《受恩蒙福的一生》

 | | | 轉寄

人虧神補

作者 林宗要 2010.08.01

創世記13章14-18節

Khiā-tī人ê立場來思考，亞伯蘭kap伊ê侄á羅得ê分開，選擇in未來生活ê方向ê時，咱會看tio̍h，tsit位序細羅得ê現實人性。伊無客氣來用伊目tsiu前ê判斷kap選擇做選擇，hit時被形容做kah-ná上帝ê園kap埃及地ê約旦河邊ê一片平原。

若用人ê立場來思考，人會認為羅得未來ê境況一定是充滿非常美好ê遠景kap無限量ê將來，因為伊所選ê是siōng適合伊生存ê環境，所以將來性看好！

反倒轉來看伊ê阿叔亞伯蘭，好--ê已經被羅得選去ah，伊kan-ta ē-tàng接受tshun--ê，he就是石頭地，對畜牧是無啥幫助--ê， bē-sái算是好土地，kap羅得所選ê無仝，照人ê觀點來看是不利人ê生存環境ê狗屎地。

但是人生ê成敗因素，並無kan-ta限tī物質ê境況，iáu有伊其他因素ê影響，雖然物質條件對人生有淡薄á有關鍵性ê影響，若是單純用物質ê觀點來看tsit段聖經，羅得必定是成功，亞伯蘭ê生活一定是tī困苦中，但是人生ê成敗m̄是kan-ta用物質狀況來決定，尤其是信仰者ê人生狀況，koh-khah ài體會tio̍h tī信仰狀況中，建立kap上帝之間屬靈ê關係。伊tsiah是hō͘人tī上帝面前蒙福ê主因。咱ē-tàng tuì教會史中，發現tio̍h一件絕對ê真理，就是信仰ê環境往往是信仰蒙福（被上帝所喜樂）ê主因，所以一個信仰者對人生環境做選擇ê時，必須ài注意tsit種上帝喜樂ê因素，mā就是ài設法ē-tàng定定生活tī上帝所喜樂ê境況中，tsit件事實，是信仰者承接神恩ê絕對因素！

咱ē-tàng tuì tsit段聖經來看信仰者ê人生實況，若用人ê立場看羅得ê時，伊所選擇ê對伊ê日後ê人生有正面ê幫助，因為生存條件優越，ē-sái講是伊疏忽了信仰者ê信仰境況，因為伊ê現實是tuà-tī極pháiⁿ koh得罪上帝ê所多瑪城，tsit種環境對伊ê屬靈性命是有負面ê影響。

反tńg來看亞伯蘭ê狀況，伊取得ê土地是不利伊生存ê所在，但是伊suah tuà-tī上帝所應允ê所在，對信仰者來講，以上帝為優先、信仰優先ê生活方式，是上帝所喜樂ê決定性事實，因為tī伊ê人生生活中，永遠有上帝ê帶領kap顧守，這是信仰者ài確立ê生活方式。

因為人ê如意算盤有時會變卦，人認為妥當良好--ê，結果卻是倒反。有時，人認為不幸、危機--ê，顛倒有美好ê結局。比如跋一倒，撿tio̍h一隻金雞母仝款，tī現實ê狀況中，有人認為穩成功ê tāi-tsì卻發生變故。人所看做困苦ê tāi-tsì，顛倒帶來榮光ê結局！

羅得kap亞伯蘭ê tsit件事實，加減有說明tsit種狀況，羅得kan-ta用人ê立場去面對伊ê狀況，kan-ta重視對伊ê遊牧生活有益ê一片肥沃ê平原kap豐盛ê水源，suah疏忽了ē-tàng引tshuā人到成功ê基本要件 ＿信仰ê實在，因為tī信仰內底，信仰ê主宰耶和華是創造主，伊是會hō͘無變有ê上帝！

亞伯蘭雖然hit塊肥沃ê平原已經被伊ê侄á所選，一向主張bē-tàng相爭ê伊只好選擇另外一片地，就是迦南地。雖然，hit時伊所選ê所在不如羅得ê所在，是無適合伊hit時生存ê境況，m̄-koh伊真重視上帝所應允--ê，iah就是信仰ê環境，伊確信上帝kap伊立約ê事實，tsit種tuì信仰所帶來ê人生ê祝福，有時無明顯ê現況，但是tuì信仰ê實在，一定有美好ê結局，tsit種事實，m̄是用人ê觀點或者人ê理智所ē-tàng了解--ê，只有用信心去面對ê時，信仰者tsiah ē-tàng體會tio̍h tsit種看bē-tio̍h ê信心所帶來ê上帝美好ê應允。咱ē-tàng tuì咱教會生活中去體會tsit種tī信仰ê世界所發生ê上帝ê應允tī祂所疼ê人ê中間，mā就是咱ê教會一直teh強調基督徒必須把握信仰生活，來體會上帝無限ê應允。基督徒ài深信tī人ê計畫kap安排ê背後有上帝ê成全，人生ê狀況m̄是tuì人ê如意計畫kap策略tio̍h ē-tàng每項成功--ê，因為上帝賜福ê人！tsit種事實，m̄-nā tī教會史上ē-sái看見﹝亞伯蘭、約伯、初代教會﹞，tī人類史上mā ē-tàng看tio̍h﹝比如第二次大戰，當時ê日本kap德國計畫無幾年全世界就是in ê﹞，hō͘咱koh一pái體會tio̍h「謀事在人，成事由天」。

Tuì tsit段聖經咱來思考下面幾點：

（一） 人虧神補ê發生過程→ 紛爭
頭前咱已經提出發生分開ê主因在tī in現實ê狀況，因為in現實ê環境無法度滿足in兩大家庭ê實際需要，所以in必須ài分開，tsit款事實是人生過程中必然ê事件。

有風度ê亞伯蘭提出hō͘伊ê侄á羅得選擇條件，雖然照人ê觀點看起來，現實上伊比較khah食虧，原因是適合in ê生活環境ê美好條件，lóng hō͘伊hit-ê無客氣 ê侄á羅得先選去，伊已經開嘴，當然bē-sái有後悔ê心態。

所以伊必須tuà-tī人看起來是拋荒地ê所在建立伊ê人生生活，但是tsit-ê所在是伊kap上帝之間所立約--ê，是上帝所應允流奶kap蜜ê所在，雖然hit時看起來是拋荒地，但是伊suah確信這是上帝beh賞賜伊ê後代美好ê迦南地，因為伊對上帝ê信仰是絕對--ê，所以伊唯一ê重點就是確立好伊kap上帝之間ê屬靈關係，講到其他ê tāi-tsì，伊根本無teh注意，因為伊相信上帝bē辜負人，祂beh賜福koh再賜福hō͘只要是盡心盡意疼祂守祂誡命ê人！因為伊有tsit種信心，雖然處tī 拋荒地，但是確信會出奶kap蜜ê肥沃之地。Tsiah-ê lóng是因為紛爭所引起--ê，tī基督徒人生中，難免mā會有tsit種問題發生，信仰者必須tī tāi-tsì中將所有ê問題引tshuā到以信仰為主體ê生活狀況ê時，就會像亞伯蘭當時ê狀況→ 拋荒地變做流奶kap蜜ê迦南地，或者是雅各ê經驗，苦境變做聖路，tsit種信仰生活ê體驗是屬靈ê siōng kuân狀況，基督徒若ē-tàng建立tsit種生活狀況ê時，伊ê屬靈ê性命是非常ê偉大。

（二） 分離ê教示
人生tī所有ê事件中，lóng tio̍h ài設法去體會正面價值，對人生生存有利ê內容，咱看tsit段聖經對當時ê亞伯蘭、羅得來看是悲哀ê 事件，因為tī-tsia有因為相爭所引起ê分離，但是咱ē-tang3tui3 tsit-ê tāi-tsì來體會tio̍h幾項寶貴ê人生真理：

A) 吞忍m̄是食虧
Tī tsit件tāi-tsì中，咱ē-sái看tio̍h亞伯蘭有表現出信仰者ê良好風度，吞忍kap 讓步，因為tī雙方發生爭端ê時，若互相堅持家己ê意見，往往是無法度化解問題，顛倒增加問題ê嚴重性，既然有相爭發生，就是teh爭自身ê利益權限，tī人生紛爭中，實在真pháiⁿ決定是siáng ê絕對性，而且，人又koh是自私ê存在，一直為tio̍h家己ê利益設想，khah bē曉khiā-tī別人ê立場思考tāi-tsì，這就是人kap人之間ê問題性→ 爭端。Tī-tsia咱看見亞蘭ê偉大品格「你我bē-tàng相爭…你倒pîng我正pîng，你正pîng我倒pîng。」伊ê風度kap吞忍ê性格tī-tsia完全表現出--來，tī-tsia咱ē-sái體會tio̍h信仰之父偉大ê信仰kap品德，伊ê完全吞忍，但是伊suah無食虧，中國俗語講「有人一虧，天有一補」。台灣俗語講「Hō͘人騙khah好睏，騙人者buē食buē睏。」只有良心不安。

B) Lín各人bē-sái kan-ta顧家己ê tāi-tsì，也tio̍h顧別人ê tāi-tsì（腓立比二：4）
這是針對自私ê人性所提出ê一句忠告，通常ê人生，只khiā-tī家己利益ê立場思考tāi-tsì，tsit種結果往往是造成人生問題ê原因，因為伊ê對手mā是自私ê人，m̄-koh咱看tio̍h亞伯蘭tī-tsia所表現--ê，to̍h是保羅向腓立比教會所講--ê，伊勸人bē-tàng成做自私ê人性，伊教導人ê完全，在tī 多多替別人想，這是建立理想ê人生、社會所bē-tàng欠缺ê因素，今á日咱一直teh責備台灣社會狀況ê惡劣，主因tī-tsia，就是人太自私，kan-ta想tio̍h家己ê利益，無想tio̍h別人ê立場。「日頭赤焰焰，隨人顧性命」、「別人ê kiáⁿ死buē了」。Tsit二句台語完全反映台灣ê人心，tsit種自私ê生活方式，就是造成社會ê混亂kap罪惡ê主因。咱看亞伯蘭所表現是健全ê人生態度，伊先顧慮tio̍h別人，伊無用私人ê立場處理tāi-tsì，這就是伊蒙恩ê主因。Tī人間，咱看hiah-ê受上帝祝福ê人，in ê生活lóng是褪去自私ê外表ê人！

C) 重視生活環境
咱tuì tsit段聖經來省思咱ê現實生活，這是人生現象中ê必然ê事件，無論是m̄是有紛爭或者是問題ê發生。人到一個階段ê時，必須ài分離，「人生無不散ê筵席」。雖然tī世上人ê分離有時是暫時性--ê，出外，學業，事業，tsiah--ê lóng是暫時性ê，但是，咱所需要ê人生生活是啥物？通常人lóng真重視婚姻，學業，就業，lóng期待有良好ê狀況，因為伊kap人生有切實ê關係。孟母三遷teh說明伊對人性ê影響。基督徒必須省思，你信仰ê環境如何？是m̄是重視伊？你本身如何經營信仰？你家庭ê信仰氣氛如何，你ê kiáⁿ兒ê心靈狀態是án怎，咱ē-sái用羅得ê狀況來反省。

D) 財富m̄是絕對--ê
財富對人ê生活確實有正面ê作用kap價值，伊能替人生完成真tsē有價值ê tāi-tsì，但是伊的確m̄是萬能，或者有錢使鬼會挨磨，人必須清楚財富若處理無妥當，mā會帶hō͘人生真大ê災難kap悲哀。咱看人生中所有ê腐化以及墮落、犯罪ê行為，juā-tsē lóng kap財富有關，咱ē-tàng tuì現實ê生活狀況去思考，當時ê羅得kan-ta用充實伊ê現實做伊ê選擇人生ê 重點，所以伊選khah有財富ê所多瑪城附近ê平原，tī人生現象中有真tsē 不法無道德lóng kap伊有關聯，因此tī處理上ài非常慎重，咱無否定伊ê價值，但是必須好好利用伊，bē-tàng因為伊變成犯罪ê工具，因為人生tī財富以外iáu有koh-khah重要ê tāi-tsì，若運用無妥當，伊就成做你人生犯罪ê工具而已！

（三）信仰所帶來ê祝福（人虧神補）

咱已經大約論述tsit件tāi-tsì發生ê時，兩人ê表現kap in ê心態，tī-tsia咱koh來思考亞伯蘭對處理tsit-tsān tāi-tsì 正確ê態度，he是tuì信心所產生出來ê行為，伊通常lóng會表現出hō͘上帝喜樂ê結果。

所以對信仰者來講，無論伊所面對ê狀況對自身ê利益如何，因為信心，伊就會真坦然去做，ná親像亞伯蘭當時處理雙方奴僕ê紛爭仝款，tsit種因為信心ê行為，有時看起來無一定有利，顛倒是食虧，﹝ná親像亞伯蘭好ê平原lóng hō͘羅得選去，伊所ē-tàng有ê就是hiah-ê 拋荒地﹞m̄-koh伊suah用信心面對人生ê一切，因此有hō͘人感覺意外ê人生結局，就是活tī hiah-ê人看做拋荒地ê狀況中，suah得tio̍h上主無限﹝超出人所想--ê﹞ê祝福。

當然信仰者ê心態m̄是得tio̍h上帝祝福ê心態tsiah去行動（m̄是存心kan-ta想beh上帝ê祝福），he是無條件順服上帝ê旨意ê生活，tsit種信仰生活往往是神開天窗賜福hō͘祂所疼ê人ê條件。咱看聖經中ê亞伯蘭：

A) Siōng完美ê一句話（創十三：8-9）
「你我bē-tàng相爭，你我ê奴僕mā bē-tàng相爭，因為咱是骨肉，每tsit-ê所在kám-m̄是lóng tī你面前mah，你ē-tàng選擇。」伊是序大，有án-ne寬大正確ê處世原則，公正無私ê心胸kap心胸開闊而且充滿疼心ê品格，tī tsit句話中ē-tàng看tio̍h。台語中有一句話「有量tsiah有福」，尤其是kap當teh食虧ê人所講ê話，確實是án-ne，這是人生ê原則，只要人有tsit-ê心，伊ê人生必定有良好ê結局，thang tuì現實ê狀況來證實。

B) 放棄長者ê特權
亞伯蘭對tsit件 tāi-tsì ê態度，tī伊所提出ê條件，咱已經ē-tàng充分了解伊ê人格kap信仰，tsit種無私公正充滿疼心ê操守，就是形成伊所以hō͘上帝悅納ê決定性事實，mā就是伊tī真tsē困境中，有上帝豐盛ê祝福，就是tī伊偉大ê品德kap絕對ê信心，另外，咱tī-tsia mā ē-tàng看出伊ê謙卑，tī古早時代長者ê權威是無限--ê，過去四五十年前ê台灣社會ê「序大」或者父權，（siōng代表性ê一句話「lín父」﹞”，「序大」定定用薰吹叩hit-kuá m̄聽話ê人，亞伯蘭有tsit-ê權威，但是伊suah放棄，表示伊ê做人略略á有親切感，一個有親切感ê長者，bē tshìn-tshái去運用伊ê權限，這是事實！疼心kap謙卑ê心態，就是形成ê原因。

C) 重視愛上帝ê生活
這mā是亞伯蘭tī hit種狀況之下，受上帝大大祝福ê原因，因為伊事事以上帝為主，為中心，無論到任何所在，lóng會替耶和華起一座壇，就是建立伊kap上帝之間ê敬拜ê關係﹝禮拜ê生活﹞tsit-ê事實，是值得今á日信徒學習ê，咱定定處tī像伊ê狀況中，通常是先處理家己現實生活ê問題，khah無像伊tsit種以上帝為先ê生活表現，實例：基督徒若換khang-khè，一定先去tshuē教會，然後投入教會生活，後來相當受祝福，上帝疼gōng人！

結論：
確立你正確ê人生觀，學習亞伯拉罕ê品德kap信仰ê風度，努力完成tī任何人生過程中，就會領受主悅納ê生活。