《台語網放送頭》

 | | | 轉寄

台語文電子冊技術研究社 起鼓

作者 潘科元 2012.10.07

感謝林長老為我tsáu-tsông設法《平民ê基督傳》。
到時我會招人比對原冊圖檔來做校對。若招無人，我就逐工撥寡時間，寬寬仔來做。

我有koh tī facebook 開一ê「台語文電子冊技術研究社」，我已經先將汝加入社團來，勞煩你有閒ê時，才過來kā阮指教。
以下是我貼tī迄ê社團ê公告：
------ 電子冊ê時代已經來矣！弱勢ê台語文，比強勢語文koh卡需要利用電子冊ê優點來推捒。目前已經累積袂少台語文ê網頁資料，咱該當就即ê基礎，進一步來推廣台語文電子冊。所以建置即ê社團，招邀[tsio-io]友志來研究、合作。
咱比較卡靜態ê網頁，電子冊有真濟優勢：
○ 下載落來，隨時thìng好tī各種隨身設備（手機仔、平板電腦）來閱讀。
○ 透過雲頂服務來進行同步，一份資料，同齊出現tī個人濟濟項設備內底。可比講，即本電子冊，我tī厝內ê PC 讀到某一頁，了後出外坐公車，手機仔提出來，即時通接落去讀。
○ tī電子冊頂面做書籤、註記等等，會用得傳轉去電子冊平台，分享hō͘現在佮未來讀即本冊ê任何人，嘛方便進行網路讀冊會。這對推捒台語文，意義重大！
○ 冊有新版出來，即時知影thang更新。
○ 讀電子冊，坐卡會椆、讀卡會落；看電腦網頁，一下仔就袂堪得矣。
即ê社團ê重點，主要是tī技術方面，欲來研究按怎製作台語文ê epub 電子冊（尤其是多媒體ê）、建置台文電子冊平台（採用 Open Publication Distribution System, OPDS, 協定），koh將成果提供hō͘社會利用。 ------
科元