《受恩蒙福的一生》

 | | | 轉寄

屬上帝ê性命

作者 林宗要 2011.02.13

約翰一書三：1-11，18

Tī人生旅途上有真tsē經歷，tī tsiah-ê人生ê經驗中，siōng ē-tàng發揮人性ê存在ê內容有可能是人生ê選擇。因為選擇tī人生旅途上佔非常重要ê地位，主因tī伊tiāⁿ-tiāⁿ是造成人生成敗ê關鍵，tī人生ê經驗中因為人無仝ê選擇自然會hō͘人產生無相仝ê結果。

咱ē-tàng講人自出世以來，to̍h是活teh選擇ê世界，tuì幼稚園到成家立業一直lóng teh做選擇，特別是活tī現代化ê社會環境中，對選擇tsit-ê問題koh-khah敏感，因為現代化ê社會ta̍k方面lóng充滿tio̍h競爭kap挑戰，tī-tse狀況中，koh-khah顯出選擇ê重要性，因為現代化ê社會緊急變遷，為tio̍h beh應付tsit種變局，人koh-khah需要抉擇ê智慧，確立teh選擇ê世界，因為大千世界複雜ê事物，無完全是單純、理想ê，tī tsit種狀況之下應該去選擇符合家己ê人生價值觀所需要ê事物。人生ài選擇有正面價值ê生活內容，因為tī複雜ê人生狀況中，並m̄是所有ê人生現象lóng是安全koh理想ê，對人生無一定有好處。

M̄-koh tī現實ê生活中，人lóng會追求、建立人生理想kap純全ê生活意向，雖bóng現代人ê心思意念無一定是完美kap純全ê。（咱ē-tàng tuì現實ê社會狀況體會出社會ê腐化kap人心ê惡毒，tsiah-ê事實ē-tàng tuì社會新聞去了解）這有可能是teh說明人生ê矛盾，人ê心思意念腐敗，充滿烏暗kap 不法，但是人suah teh追求人生ê光明以及khah有價值ê人生狀況，ná親像台灣ê政治文化，烏金kap烏暗經由選舉進入議會，有時身為議長，但是suah致蔭不法ê事業比如kiáu間、情色場所，南部ê議長用銃彈死人，或者hō͘ pháiⁿ人thâi死ê縣議長，tsiah-ê lóng kap惡勢力有關，tsit種情形是台灣政治ê烏暗面，這是過去國民黨一貫ê作風kap烏道勾結形成ê結果。

咱知影人若活tī矛盾ê狀況中，是無可能發揮真正ê人生價值，這是人生重要ê真理。其實人生ê現象雖然繁雜，但是歸結起來，只有兩大項to̍h是善kap惡而已。

好ê存在代表活出了人生有價值ê光明面，tī-tsia ē-tàng看出真tsē人有意義ê人生內容。因為伊ê價值ê發揮tsiah帶hō͘社會真tsē建設性ê幫助，以及對人類真tsē有意義ê存在，tī-tsia thang看tio̍h人生意義kap理想ê社會狀況。

另外hiah-ê無好ê人生現象是代表tio̍h人性ê烏暗面kap腐化，作惡ê人生會破害真tsē人生ê親情kap恩疼，mā會毀害人ê幸福，奪取屬於人生ê價值kap有意義ê人生內容，伊對人生無建設，伊是破壞。當然形成ê主因是tī人心ê內涵，mā to̍h是人心中有啥物，伊就會表現出啥物。這就像主耶穌所講ê好樹結好果子，pháiⁿ樹結pháiⁿ果子ê比喻。因此tī近代農作物中一直teh研究，改良品種ê開發kap創新，主因teh提昇品種ê品質，對人類有所幫助。

約翰講：咱稱做「上帝ê kiáⁿ兒」，ē-tàng成做上帝ê kiáⁿ兒，是上帝tsiok大ê恩典，這m̄是普通ê恩賜，是上帝非常特別ê犧牲kap付出。保羅講，因為您是用重價買來--ê。所以lín tio̍h用身軀來榮耀上帝（哥林多前書：20），lín是上帝用重價買來ê，所以buē-sái作人ê奴才（哥林多前書七：23），tī-tsia講tio̍h作上帝ê kiáⁿ兒ê條件m̄是tshìn-tshìn-tshái-tshái --ê，因為成做上帝ê kiáⁿ兒，ài有上帝ê kiáⁿ兒ê款，ài有上帝ê kiáⁿ兒ê實質內容。因此teh信仰ê學習上，咱必須ài像天父上帝ê完全，用tsit-ê phah拚來當做咱ê人生內容，當然tī過程中，咱iáu未完全，咱必須koh-khah phah拚去確立咱ē-tàng成做上帝ê kiáⁿ兒ê條件，ē-tàng符合上帝所要求ê實質內容，保羅tī哥林多後書四：7講有寶貝藏tī上帝ê器具內面。To̍h是說明了上帝ê恩典tī平凡ê人間。

M̄-koh約翰tī-tsia用上帝ê種（上帝ê道，上帝ê性命），hō͘基督徒成做上帝ê kiáⁿ兒。Kap保羅ê寶貝對比ê時，咱會發現tio̍h人生中ê寶貝雖然有價值，但是suah比bē起性命可貴，這to̍h是主耶穌所講hit句名言：得全世界tsiah喪失性命有啥物利益？神學生時代，tiāⁿ-tiāⁿ會參加孫雅各牧師娘ê路邊佈道，伊揹手風琴，tiāⁿ-tiāⁿ手提一粒石頭kap一粒蒜頭作比喻來說明性命ê重要性；進一步。講起受上帝所保護ê性命以及受撒旦控制ê生活ê差異點。

今仔日咱用tsit段聖經來想屬上帝ê生活。
（一） 上帝是命ê源頭
一切性命ê源頭是上帝，祂是性命ê創始者，tuì聖經中咱ē-tàng發現tsit項事實：上帝賜性命hō͘受造物比如創世記一：20-21所記申命記ê作者mā提起「祂是你ê性命，你ê日子久長mā tī祂」（申命記三十：20）。

約伯mā講：「你將性命kap慈疼賜hō͘我。」（約伯十：12），tī詩篇中詩人對生ê論點mā相當ê豐盛「因為tī你hia，有性命ê源頭」（詩篇卅六：9），一句基督徒真佮意使用ê話to̍h是：「你tio̍h將性命ê路指示hō͘我，tī你ê面前有滿足ê喜樂，tī你ê正手有永遠ê快樂。」（詩篇十六：11）。Tī箴言中mā提起「上帝ê訓誨是你人生ê性命」（箴四：13）。「Tshuē會tio̍h耶和華ê，to̍h是tshuē會tio̍h性命」（箴言八：35）。「無智慧ê人是tshuē bē-tio̍h性命平順ê路」（箴言五：6），所以箴言ê作者講：「敬畏耶和華to̍h是性命ê泉源」（箴言十四：27），「敬畏耶和華ê，會得tio̍h性命」（箴言十九：23），「謙卑敬畏耶和華ê報償to̍h是好額、尊榮、性命」（箴言廿二：4）。西底家王向先知耶利米講「Hit位創造咱ê性命ê人是耶和華」（耶利米卅八：16），tī新約中mā講tio̍h耶穌是性命，咱siōng清楚ê to̍h是主耶穌向多馬講ê那句「我是路、真理、性命」（約翰十四：6）。當主耶穌ê好友拉薩路死ê時，祂向當時ê群眾講一句「復活tī我，性命mā tī我」（約翰十一：25）。向hiah-ê kan-ta想beh食餅ê群眾講「我是性命ê餅」（約翰六：35），並鼓勵hiah-ê人必須去食tsit種tuì天來ê性命ê餅基督耶穌。因此hō͘真tsē群眾無法度接受來離棄了主耶穌。約翰福音the講tio̍h基督耶穌「性命tī祂內面，tsit-ê性命是人ê光」（約翰一：4），保羅mā講：「基督是咱ê性命」（歌羅西書三：4）。基督徒beh hō͘人稱做上帝ê kiáⁿ兒，應該有屬上帝ê性命ê本質。

約翰用「有上帝ê種」來強調上帝ê靈命ê基督徒ê性命ê本質，咱lóng知影「種」ê重要性無tī外表ê觀感，是tī伊實質內容ê充實，to̍h是有靈命tī其中，tsiah ē-tàng發揮種ê效用（puh-íⁿ、成長，開花結果），約翰tī-tsia強調，基督徒ài有ná親像上帝ê款，tsit種生活方式，to̍h是teh說明有屬上帝ê性命ê基督徒ê特質。因為上帝是性命ê源頭，因此tsiah-ê屬上帝ê基督徒，若tī伊ê性命中無法度發揮ná親像上帝ê生活ê人生內容ê時，自然就無法度証實伊有上帝ê性命，主耶穌mā教示門徒ài學像天父上帝ê完全，（馬太福音48）約翰tī-tsia強調用上帝ê kiáⁿ兒kap惡魔ê kiáⁿ兒互相對比，ài保持上帝ê kiáⁿ兒ê特質（屬上帝ê性命）是tī清氣無犯罪ê生活，因為這是聖經中上帝向人類所要求ê法則（舊約講是上帝ê律例法度）遵守伊tsiah是符合上帝ê kiáⁿ兒ê生活內容。毋認kap破壞上帝ê法則--ê，是惡魔ê kiáⁿ兒ê生活方式。因為「惡」自開始ê角色，to̍h是破壞上帝，反叛上帝ê法則，這to̍h是罪。

基督徒是有上帝靈命ê人生，因此基督徒ê人生必須建立teh學習上帝ê生活內容，這to̍h是咱一直強調ê基督徒有基督徒ê款tsiah是符合咱ê身分ê內容，tsiah ē-tàng証明咱有屬上帝ê性命。

（二） 屬上帝ê性命是健康活潑ê性命
咱知影性命ê價值，的確m̄是只有表現上ê問題，khah重要ê是ē-tàng發揮性命ê效力。

咱lóng知影30 guā年前有一位北二女學生hō͘公車lòng tio̍h傷一直到taⁿ iáu活tī世間ê不幸ê性命（王曉民）。1998年11月底電視報導板橋有二位兄弟致骨疾萎縮症已經14年，阿兄不幸過身去，父母m̄敢將消息kā小弟講，驚會影響tio̍h小弟ê情緒，所有ê生活lóng需要父母kā伊扶持。

這只是單純ê生理方面ê問題，siōng重要是tuì價值觀kap人格形成所造成ê偏差ê人性ê行為模式，tsiah-ê行為往往tī社會上產生tsiok驚人ê負面ê社會現象。Tsit種問題，咱ē-tàng tuì台灣ê現實社會kā伊觀察。雖然tsiah-ê人有真完整ê外表，甚至有一kuá thang稱做一表人才。但是in ê心思意念suah充滿tio̍h罪惡，tī行為上koh-khah是無惡不作。Tsit種tuì意念所引起ê負面性命，對人類社會ê影響是非常大，tsit種性命已經失去性命ê價值，tī現代台灣社會中tsit種ê生活真普遍，真tsē烏道流氓tī地方上無惡不作，suah經由民主ê洗禮進入議會，甚至做重要ê職務，tsit種惡質ê心思意念，m̄管經過toh一種洗煉，伊ê原性lóng無法導向正途，當情形無法度滿足家己ê需要ê時，就產生問題，社會中時常有ê兇殺事件to̍h是tī-tsia。In雖然有權力、財富kap社會地位，但是實在失去了性命ê價值。因為tī tsit種性命內面無上帝ê種（mā to̍h是無屬上帝ê性命）所以外表雖然好看，但是lóng無人生實在ê價值內容。

因為無上帝ê種ê人，心內將成做屬惡魔ê世界。約翰講惡魔ê kiáⁿ兒，kap上帝為敵，beh破壞上帝ê美好ê世界。（創世記寫人被誘惑to̍h是惡魔ê力量。）伊是叛逆者，所以惡魔ê kiáⁿ兒ê人生內容，to̍h是對敵上帝，破壞世界美好ê秩序，毋認人間所有美好ê事物，in所建立是不法、惡毒、詐欺，tsiah-ê世間上所以不法ê作為，to̍h是魔鬼ê kiáⁿ兒ê行為，tsit種內容是無好處ê，雖然in ê外表有真顯耀ê成就，但是suah用不法ê手段取得。Tsit種性命tī上帝ê眼中是惡劣ê，kap屬上帝ê性命無仝，因為屬上帝ê性命，無tsiah-ê害ê屬性，tsit種害ê屬性，是促成人準講犯罪作惡mā buē感覺見笑ê因素，這m̄是出自上帝。上帝生ê，是有上帝ê性命tī心內，伊是屬於健康、活潑、會成長ê性命，tī-tsia所講ê成長，一方面是生理健康ê成熟，另guā一方面to̍h是生活ê內容ê長進。人性ê光輝mā to̍h是主耶穌所講：做光做鹽ê人生內容。Mā是像保羅所講ê，基督徒ài活出基督耶穌ê清芳之氣ê人生，這to̍h是咱ê聖經強調ê屬上帝ê kiáⁿ兒ê人生內容。當然ài有tsit種果實，基督徒ê人生內容必須是ài有像上帝ê屬性：公義kap仁愛，tsit種kā惡魔有差別ê屬性，to̍h是形成上帝ê kiáⁿ兒ê性命ê有價值ê內容。

（三） 屬上帝ê性命是會開花結果ê性命
一個性命存在並成長，但是伊ê成長過程kap內涵並無一定仝款。咱tī頂面所講已經略略仔提起tsiah-ê事實，主因是tī性命成長ê背景無仝tsiah有所差別。比如若有兄弟或者姊妹，因為環境ê需要必須ài kā一人送到別人ê厝（做別人ê gín-á）生活，tiāⁿ-tiāⁿ會因為án-ne，產生tsiok大ê差異，有好字運ê，mā有運命坎坷ê。

所以生長ê環境，對人生來講是一件非常重要ê條件。主耶穌tī馬太福音十三章掖種ê比喻中有說明tsit-ê事實，籽lóng是仝款，但是因為伊ê生存ê位ê無仝suah發生完全無仝ê狀況，主耶穌用 1）路邊，2）石頭地，3）草刺中，4）好土地上產生無仝ê結果，比如三十倍、六十倍、一百倍。真正屬上帝ê性命，必定是屬於好土地ê，必定有收成，只是份量上ê差別而已，相信咱thang tuì咱ê信仰生活去體會tsit-ê事實，這to̍h是咱ê教會一直teh強調ê屬靈ê功夫，像成長過程中所必須ê各種要素。基督徒必須重視信仰屬靈ê環境，先天kap後日ê境況lóng是咱必須重視--ê。M̄管基督徒ê信仰背景如何，tī現實ê信仰過程中，若無phah拚認真去建立屬靈ê性命ê時，所有ê先天條件，to̍h無法度彌補後日ê欠缺。

這說明了基督徒ê信仰，是真實在ê。活ê意義，是teh不斷成長，保持體內所有ê細胞活跳跳，只有tsit種活跳跳ê性命tsiah會真實成長，mā tsiah會開花結果，這是屬上帝ê性命ê必然ê結果，因為這是主耶穌贖咱siōng大ê目的。「基督為tio̍h咱犧牲了家己，beh贖咱脫離一切ê罪惡，koh潔淨咱，做祂家己人民，熱心為善」（提多書二：14）此節經文kā咱講了解屬上帝ê靈命最後ê目的，to̍h是會成做榮耀上帝ê生活者－開花結果子。這mā是上帝創造人ê目的。

以賽亞四三：7指出了人生ê主要意義。榮耀上帝，永遠hō͘祂歡喜是人生siōng大ê目的，伊ê標準to̍h是上帝ê話。只要tī人心中有上帝ê籽tī內面，tsiah-ê屬上帝ê性命ê人，就可能hō͘伊心中ê籽puh-íⁿ、成長、開花結果，就ná同耶穌所講ê籽撒tī好土地，因此有ê結實三十倍、六十倍、一百倍，無論如何只要有開花結果ê性命lóng是符合上帝所喜樂ê性命，自然就會hō͘上帝歡喜，因為有開花結果ê性命，to̍h是榮耀上帝ê性命，約翰一書三：1-12中提起三件事實，to̍h是屬上帝ê籽ê性命所應該有ê表現。

1） 清氣ê人生（約翰一書三：2-3）有上帝ê籽ê性命，ài像祂ê款，祂是聖潔ê主，所以咱就ài學習祂ê聖潔。以色列ah！Lín ài清氣，因為我耶和華是聖，這是上帝向以色列人ê要求，這是基督徒ê人生內容。

2） 無犯罪ê人生：只要tuì上帝所生ê to̍h無犯罪。因為祂ê種tiāⁿ-tiāⁿ tī祂內面就buē犯罪，因為是tuì上帝所生ê。這to̍h是基督徒ê人生siōng大ê價值。尤其是處tī tsit種腐敗烏暗罪惡ê現實社會中，上帝要求屬祂ê kiáⁿ兒ài經營buē犯罪ê人生生活，tī-tsia需要siōng嚴格、謹慎ê信仰ê反省tsiah ē-tàng達成！

3） 咱ài相意愛，相意愛ê人生內容是約翰特別強調ê信息，因為咱既然是屬於愛ê主耶穌，咱必須ài teh生活中kā疼ê標幟夯kuân，hō͘人lóng看會tio̍h上帝ê籽ê真實ê內容。約翰講「無疼ê m̄是tuì上帝出，mā m̄-bat上帝」因為上帝是疼。

只要tī咱ê生存環境中堅守tsiah-ê原則，相信咱心中屬上帝性命ê籽必定會開花結果。

結論：相信每一個屬上帝ê基督徒ê心中lóng有上帝ê籽，請注意，籽所khǹg ê環境（信仰生活ê自愛），是m̄是保管妥當？是m̄是有濕氣？Kám有通風？籽是m̄是掖tī好土地？掖種了後puh-íⁿ成長ê照顧如何？lóng tio̍h tiāⁿ-tiāⁿ檢測ê。