《白話字文獻e5文明觀》

 | | | 轉寄

第二章《台灣府城教會報》、平面媒體、活字印刷術

作者 陳慕真 2007.07.15

第一節 活字印刷機ê傳入
一、歐洲印刷術ê發展kap影響
就西方歷史ê發展來看，uì中古世紀後期，到kah十六世紀ê文藝復興時期，以及「路德馬丁」（Martin Luther）引發宗教改革ê發生，甚至是科學理性時代ê來臨，tsiah ê帶動西方文明ê重大變革，lóng kap十五世紀歐洲活字印刷術ê發明有真密切ê關係。印刷術tī近代世界ê歷史發展中，ē-tàng講扮演了真重要ê關鍵性角色。Tī十五世紀印刷術發明tsìn前，中國bat用「木刻版印刷」（block printing)來作為印製冊ê基本方法。Tī西方世界，文學作品kap宗教ê冊lóng是用手抄寫ê方式teh複製、流傳ê。這種生產冊ê方式m̄-nā速度非常ê慢，tī抄寫ê過程中mā容易產生錯誤，致使新思想ê傳播真tsia̍h力。 西元1450年間，德國人「古騰堡」（Johann Gutenberg)發明「活字印刷機」（movable-type printing press)，對中國傳統ê「木刻版印刷」做出兩項重要ê改革。第一是金屬活字ê發明。印刷ê時tsūn,只要kā文字單獨做成活字，組成活版tō ē-sái印刷，kap木刻版比較起來，「活字版」ê速度kap效率lóng加真緊。第二項改革tō是印刷機ê發明。透過印刷機印出來ê印刷品，品質m̄-nā比木刻印刷清楚，而且koh ē-sái tī紙ê兩面印刷。 「古騰堡」ê革命性發明以後，一方面取代西方傳統ê手抄寫方式，一方面mā hō͘世界ê印刷技術開始有突破性ê發展。

後來，印刷術uì德國傳到kuí ê歐洲，真tsē國家像講法國、荷蘭、瑞士、西班牙ê重要城鎮，lóng tī十五世紀後期hit段時間，開始設立印刷廠，建立家己ê印刷事業。印刷術 tāu-tāu-á mā傳向歐洲以外ê其他國家，親像匈牙利、莫斯科、希臘等國家。另外，tuè著西班牙kap葡萄牙ê殖民地開拓者，亦將印刷術散播到其他大陸，像講1529年到墨西哥、1593年到菲律賓，koh有1588年到澳門，1590年到日本。 印刷術會tī歐洲國家大量普及ê原因，主要是因為西方世界對書籍kap文獻ê需求量增加。Tī文藝復興tsìn前，教會kap修道院因為宗教信仰ê需求，對聖經、聖詩、神學等宗教讀本真有興趣，koh有貴族家庭mā需要大量ê冊來深化in ê文化素養。另外，tī歐洲南部ê以色列人地區，mā因為in ē-tàng藉著印刷術ê快速複製，來保存in當地ê宗教kap文化，所以mā加速印刷術ê普及。 綜合來講，透過印刷術，hō͘冊ê生產加速，mā hō͘知識kap觀念ê進展比過去koh khah快速、普及。這種市場對印刷術ê需求，影響著歐洲十五kap十六世紀文藝復興時期ê知識爆炸。

印術刷發明以後，除了對歐洲文藝復興時期產生影響以外，mā影響著後來ê「宗教改革」kap語言文字ê發展。Tī十五世紀以前，歐洲世界是由羅馬天主教會所掌控，各種學習ê管道，不管是一般ê學校，或者是大學lóng受著教會ê控制。當時，「拉丁文」是強勢、主流ê語言，教會ê儀式是用拉丁文來進行，聖經經文亦是用拉丁文ê譯本。所以，kan-nā有受過教育ê人聽有儀式，看有聖經。大部分m̄-bat拉丁文ê一般百姓、婦女若是想beh了解聖經ê內容，只有完全相信神職人員ê解說。羅馬天主教會tō透過tsit種知識壟斷ê方式，完全掌握著人民ê信仰kap思想。 Tī tsit款背景之下，路德馬丁發動宗教改革，主張人應該直接用母語來了解上帝ê話，m̄-bián koh經過神職人員ê解說，家己tō ē-tàng透過讀聖經來kap上帝tsih接。所以，伊運用印刷機來大量印製冊kap傳單，外傳到各地方，宣傳伊ê主張，koh用siōng接近民間語言ê方式將聖經翻譯做德文。路德馬丁除了將聖經ê解釋權還hō͘一般百姓，hō͘聖經成做普羅大眾ê財產以外，koh khah重要ê是，透過印刷機大量印刷帶來ê語言整合ê過程中，促成德國書寫語文ê標準化，替後來德國文學ê發展建立穩固ê基礎。M̄-nā德國，聖經翻譯本ê sî-kiâⁿ mā陸續發生tī歐洲其他國家，藉著各國方言文本ê大量印刷，mā促成tsiah-ê國家寫作語文ê進步kap系統化， 影響著in國民文學ê開展。歐洲各國ê民族語文，tī印刷機ê力量kap聖經翻譯本ê影響下來興起，取代了歐洲ê拉丁文文化。Tuè著中世紀ê沒落，法語、德語、西班牙語、英語kap義大利語等方言lú來lú普遍性ê成做文學表達ê媒介。

印刷術ê普及m̄-nā影響宗教革命ê發生，亦因為將聖經翻譯做本國語言，帶動歐洲各國家國民文學ê產生，另外，mā促進民族意識ê提升。宗教改革期間，聖經翻譯ê在地化kap大量印刷ê過程中，拉近著民族對語言、文化ê情感，mā培養出文化ê民族主義，進一步影響著民族國家ê形成。研究民族主義kap民族國家形成ê「安德森」（Anderson)認為：「資本主義、印刷科技kap人類語言，這三個因素互相ê作用，促成拉丁文ê沒落kap方言性ê「印刷語言」ê興起，以個別ê印刷方言為基礎來形成ê「世俗語言共同體」，就是日後「民族」ê原型。」 另外，安德森koh進一步論證「印刷語言」成做民族意識基礎ê原因：「人民透過印刷ê媒介，意識著「我者」kap「他者」不同語言場域ê分別，tsit kuá hō͘印刷品所連結ê「讀者同胞」，形成了民族想像共同體ê粗胚。」 由此可見，方言性ê印刷語言kap tsit kuá印刷品ê普及，是形塑民族「想像共同體」ê重要元素，mā是民族國家形成ê重要基礎。

整體來講，活字印刷術ê發明替西方歷史ê發展帶來關鍵性ê改變，亦影響著世界文明ê進展。伊tī宗教改革運動中扮演了重要ê角色，致使「新教」ê興起。 亦因為宗教改革運動期間，「聖經翻譯本」ê大量印刷、傳播，以及印刷文字ê大量化，來形成知識ê普及kap啟蒙。透過本國語言聖經ê閱讀，人民有機會學習文學語言ê讀寫，tāu-tāu-á 形成各國家ê國民文學。另外，tī知識ê啟蒙、文字ê讀寫能力建立以後，人民亦掌握著對抗統治者ê工具，無koh hō͘解釋權限定tī貴族kap高級神職人員ê手頭，進一步phah破歐洲「拉丁文」霸權ê文化社會。Ē-sái講，印刷機ê發明促成「現代歷史、科學、通俗文學、民族國家ê出現，所有咱看作現代ê一切lóng受著伊ê影響」。 印刷術ê影響會hiah-nih深闊，其中關鍵性ê因素tō是透過知識普及化ê過程，hō͘文字產生「氣力」（khuì-la̍t)。印刷術ê出現代表著知識ê常民化，任何有閱讀能力ê人lóng thang透過閱讀來得著各種ê文字訊息，像講，了解偉大ê發明、無kâng ê文化、無kang ê傳說kap事實。 換一句話講，印刷術帶來「文字」ê改變。Tsit khuán文字ê「氣力」m̄-nā改變人民對世界ê認知，mā是致使宗教改革運動興起、聖經翻譯本sî-kiâⁿ、歐洲國民文學產生kap民族國家形成ê重要因素。