《媒合也可以尋著真愛》

 | | | 轉寄

這杯咖啡siáng付錢？

作者 劉峯松 2011.09.25

　　「泰瑞薩」分別tī北、中、南設立婚姻服務khang-khè站，但是若是beh使用場所tio̍h ài負擔一杯咖啡siōng低ê消費額，這杯咖啡大約一百kho͘左右。相親ê時這杯咖啡ài由siáng來付錢，有一點á有學問、淡薄á有意思，mā有淡薄á傷腦筋neh。差不多有tsit幾種狀況，由男方替女方付錢；由女方替男方付錢；男女雙方各人付各人ê；無to̍h是發生其他意外。

先來講男方替女方付錢ê情況。男方替女方付錢，一直hō͘人認為是天公地道ê，無論是tuì男尊女卑ê東方觀點，á是男士ài善盡保護女士天職ê西方觀點，lóng是án-ne。

而且tsa-po͘把握tsiah開一百kho͘ ê機會，就thang建立「準情人」ê地位、表示好感，是án怎m̄ án-ne neh？這一百kho͘ ê付出，iáu顯示你ê慷慨、教養好、有紳士風範，啥物tāi-tsì lóng m̄免勞煩女士操心。

Koh再講，一個下晡或者一個暗時，有一位真用心打扮、芳tshìng-tshìng ê suí姑娘全場陪伴，koh hō͘你看夠本、hō͘你鼻夠本，每一ê行動lóng為tio̍h留hō͘你好印象，而且又koh是聚精會神、認真teh聽你ê種種議論；to̍h算你歡喜kah m̄知人、烏白講話，伊今á日性地mā特別好，絕對bē計較，甚至iáu koh應你幾句，hō͘你非常歡喜；tsiah開一百kho͘，實在siuⁿ會hô啊。

付這一百kho͘，hō͘櫃台前ê氣氛非常喜樂；付這一百kho͘，hō͘你信心大增、行路有風，暗時或者好夢相隨，或者歡喜kah失眠，lóng無關係，準會帶hō͘你無限想像，「咦，今á日tsit位tsa-bó͘-gín-á hō͘我付一百kho͘，真hō͘我面子，應該有希望tsiah-tio̍h。」

萬一今á日來相親ê tsa-bó͘-gín-á，實在講話buē投機，或者各方面條件kap原來ê想像差真大，但是照付這一百kho͘ mā無算啥，只是留hō͘人一個好印象。聰明ê tsa-po͘ lóng想過，若無付一百kho͘，tsa-bó͘-gín-á會án怎想，或者會有啥物tuì家己不利ê解讀mā無一定，包括凍霜鬼、sàn-tshiah鬼、驕傲、欺負人、大男人主義……lóng會向tuì你來。了後若tī路e相tú，可能iáu kap你tseⁿ或者假做無看見，若有朋友同行，一定tshi-tshi tshū-tshū、暗中kā你罵：「to̍h是tsit-ê tsa-po͘，一百kho͘ mā開buē起，真『凍霜』。」

總講一句，m̄管koh再án怎講，開一百kho͘ lóng是tuì你有好處，ē-tàng永絕後患，buē發生種種任何無好ê tāi-tsì。

續落來講女方替男方付錢ê狀況。講真正，tsit種情形無應該發生，就kah-ná雞公無應該生卵仝款；但是並m̄是從來m̄-bat發生過。有一kuá tsa-po͘行到櫃台ê時，tsiah知影錢包bē記tsah來，假仙假tat，gîm半晡，但是to̍h是gîm buē出一百kho͘，滿面紅吱吱，tsiok想beh挖一個孔覕起來，tsit時gâu看場面ê tsa-bó͘，就講「今á日我來付，免客氣、免客氣」。

有ê tsa-bó͘ 會由父母、叔伯、兄嫂陪同，真大陣，一kuá tsa-po͘看tio̍h會緊張、驚惶buē停；緊張ê是，今á日面對真tsē位觀察員、真tsē位口試委員，m̄知如ài何應對；驚惶ê是，tsit-pái賬單已經超過一百kho͘，等一下beh án怎？

但是「免驚」，tsiah-ê 做伙來ê觀察員、口試委員，一定有帶頭ê人，早to̍h恬恬á家己走去付，mā順續替你付清啊。Iáu有相親結束，tsa-po͘一ê腳步緊就飛出門外，kah-ná看to̍h啥仝款，tsit種情形無一定ài uì pháiⁿ ê方向去想，原來tsa-po͘ iáu-beh續攤，先去開車，已經講好由tsa-bó͘付錢。

第三種情況各人付各人ê。素昧平生ê雙方為tio̍h相親，有人的確已經期待真久，幾個暗時lóng睏buē好，tuì目睭內ê血絲、目色茫霧to̍h看會出真正有講buē出ê歡喜kap厭倦ê交雜之情，而且為tio̍h beh籌備tsit-pái見面，iáu koh ài kā其他ê tāi-tsì排開、預留時間，當然一定ài真心打扮tsiah來，一點á lóng m̄敢tshìn-tshái。

但是lín千萬mài buē記，這只是相親而已，會開花結果boh iáu m̄免講siuⁿ早，mā m̄免想siuⁿ-tsē，今á日雙方坐做伙、講話真投機，互相使目尾，tsē只是禮貌，互相尊重而已，teh散場了後，互相可能隨時變tńg去生分ê過路人。Tsit-pái見面只是造化弄出ê一點狀況，或者只是萍水相逢而已，雖然也tio̍h作戲、認真面對，suah m̄免真正相信「我就beh結婚、就beh出嫁阿」，若無空歡喜一場，事後tio̍h非常厭氣。

相親tsit款tāi-tsì，到底只是一個幻覺、幻影lah，距離結婚禮堂iáu有十萬八千里，所以ua̍t頭來看這一百kho͘ siáng付，就m̄免siuⁿ古意、siuⁿ羅曼蒂克阿。而且koh有一kuá相親大王，是婚友社ê常客，看過十個八個buē怪奇，看過一百兩百個mā真普通，mā的確有一位先生kā我講，伊tuì少年ê時開始走婚友社，比如今年teh-beh五十，至少看過四、五百個tsa-bó͘-gín-á。一般婚友社入會ài納錢、紹介ài納錢，若是這一百kho͘ koh再由一方(通常男方)付，koh無一次相親有成功，kám buē無變成冤大頭mah？

所以阮觀察tio̍h，總是無閒無停teh相親ê tsa-po͘，就buē替tsa-bó͘-gín-á付錢；to̍h是講，buē替女方付錢ê tsa-po͘，有buē少lóng是相親大王。

Mā有一個實例，請女方一定tio̍h記起來。有一位tsa-po͘解讀tsa-bó͘-gín-á接受這杯咖啡是釋出愛意，就kā人jiok kah buē喘氣，iáu koh不停發簡訊，害tsit位tsa-bó͘-gín-á趕緊寄現金一百kho͘轉去，iáu換手機號碼。Hō͘生份人加開一百kho͘，當然有佔人便宜ê感覺，造成家己ê大小災難mā是ìng該。

天下間ê tsa-po͘人ah，真正會烏白亂想，特別是婚事buē順ê人，to̍h算是一點á進展，lóng會歡喜kah擋bē-tiâu；天下間ê tsa-bó͘ ah，tio̍h-ài khah sè-jī，siōng好kā任何缺口that死，mài hō͘ tsa-po͘人有機會。M̄管是一百kho͘，iáu是一千kho͘好阿，當今世界有幾個tsa-bó͘開buē起neh？tshìn-tshái一個名牌，lóng m̄-nā tsit-ê數目，千萬bē-tàng siáu貪，媽媽m̄是lóng tiāⁿ-tiāⁿ án-ne講mah？

M̄-koh講tio̍h tsa-bó͘ ài家己付一百kho͘u ê哲理，mā iáu無應該是頂面所講tsiah-ê kah-ná是koh m̄是ê論調。人類行到現代，男女關係已經大大改變，以前tsa-bó͘人ê任務只有煮飯、生kiáⁿ，現在雖然iáu是ài生gín-á，但是輕鬆真tsē，尪是一定ài做伙照顧；講到煮飯ê tāi-tsì，要求雙方輪流做、做伙做，有toh一個tsa-po͘人敢hiⁿ3-haiⁿ？

講tio̍h khang-khè thàn錢，講到社會地位，講到男女平權，或者koh再講到自由、平等tsiah-ê普世價值……，今á日iáu-beh tsa-po͘人付一百kho͘，mā siuⁿ無理取鬧阿，無一定iáu侮辱tsa-bó͘-gín-á neh，「咳，你先生看buē起我無一百kho͘ mah？我ê名字kám iáu是軟弱tsa-bó͘ mah？」無論東方大俠、á是西方騎士，助強扶弱，保護寡婦、sàn-tshiah人、老人，lóng是美德kap職守。特別對tsa-bó͘人ê態度，tiāⁿ-tiāⁿ成做男性氣概、氣質、氣度ê指標，所以英雄救美ê故事tiāⁿ-tiāⁿ是詩歌小說siōng好ê題材。

但是這一切lóng漸漸過去阿，尤其西方資本主義興起了後，出現新倫理、新禮儀，這一百kho͘ lóng ài各人付各人ê tsiah-tio̍h，這mā應該是人類ê一項大進步，tsa-po͘人ê一項大解脫(tsa-bó͘叫大解放)；tsa-po͘ tshìn-tshái替tsa-bó͘付一百kho͘，萬一tú-tio̍h tsit種時代新女性，顛倒是踢tio̍h鐵枋。Tī時代新女性ê新觀念內，buē hō͘你付一百kho͘並無表示對你印象無好、無表示你無望阿，「相親是相親」「lim咖啡是lim咖啡」，完全是二回事，bē-tàng lām做伙，mā無應該有所牽連。

這一百kho͘ siáng付，無應該成做心理戰，無tsiah-ni̍h複雜。Siáng付一百kho͘，無偉大，無體貼、驕傲，無慷慨、凍霜，無phàⁿ手、鹹龜，mā無君子、小人等等問題。堅持beh家己付一百kho͘ ê tsa-bó͘-gín-á，伊ê性格是獨立ê、理性ê、互惠ê，mā可能是開明ê、有智識ê、有國際觀ê，而且可能是一ê有高智慧ê人種，絕對m̄是普通人；tsa-po͘人若tú-tio̍h tsit種新女性，就m̄免假仙假tat，m̄免強頭，koh-khah m̄免自卑厭氣，或者有種種無必要ê解讀，kui氣順伊ê勢，hō͘伊付一百kho͘ to̍h好。假若有tsa-po͘有仝款ê想法，本來就無準備beh付這一百kho͘，án-ne互相lóng無相欠，siáng mā無欠siáng，二人tio̍h繼續kā看落，看了後會有啥物發展好阿。

Siōng重要ê，tī當今陰陽顛倒、五倫不分、綱常蕩然ê社會，見怪不怪，大家慣習tio̍h好阿。但是mā有一種改良式ê，tsa-bó͘-gín-á teh談話會結束tsìn前，tsah tio̍h溫情kā一百kho͘ 提hō͘ tsa-po͘，講「我家己付好阿，請幫我付錢」，án-ne一方面真hō͘ tsa-po͘面子，mā buē tī櫃檯上發生相爭付錢ê場面；一方面tsa-po͘若有機會beh替你服務，lóng真有光榮感，而且一生lóng願意，這是男性ê尊嚴ah！

　　最後是其他意外ê狀況。Tī siáng會付一百kho͘ ê邏輯中，mā應該有第四種狀況，to̍h是一些奇怪好笑ê趣味tāi-tsì，比如講，

tsa-po͘ bē記付錢人就走去，tsa-bó͘ mā無願意替伊付；

有一位tsa-po͘看tio̍h tsa-bó͘ tshuā爸爸來，tsiah講三兩句話就氣kah pho̍k-pho̍k跳走去，這一百kho͘ mā m̄知影siáng該付；

男女lóng認為食喜酒或者同學會，一來就先納錢，所以散會隨人走，並無bē-tàng，其實根本無納，已經變成歹帳；

koh有tsa-po͘交代tsa-bó͘ ài付錢阿，tsa-bó͘ suah提收據，phah算請款報帳，有一點á像大官報特支費仝款，phah拚收集發票neh。

　　以上四種情形、四種演員、四種劇本、四種笑果，松丘suah m̄知ài如何下結論tsiah是。出身海軍ê松丘，做兵ê時長官告誡阮，「根據海軍傳統，以後行到任何餐廳，lóng由軍階kuân ê付錢。」tsit句話我記tī心內，儘量遵行。若照tsit種傳統，án-ne男女中siáng大siáng付錢就ē-tàng，無奈男女並無啥物軍階，tse 是beh án怎？咱這一代自細漢學tio̍h一種教養，to̍h是長者付錢ê教養，án-ne ē-tàng善盡提拔後進ê責任，因此男女之間siáng年歲大siáng付錢mā ē-tàng。

不過松丘遵行ê海軍傳統或者學tio̍h ê教養，真正並無適合用tī這一代人，特別teh相親án-ne微妙ê心理戰中，絕對bē-tàng lóng無改變、mā絕對bē-tàng相信老套優先。Hō͘伊充滿五彩siōng好，hō͘伊千奇百怪siōng好，hō͘伊自然變化、自然發展siōng好。無仝ê人有無仝ê劇本，lóng照家己寫好ê劇本去演出就ē-tàng阿，m̄免抄來抄去、看來看去，而且tsiah一百kho͘ niâ，koh何必tiāⁿ-tiāⁿ傷腦筋neh。講到khiā-tī店家ê立場，最後一種情況就儘量mài發生，拜託ē記付錢oh，m̄管siáng付錢，店家lóng會kā你行禮，表示感謝。

本文出自玉山社出版《媒合也可以找到真愛》