《媒合也可以尋著真愛》

 | | | 轉寄

交往階段kám ē-tàng牽手？

作者 劉峯松 2011.11.06

台灣人結婚叫「娶某」，「某」koh叫「牽手」，「to̍h是ē-tàng tiāⁿ-tiāⁿ牽tio̍h手ê hit-ê tsa-bó͘」，tsiok溫暖、hō͘人tsiok 想beh愛oh！是「某」，愛「牽」就去「牽」；m̄是「某」，就buē-sái亂「牽」。若看tio̍h tsa-po͘人牽ê m̄是「某」ê tsa-bó͘ tī路ê行，就有問題。一般來講，看tio̍h男女「牽手」，to̍h是翁仔某；m̄敢「牽手」，就m̄是翁仔某。

不過teh戀愛階段thang提前「牽手」，若男女兩人m̄是翁仔某但是是敢公開「牽手」，thang斷定in teh交往；若是無teh談戀愛，對方mā buē hō͘伊牽、mā牽bē-tio̍h。

「牽手」看起來kah-ná無啥物學問，suah真有學問。M̄管翁仔某或者男女朋友牽手，是表示兩人ê感情bē-bái，愛情熠藍燈；明明是翁仔某或者男女朋友，suah無tiāⁿ-tiāⁿ「牽手」，是表示感情退燒，燈色曖昧不明；若兩人根本無koh牽手，貌合神離、感情起變卦，兩人當teh按算beh如何分手，或者希望談判，因為長期冷戰mā m̄是辦法，tsit時紅燈已經to̍h啊。不過mā有例外，譬如政治人物出現tī公眾面前，to̍h算愛情已經teh-beh分手或者昨晚tsiah起冤家，á是勉強來kik出典型笑面、「牽手」出現；iáu有tú去外口偷食tńg來ê tsa-po͘人或者tsa-bó͘人，tńg到厝了後lóng先熱情kā對方攬tiâu-tiâu，kám koh會用「牽手」這小動作掩khàm而已。

Tuì自由戀愛hit-ê門進入結婚禮堂ê，無teh討論範圍；若是beh行另外一扇門、tuì婚友社媒合成功tsiah來踏入紅地毯ê，to̍h是咱ê話題。

大多數上媒合程序，第一步先經過kap媒人「面談」；第二步安排「相親」(台灣人叫「對看」)；「相親」佮意tsiah有「交往」，這是第三步；「交往」順利成功，最後「結婚」進入洞房，這是第四步。

To̍h是面談→相親→交往→結婚四ê順序。其中siōng奧妙ê，mā是有淡薄á kā自由戀愛無仝ê，to̍h是「交往」。「交往」是m̄是「戀愛」？「交往」中kám ē-tàng「牽手」？若「交往」m̄是「戀愛」，án-ne「交往」teh tshòng啥？手khǹg toh位？若「交往」to̍h是「戀愛」，kám buē感覺速度siuⁿ緊、真奇怪，而且雙方真正準備好啊mah？到底「交往」ê性質是啥？若無先hut清楚是bē-sái ê。

松丘家族一對非常速配ê羅貝kap瑪麗，最近為tio̍h「牽手」ê問題，困擾真久，若拍成一支短片或者畫成連環圖宣導，一定真有意思，當然一時做bē-tio̍h，只好用文字講故事。

自hit工瑪麗見過羅貝了後，ē-tàng講是一見鍾情，羅貝雖然有小khuá躊躇，但是是經松丘使弄「千萬bē-tàng錯失一生可能kan-ta一次thang好好á談戀愛ê機會」，伊就歡歡喜喜接受啊。有一次in約會tī tú開放無guā久ê「自由廣場」，瑪麗hō͘羅貝ê批內講：

「teh散步ê時tsūn，我bat希望你牽我ê手，對我來講，牽手除了表面ê款，iáu有真深ê意義；伊是siōng深mā是siōng淺ê……。」

羅貝應講：

「有可能妳認為我無牽妳ê手、開嘴直接講『我佮意妳』才忽然tī咱之間劃出一條線……。事實上，幾pái接觸落來我發現我愈來愈佮意妳一kuá無法度表達出來ê特質。」

真明顯ê是這對新人互相lóng有好感，甚至已經墜入情網；但是是後來tī植物園約會，羅貝á是無牽瑪麗ê手，情形改變，兩人koh分別khà電話來ài阮鬥相共，我tsit時tsūn tsiah驚覺tāi-tsì嚴重啊。

對瑪麗來講，「牽手除了表面ê款，iáu有真深ê意義」，若是連「牽手」án-ne表面ê款lóng做bē到，iáu有啥物希望thang講neh？但是tuì羅貝來講，「我若牽伊ê手」就表示「接納伊」、「愛tio̍h伊」、「佮意伊」，但是「我準備好--buē？」若iáu無準備好，kám-m̄是欺騙伊、佔伊便宜？

羅貝學理工出身，理智強過感情，buē做莽懂ê tāi-tsì。坦白講，若羅貝自頭到尾lóng動「手」，未來絕對無進展thang講；但是瑪麗長期處tī無保障ê不安定狀況之下，情緒就真pháiⁿ控制。若無動「手」，就bē相攬；無相攬，mā buē相唚或者做其他tāi-tsì ê可能，án-ne，感情像一窟死水，激buē起水波，tsit種柏拉圖式ê愛情，只是浪費性命而已，對婚姻大事、傳宗接代有啥物幫助？

瑪麗並m̄是tshìn-tshái講講、無tāi-tsì tshuē tāi-tsì做，伊ê情形實在hō͘人不忍心。M̄-koh，若是羅貝iáu無準備好，就趁人無注意ê時下「手」，而且步步逼進、直接進入重點，而且生米煮成飯，到時tsūn發覺並m̄是真正「愛tio̍h伊」、「佮意伊」，beh收手已經buē赴啊、後悔mā已經buē赴啊，啥物lóng buē赴啊，所以tsit時kám ē-tàng hō͘伊繼續錯落去、結成錯誤夫妻，或者kā人放sak、uat頭做伊去，hō͘伊一世人良心不安，hō͘人咒懺或者等人報仇mah？

可見羅貝tsiah是真正ê柳下惠之流(根據現代人考證，確實有柳下惠tsit-ê人，但是並無柳下惠ê tāi-tsì)，是正人君子一個，tsit種正人君子tsiah thang kā終生交託hō͘伊。這看起來kah-ná人人lóng有理，無定論，事實m̄是án-ne，講破了後，雙方應該lóng大歡喜，thang繼續「交往」tsiah-tio̍h，因此tsit位羅貝hō͘松丘ê批講：

「瑪麗小姊有淡薄仔黏人，時常怨嘆我m̄-tshap伊，其實我對伊jú來jú有好感。以前『柔情像水』對我來講，kan-ta是句成語，自從認bat伊，tsiah有這款親身ê體驗，雖然iáu buē到真狂，但是感受iáu算深……。」

可見危機已經化解啊。堂‧吉訶德傳說：「希望上帝會kā你這tsān tāi-tsì安排好，因為開始ê時to̍h是非常純潔，結局ê時mā應該是快樂ê。」(Ⅰ43)

有牽手boh，事關要緊，但是無論如何，ài詳細想好。若敢牽人ê手或者敢kā手hō͘人牽，的確事有可為、前途看好，發展快速、比較khah有希望，但是ài負責任，bē-tàng後悔；若m̄敢牽人ê手或者m̄敢kā手hō͘人牽，就ài有耐心、bē-tàng急躁，bē-tàng冒險，慢慢等看覓。堂‧吉訶德傳說：「若是危險超過希望ê時tsūn，巧巧人ê辦法是ài保全家己過今á日等明á載用ê，並m̄是一股勁兒去kā險冒完ê。」(Ⅰ23)同一本冊koh講：「戀愛tsit-ê物件tī青年人大部分無非to̍h是情慾，最後ê目的只是teh貪圖一ê歡喜，用過啊mā就結束啊，當初kah-ná是愛ê hit種物件，mā就tuè leh消失啊。」(Ⅰ24)tsiah-ê話lóng講kah真對，何況「交往」無一定是「戀愛」，kám thang hō͘ tāi-tsí變kah無法度控制。

「交往」了後，若是情投意合進入「戀愛」階段，有牽手boh的確ē-tàng當作指標、當作分水嶺。講到「交往」juā久tsiah thang「牽手戀愛」，自然會有想法、會感覺出來，堂‧吉訶德傳提起「情人之間，只要牽涉tio̍h in ê戀愛，in ê外表kap舉動準kā心內ê底細透露出來。」(Ⅱ10)可見感情無法度藏，tsit款tāi-tsì自然to̍h會發生，mā m̄免強求。不過若是發現對方交往時間已經真久，koh lóng m̄肯「牽手」，mā 真正hō͘人苦惱，有可能tú-tio̍h「宅男、宅女」「干物男、干物女」tsiah-ê變種現代人類，tsit時無妨kā伊siâⁿ一下，先伸手去giú看覓，若lóng無反應，Aih，mā就算啊，萬萬bē-tàng繼續「tshiân」落去。

畢竟天下間siōng hō͘人感嘆ê是「郎有情、妹無意」或者「妹有情、郎無意」，tú-tio̍h 煞風景ê石頭人，tsē若是有才tiāu吞忍，ná koh有啥物是無法度接受ê？！mā就也就suah-suah去啊。

Siuⁿ-tsē m̄好、不夠mā m̄好，lóng是麻煩；到底ài如何撙節，tio̍h-ài靠個人ê智慧，松丘mā講buē出一個道理出來。

本文出自玉山社出版《媒合也可以找到真愛》