《台語網放送頭》

 | | | 轉寄

保存阿母ê話，台語系有存在ê使命

作者 李婉慈 2011.06.12

過去真濟人問我，lín中山醫若會有台語系？現此時，我攏聽著人家講，你敢是中山醫台語系畢業ê，ia̍h若無母語能力若會tsiah-ní好？

這是一個經過濟濟人拍拚所建立ê台語系，我必須愛hō͘大家了解我ê母校中山醫台語系對台灣社會ê意義，自2003年開始，除了培養學生對母語ê專業知識能力外，mā陸續參與母語相關活動，親像逐年攏主協辦「世界台語文化營」kap協助其他相關ê母語活動、參加各種文學獎kap投入母語相關研究，hō͘學生m̄-nā tī校園內學習，koh進一步將所學ê物件回饋hō͘社會大眾，因為án-ni tsiah會使hō͘阮運用專業知識kap社會產生連結。另外，學生mā愛通過台客語認證考試來證明家己ê專業，根據教育部表示，大專院校相關科系中之台語鑑別度是中山醫台語系最有指標性。如今，學校董事會用各種理由提案beh停招台語系tsham外語系，koh積極要求轉型做語言中心，試問，若無一個系所來規劃培養專業母語人才，kan-na單純靠語言中心beh來推廣，án-ne咱iah-ū juā-tsē氣力通來保存阿母ê話？

願董事會會當看māi阮過去為台灣本土基石所做ê拍拚來手下留情。目前，透過臉書、噗浪等各種管道，學生已經成立自救會，mā懇請關心台灣語文ê朋友們做伙來鬥相共kap讚聲，hō͘ 阮一條堅定ê路繼續為台灣母語拍拚。