝kap人ê關係上。

所以人ê本質，是人今á日teh活或者是講存在ê一個重要問題，tī信仰ê角度來思考ê時，咱就會想tio̍h上帝ê計畫，kap期待tī人ê身上。當咱瞭解人ê本質ê時，咱自然會活tī上帝所期待ê人生境況中，去完成上帝所交託hō͘咱人ê使命。

這to̍h是信仰者ê存在，是tī人生意識真鮮明、真瞭解人生存在ê價值kap內容ê人生現象。Tsit種信仰ê存在ê人生，是充滿tio̍h活力kap有希望而且積極ê人生生活，因為tī tsit種信仰ê存在中，信仰者充滿tio̍h真明確ê人生目標。有方向ê人生，無論伊ê生存ê境況如何惡劣，lóng有可能克服、突破。

Tsit種存在kap無意識ê存在無仝，tī今á日，咱tiāⁿ-tiāⁿ會聽tio̍h或者看tio̍h人對存在ê問題ê糊糊塗塗，馬馬虎虎，對人生存在ê事實，無真明顯ê；立場，丹麥ê思想家（神學家）祈克果對人生ê存在用一個真適當ê比喻，伊講人ê存在ná親像一個沈醉ê作sit人睏tī馬車頂kuân，hō͘馬拉tio̍h向熟練ê路上向前行，作sit人ê雙手雖然執有韁繩，kah-ná一個駕馭者，但是事實不然，伊講，ná親像án-ne，真tsē人ná親像活teh，但是同時kan-nā無存在。雖然是khah深ê比喻，但是對人生存在ê問題有相當深刻ê描述。

確實tī人生ê現象中，咱會發現tio̍h真tsē人生ê存在，是teh迷失、無意識中teh過人生ê事實，因為tī人中間，確實ē-tàng掌握tiâu人生存在ê意義kap內容ê人實在siuⁿ少。因為人對人生觀buē-tàng建立有價值ê人生觀，致使人生buē-tàng tī伊有限ê人生存在中，ē-tàng完成上帝所希求ê人生內容。

對基督徒來講，應該ē-tàng了解人存在ê意義kap價值，所以tī正常ê範圍內，基督徒存在ê意義應該比其他ê人koh-khah符合上帝ê要求。同時，tī基督徒ê人生存在中，mā ē-tàng瞭解經由伊ê存在對伊ê人生ê生存確實有相當程度ê影響面：因為一個人ê存在，m̄是只有單獨ê自己，iáu有其他ê人ê關係上ê存在，所以當你iáu-koh繼續存在ê時，你有責任（必須）kā你身上存在ê實實在在ê意義發揮出來，án-ne，你存在ê本身tsiah ē-tàng成做正面、有價值、ē-tàng榮耀上帝ê存在，當一個基督徒建立tsit種人生觀ê時，家庭、khang-khè、社會甚至到教會生活lóng ē-tàng發揮真正ê存在ê價值。

（一） 保羅ê存在
咱用tsit-ê觀念來思考tú-tsiah所唸ê tsit段聖經，來看當時保羅ê存在，若照現實ê情形來看保羅tī當時ê存在ê時，kah-ná失去了偉大ê價值kap效用，因為伊ê身份是一個犯人。Tī任何時代，犯人ê存在buē hō͘人所重視ê存在，這是人性現實ê內容，咱若看悲慘世界ê主角，因為有過穿紅衫ê紀錄，出獄了後iáu hông歧視、看清、侮辱、討厭，雖然伊出獄了後ê生活，對人類社會有貢獻，但是hiah-ê人iáu用有色ê眼光看待伊，tsit種現實，tī當時保羅ê時代，到現代ê狀況lóng無例外，當時ê保羅tī he情形中雖然伊ê人品學識lóng屬於一流--ê，但是因為係犯人ê身份，所以伊ê存在是無受重視。雖然hiah-ê人用歧視ê心態對待伊，但是伊是真清楚伊當時ê角色，伊是為福音ê緣故tsiah掛鐵鍊，伊了解伊雖然是犯人，但是伊是堂堂上帝福音ê使者，是上帝ê欽差，伊ê存在是高貴偉大ê，mā無因為伊現實ê犯人ê身份來影響tio̍h伊做上帝福音ê特使ê身份。雖然hiah-ê人用有色ê眼光teh看伊，但是伊真清楚，tī伊ê存在中，上帝所交託hō͘伊ê神聖使命，tsit種認知，buē因為環境來改變，顛倒是tī hit種人認為不利ê境況中koh-khah ē-tàng發揮上帝ê真理tī人生社會中。

有可能當時276人中有真tsē財主、有權者，但是伊ê存在iau buē-sái kap保羅ê存在相提並論，tī當時保羅存在中，咱ē-tàng看tio̍h經驗kap信仰ê明顯ê事實（27：9-11），保羅bat提出忠告，因為伊ê信仰hō͘伊了解，tsit-pái出帆有危險，但是伊tsit種tuì信仰ê靈感所提出ê警告，suah無hō͘當局接納，「百夫長相信船主kap船長ê話khah過保羅所講--ê」（27：11）tsit種人生ê經驗，往往會造成人性ê危機，因為tī人生中，人tiāⁿ-tiāⁿ誇口人生ê經驗是真重要ê實在。

Tī咱現實ê人生狀況中，經驗kap上帝ê話相tú ê時，現實ê人往往會去選擇人ê經驗，因此船長ê高見比保羅ê論調khah簡單hō͘人所接納，是咱ē-tàng瞭解ê事實。Tī一般ê世界（m̄-bat上帝ê狀況中ê人）有tsit種見解是無法度避免ê，但是tī信仰者ê立場，若有tsit種情形ê時，基督徒ê信仰必須kā伊檢討，同時tī咱ê人生生活中，tiāⁿ-tiāⁿ會出現tsit種人性ê經驗kap信仰ê問題tī咱ê現實生活中，咱必須去選擇。看保羅tī當時ê存在，雖然無一定受重視，m̄-koh伊suah真清楚，tī伊ê存在中伊所負ê上帝交托ê使命，這to̍h是基督徒信仰生活ê真正內容，因為每一個人lóng會tī伊ê人生存在ê狀況中tú-tio̍h tsiah-ê問題。

（二） 得意ê南風（27：13）
保羅khiā-tī信仰ê立場提醒大家，伊講「我看tsit-pái出帆m̄-nā貨物kap船，連咱ê性命mā會受害kap大損失」（27：10）但是至少有二、三項理由拒絕了保羅ê建議：

（1）若是百夫長相信船長kap船主ê話khah大過保羅所講ê話（27：11），這to̍h是頭前講ê經驗kap信仰ê問題，in認為靠in ê經驗是過去in行船ê事實。

（2）Koh tī tsit-ê所在過冬無方便（27：12A），現實ê人生所想ê to̍h是如何過方便ê生活，這是人生ê自然性。

（3）大多數ê人贊成，希望會tī khah方便ê腓尼基過寒天，伊是良港，生活khah方便ê所在，是hit-ê時代多數人ê共同目標，有頂kuân tsiah-ê理由已經充分表現出ē-tàng繼續行ê內容，經驗+方便+多數人ê意見，已經真充分，同時tī-tsia in koh再體會tio̍h一陣微微吹來ê南風，當時in ê船是beh向西北出發，所以南風對in ê狀況非常有利，有以上所列舉ê理由，加上tsit種自然環境，kám-m̄是對in ê航程有決定性ê幫助？

所以眾人認為得意就啟錨，照in ê想法，這陣微微吹來ê南風，to̍h是助in ê絕大ê良機，因為認為這陣南風會助in teh向西北駛ê過程中koh-khah有效力，to̍h是順風m̄是逆風，但是當in出發無guā久，船就tú-tio̍h真驚人ê暴風，完全失去了控制無法度自主，船hō͘風掃，無法度承受，就kù-tsāi伊漂流（27：15），通常是船長teh控制船，tsit時人已經無辦法，hō͘風所控制，失控ê船是何等ê危險。

今仔日tuì tsit件tāi-tsì，咱ē-tàng學習幾件tāi-tsì：
A. 人ê判斷有時會tîng-tâⁿ
Tîng-tâⁿ ê判斷往往是人生生活ê常客，tú親像當時hiah-ê有影響力ê人（多數人）lóng感覺一陣微微來ê南風，對in ê現實有幫助，這是人正常ê價值判斷，靠人ê經驗kap分析，但是事實suah證明人ê判斷是tîng-tâⁿ ê，因為大自然ê運作有時是超過人ê常規，譬如風颱kap地動等。

B. 人ài聽上帝ê話tsiah buē危險（tsiah有平安）
保羅ê先見之明是經由上帝ê指示，但是可惜當時多數人m̄聽伊，結果in tú-tio̍h tsiok驚人ê危機，雖然無性命ê危險，但是全船suah報銷，主因tī in無聽從上帝ê聲音，tsit-ê事實kā咱講，了解安全ê人生是確立teh聽從上帝ê話，伊ê話是永遠buē錯失ê。

C. 外在境況ê引誘造成tsit-pái航船ê不幸ê另一個原因
To̍h是tú親像頂面所講ê經驗、方便、多數人，tsiah-ê已經夠in出發，同時koh增加一陣微微ê南風，tsit種外在境況動人ê現實ê影響有真大，tī咱ê人生ê存在中，人tiāⁿ-tiāⁿ會擋袂牢tsit種外在境況ê引誘，表面上看起來是勝數ê人生，但是往往有負面ê人生結果，這是基督徒ài特別注意ê存在。

（三）因為你ê存在
現在in既然m̄聽保羅ê話tsiah tú-tio̍h真大ê危機，確實當時全船ê人lóng處tī真惡劣ê狀況中，tsit種危機往往會hō͘人生活tī絕望中，因為in ê性命當teh受tio̍h真大ê威脅，tsit種危機ê日子連續有十四工之久，這是真驚人ê人生存在，無食、無lim、甚至無睏，有可能是當時ê狀況，因為人生ê存在若受威脅ê時，通常ê人lóng無法食睏，若是tī危難中iau ē-tàng大食大lim，he是無正常ê，tī tsit種危難中ê角色是基督徒應該有ê本分，眾人久久無食，保羅khiā-tī in中間講：「各位啊！Lín本該ê話……」（27：21），伊ê話是tuì上帝ê啟示tsiah來，是上帝ê話，對人生ê存在有正面ê作用，基督徒ê存在to̍h是無論tī任何狀況中，設法hō͘人聽見上帝ê話tī人中間，這是基督徒先知ê使命，hō͘人聽見上帝ê話，tī今á日是基督徒存在ê因由，既然tsiah-ê人以前m̄聽，tsit-má tī-tse境況中，保羅所講ê話得tio̍h證實，「現在我勸lín安心」，tī危難中上帝ê話koh再出現是人類ê希望，tī當時ê境況中，mā只有保羅ê話是唯一ê價值，因為保羅所講ê lóng有證實，所以伊講ê話成做hiah-ê人遵守ê唯一標準，連百夫長kap船長lóng tio̍h聽伊ê話。

Tī hit-ê危難中，保羅ê話對所有ê人有決定性ê因素，ē-tàng用安定劑來形容伊。伊kā大家講，伊所敬拜ê上帝bat指示伊，全船是有驚無險，船雖然會損失，但是276條性命lóng會平安，保羅當時ê存在成做hiah-ê人存在ê重心kap傳達上帝ê信息，m̄是伊本身有tsit-ê才能，是

1）伊所服事ê上帝ê指示
本來in lóng絕望了，但是因為保羅ê存在，hō͘當時ê眾人tuì絕望中成做有希望ê人生，基督徒必須認清咱是作光作鹽，伊ê存在，to̍h是hō͘ in人生有希望kap光明ê實在，咱tiāⁿ-tiāⁿ看tio̍h教會ê標語，基督是現代人ê希望，祂是tī教會mā to̍h是咱tsiah-ê基督徒身上！

基督徒ê存在必須hō͘ in當時ê境況有穩定ê作用，tī絕望中帶hō͘ hiah-ê人希望是基督徒存在ê價值，比如當時保羅ê存在，hō͘全船ê人tuì絕望中有希望！

2）因為你ê存在hō͘別人受tio̍h祝福
假使當時若無保羅仝船，相信伊ê結果必定是悲慘ê，但是因為保羅ê存在suah成做tsiah-ê人mā受tio̍h祝福，信仰者ê存在，tī現實ê境況中mā有tsit款事實。基督徒必須ài有tsit種存在ê內容，經由咱ê存在，至少hō͘其他ê人mā會受tio̍h祝福，tuì咱ê存在hō͘人蒙恩，這是基督徒存在ê基本問題。

3）保羅tī危難中ê角色——患難中ê安慰
保羅仝款mā是tī危難中，ē-tàng有穩定ê價值，必須ài清楚現實ê境況，保羅因為tuì上帝得tio̍h啟示，伊深信上帝ê引tshuā kap保守，因此tī別人lóng無法食無法度睏之中，伊suah ē-tàng表現出絕對ê信心kap能力去安慰人，基督徒ê現實存在原理kap tse相仝！咱負有安慰危難中ê人ê使命，危難中ê使命，是教會ê本質，德國ê潘霍華kap日本ê內村鑑三（長老教會ê國事聲明，教會ài成做政府ê原配，bē-tàng為細姨）。

結論：人生ê現實比如船tī大海中，基督徒ài tī大船中（社會、世界中）發揮咱存在ê價值kap作用。