《媒合也可以尋著真愛》

 | | | 轉寄

《泰瑞薩觀點》推薦序－ 浪漫ê人，浪漫ê事

作者 張炎憲 2011.05.08

結婚是人生大事。天下男女，一半一半，配對完婚，本是大自然定律，mā是一tsân好事。但是當今ê社會並m̄是án-ne，真tsē好男好女到taⁿ iáu是孤單一人，in m̄是無想beh結婚，to̍h是姻緣未到，tshuē bē-tio̍h結婚ê對象。峯松兄見tio̍h tsit種狀況，違背上天美意，因此立誓beh牽成天下有緣眾生，行tuì婚姻，結成佳偶。

峯松兄是一個有夢、koh有大大ê勇氣去完成夢想ê人。伊看tio̍h國民黨政府行高壓統治，壓迫台灣人民，所以伊出來參選，結果m̄-nā落選，iáu hō͘人冠上「煽動內亂罪」，判刑三年半。出獄了後，雖然無koh行政治政治tsit條路，但是疼痛愛護台灣文化ê心，自頭到尾lóng無變。薪水一到手就到舊冊攤買冊，抱一堆冊轉去，伊tsiah有「冊神」、「冊癡」之稱。厝內khǹg滿冊，khǹg到無所在thang khǹg，厝內ê人lóng真為難，伊suah kā tse當做快樂e5tai7- tsì，數年前koh捐冊成立半線文教基金會，phah算建會館，展示伊ê收藏，行銷台灣文化。

尤清擔任台北縣長ê時，伊出任台北縣立文化中心主任，推動本土文化資料ê收集，出版台北縣文學藝術家作品，koh規劃「福爾摩沙文化日」展覽，一一來理想實現，伊是當時相當出色ê文化中心主任。

2000年，我擔任國史館館長，邀請伊出任主任秘書，伊因為pháiⁿ勢拒絕，伊放棄退休，重新轉去過公職生活。Tī伊ê規劃運作之下，國史館有真大ê轉變，但是當伊看tio̍h國史館同事有ê人 iáu無結婚無娶bó͘，就起了疼惜ê心，成立劉媽媽工作室，開始做媒人，giú起紅線，可惜lóng無成功。伊轉任國史館台灣文獻館館長了後，仝款非常關心同事ê婚姻問題。

2006年自台灣文獻館退休了後，峯松兄koh有新ê想法，想beh開一間料理店，專賣西班牙海產飯，為tio̍h達成tsit-ê目標，伊利用同事訪問西班牙檔案局ê機會，去買專門做海產飯ê鼎，tsà-tńg--來台灣hō͘伊了後，一方面伊親身到有賣海產飯ê專門店試食，一方面koh參加救國團ê教人煮食ê課程，學做菜。伊終其尾圓夢啊，tī員林開一間西班牙料理店kap咖啡店，店名號做「賽凡提斯咖啡」。

賽凡提斯是西班牙有名ê文學家，作品「堂‧吉訶德」是一本諷刺現實，充滿浪漫理想、人生智慧、敢愛敢恨ê小說。峯松兄真歡喜冊中主角，所以將店名號做「賽凡提斯咖啡」，iáu有成立讀冊會研讀tsit本冊。其實峯松兄ná親像冊中主角，永遠有夢、有追求buē完ê夢想，人生逐pái轉折，lóng充滿驚喜、充滿智慧kap理想。

「賽凡提斯咖啡」m̄-nā是台灣頭一間用tse號名ê咖啡館，其中ê佈置koh充滿峯松兄ê所有ê特殊風格。伊將收集到ê魚盤、銅鐘á kap堂吉訶德圖像文物，當做配景，掛滿厝內。人客若來食佳餚，to̍h kah-ná進入文化殿堂，沈醉tī峯松風格ê氣氛--內。

Uì台灣文獻館退休了後，伊做起賽凡提斯咖啡頭家，兩ê性質無仝、風格無仝，但是一直無變ê是峯松兄hit種熱誠kap戇膽，將西班牙海產飯ê當家總舖師，扮kah有聲有色。後來因為中東發生戰爭，做西班牙海產飯ê香料「番紅花」大起價，伊經營bē落去。了後，伊koh掛起「泰瑞薩婚姻紹介所」招牌，做起媒人khang-khè，希望天下有情人ē-tàng白頭偕老。

峯松兄做起媒人， kap一般婚姻紹介所無仝，伊m̄-nā事先m̄收費，iáu需面談，了後伊koh會寫短文紹介，貼tī網頁頂面hō͘人看。因為寫kah真活潑、趣味，到taⁿ已經有百guā萬人點入去看，所以名聲jú來jú大，而且koh有男女二千guā人註冊，列入紹介對象。峯松兄做kah非常辛苦，拜六、禮拜，時常tī台北、高雄kap員林之間the走tsông，逐pái配對見面，伊通常會在場先做紹介，經過雙方同意tsiah ē-tàng交往。嚴守隱私權kap尊重對方ê精神，得tio̍h男女雙方ê信任，因此希望加入ê會員jú來jú tsē，峯松兄mā就jú來jú無閒，但是伊真享受，因為看tio̍h有人姻緣結成，就會歡喜kah kuí-nā工睏buē去。

峯松兄是一個心思幼koh體貼、tsiok有同理心ê人。Teh紹介過程中，伊觀察男女之間ê互動，用「堂‧吉訶德」冊中羅貝kap瑪麗，稱呼男女雙方，並自稱松丘，kah-ná堂‧吉訶德ê使用人桑丘。峯松兄用tsiah-ê稱呼，伊將伊ê觀察、感受、kap期待寫做「泰瑞薩觀點」，koh tuì玉山社出版，冊名號做「媒合mā ē-tàng tshuē-tio̍h真愛─獻hō͘所有人ê泰瑞薩觀點」，初看tshan-tshiūⁿ是teh教示男女雙方如何認bat對方、如何交往，若是詳細kā看tio̍h會發現是一本充滿愛心、人性關懷kap浪漫ê作品。

峯松兄認為天下有情人應該成做眷屬，到taⁿ iáu未結婚，m̄是人無好，是因為無機會。伊願意牽成有情有緣ê人，hō͘世間充滿疼kap幸福。「泰瑞薩婚姻紹介所」是因為tsit-ê信念來成立，「泰瑞薩觀點」充滿騎士勇往直行、堅持理想ê浪漫精神。

本文出自玉山社出版《媒合也可以找到真愛》